VOV4.K’ho- Broă jơi bơtiàn kòn cau mờ broă lơh jơi bơtiàn kòn cau sùm geh gơnoar broă kuơmàng tàm broă lơh bơ̆t bơtàu mờ sền gàr Dà lơgar. Ală nam do, kơnờm bơh priă jền Dà lơgar dê, ală mpồl lơh sa kă bro, mpồl cau mờ cau dùl nă să is, muh mat ƀòn lơgar, ngan là tiah làng bol jơi bơtiàn kòn cau dùl êt nă cau neh tam gơl loh làng. Ală gơl gùng lơh gơs neh dong tàm tơrbŏ gùng lòt đah ală ƀòn lơgar niam rlau, lòt rê kă bro phan bơna bơtàu tơnguh. Mơya, pơndrờm mờ ală tiah ndai, kơnhoàl ù tiah jơi bơtiàn kòn cau dùl êt nă cau kung gam geh sơl phan bơna ờ niam ngan rlau jơh, kung gam sơl ală bơta ờ hềt niam bè phan bơna gùng lòt den tàng kal ke nàng bơtàu tơnguh mhar mờ kơ̆ kơl jăp. Jơnau lơh gùng lòt tàm kơnhoàl tiah kơh bơnơm Mù Cang Chải, càr Yên Bái dê geh tơngŏ loh cơng tàng broă do.

Đơs bè phan bơna gùng lòt bơh tiah he dê, ồng Sồng A Trống- Chủ tịch Ủy ban Nhân dân xã Chế Tạo, kơnhoàl Mù Cang Chải, càr Yên Bái yal: Xã Chế Tạo là xã kal ke ngan rlau jơh bè gùng lòt rê. Tài bơh ù tiah bơh xã dê gơ kơh ir mờ priă bơcri bơh dà lơgar dê dùl êt. Bulah là xã kung geh bơcri priă uă sơl mơya kung ờ hềt tus kàr lơi sơl. Gùng rơndeh ô tô lòt den rơ̆p pa lơh tus tàm anih tờm xã lơm. Ai gam wơl jơh ală ƀòn den gùng rơndeh ô tô lòt ờ hềt gơtùi lòt tus geh. Gùng bơh do tus anih tờm tiah 2 geh 17 kơi sồ, tŭ do kàl prang den lòt pơgăp dùl jiơ ai dilah trồ mìu den lòt jơh pơgăp dùl jiơ nggùl. Ai lài do, ờ hềt geh lơh niam wơl dùl êt lơi den geh 17 kơi sồ lơm mơya pal lòt jơh tus 2 jiơ den hơ̆ sồng tus anih.

Gơwèt mờ làng bol ơm tàm uă ƀòn lơgar tiah kơh bơnơm jơnhoa, tiah làng bol jơi bơtiàn kòn cau dùl êt nă cau, geh gùng bê tông lơh tus ƀòn ngan ngồn là bơta kơ̆p kờñ ngan gĭt lơh. Wă wờng geh bơta kơ̆p kờñ sùm bơh làng bol dê, tŭ Huyện ủy Mù Cang Chải lam lơh broă lơh “ngai lồi poh bal mờ làng bol”, gĭt nđờ jơ̆t rbô nă kuang bàng, cau ling lơh broă tàm kơnhoàl neh geh nùs nhơm dong kờl is lòt tus tơn tàm ală ƀòn lơgar tiah kơh bơnơm nàng dong làng bol bơ̆t niam wơl hìu đam, tơnhàu phan tam mờ kuơmàng là lơh gùng lòt. Bí thư Huyện ủy Mù Cang Chải ồng Nông Việt Yên, pà gĭt: Bơta do den neh dong kờl uă ngan sơmang rao yơ. Làng bol tă pơgồp is tai. Kơnhoàl hòi jà tă pơgồp sơmang ai mơ do. Tơnơ̆ hơ̆, làng bol tă pơgồp bràs, lŭ rơđeh, cau nàng lơh. Kơnhoàl dong sơmang bal mờ bơta chài. Pa do, càr kung tam gơl broă dong kờl nàng dong kờl gùng krơi is mùl gŏ in den bờh. Mơya geh brong rbòng dà tơn, mờ ờ gŏ di là lơh bè làng bol dê tơnơ̆ bàr pe dơ̆ mìu dờng là gơ dô jơh. He sồr là pah nhai dùl dơ̆, tơl nă kuang bàng, đảng viên pal lời êt ngan là bơh 2 ngai tàm ngai dơ̆ 7 halà ngai rlô rê hờ ƀòn mờ làng bol. Bơh broă lơh gùng lòt, lơh niam wơl gùng, lơh pa, lơh mờ bê tông jơh ală gơl gùng.

Jăt Tiến sĩ Hà Việt Quân lơh broă tàm Mpồl lơh Rơndăp broă lơh tơrgùm bal jơh ală bơta mờ broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 den bulah neh lơh geh ală cồng nha kuơmàng tàm rlau 35 nam tam gơl pa mơya tiah làng bol jơi bơtiàn kòn cau dùl êt nă cau mờ tiah kơh bơnơm kung gam sơl là tiah kal ke ngan rlau jơh tàm gùt lơgar, ngan là bè phan bơna. Tiến sĩ Hà Việt Quân, đơs: Phan bơna den tàm tơrgùm jơh ală bơta lơh sa- mpồl bơtiàn ndrờm bè là dùl jơnau kờñ jal mhar geh kuơ ngan khà dùl mờ geh dùl bơta geh ngan bè bơyô pa đơs, den kung geh bàr pe tiah kung neh geh priă jền bơcri nàng tơrgùm jơh pràn tàm broă bơsong ală broă bè phan bơna mơya gơ kung ờ hềt geh ală bơta gơdờp tơn geh tus rài kis phan bơna mờ nùs nhơm làng bol jơi bơtiàn kòn cau dùl êt nă cau mờ tiah kơh bơnơm dê tài bơh uă jơnau geh bal jơnau ờ gơtùi gĭt lài mờ jơnau ờ rơcăng lài mơya jơnau gơbàn mờ uă ngan rlau jơh mờ ƀươn tìp ngan rlau jơh là tài bơh ală ƀòn lơgar tiah làng bol jơi bơtiàn kòn cau dùl êt nă cau den khi tìp uă ngan kal ke bè priă jền bơcri ngan ngồn là tiah làng bol jơi bơtiàn kòn cau dùl êt nă cau tìp uă ngan bơta lòng gơrềng tus broă hòi jà tă pơgồp mờ ngui priă jền bal tàm tŭ hơ̆ den jơnau kờñ bè bơtàu tơnguh lơh sa- mpồl bơtiàn den gơ sồr priă jền uă ngan.

Dùl tàm ală tơngume kuơmàng tàm Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 là lơh niam wơl gùng lòt tàm tiah làng bol jơi bơtiàn kòn cau dùl êt nă cau. Bè hơ̆, tàm tơngai pa broă lơh bơcri priă ai bơtàu tơnguh lơh sa- mpồl bơtiàn bơh tiah làng bol jơi bơtiàn kòn cau dùl êt nă cau mờ tiah kơh bơnơm dê in digơlan kờñ pal geh bơta tam gơl bè lơi? Đơs bè broă do, Tiến sĩ Hà Việt Quân, đơs bè do: Broă lơh bơtàu tơnguh mhar den jăt añ pal tơrgùm tàm broă kơrnoat boh lam. Tàm hơ̆, den dilah kơrnoat boh lam gơtùi tơrgùm tàm 2 gah broă tờm ngan, ngan là kơrnoăt bè ătbồ mờ kơrnoat lam lơh jăt kơrnoat ătbồ den bol añ kung gĭt wă geh sơl là kờñ pal geh ală kơrnoat gơhòi gơ jà bơcri priă nàng hòi tơrgùm geh ală bơnah. Ờ mìng là kơldìng tàm priă jền bơta pràn bơh Dà lơgar dê lơm mờ gam pal kơldìng tàm bơta pràn, priă jền bơh ală mpồl lơh sa kă bro dê mờ geh tŭ là kơnờm tàm bơta pràn bơh làng bol dê. Ai kơrnoat lam lơh jăt den bol añ kung gam tơrgùm jòi gơlik geh ală broă lơh geh gơrềng tus broă bơsong ală broă geh gơrềng tus song dơ pă loh làng tàm broă ătbồ mờ ngui priă jền. Ală kơrnoat tam pà priă jền dùl bă loh làng, sền gàr nàng ală cau kal ke ngan rlau jơh den geh ai lài bơcri uă rlau mờ ală kơrnoat geh gơrềng tus jăt sền, sền swì mờ hòi tơrgùm bơta lơh bal bơh làng bol dê tàm broă jăt sền, sền swì.

Bè hơ̆, nàng hòi tơrgùm, tă pơgồp mờ ngui geh cồng nha ală bơta pràn priă jền nàng lơh niam wơl ală gùng lòt, lơh geh jơnau kờñ bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021- 2030 gơ sồr pal geh ală broă lơh dong kờl gơcèng bơta tơrgùm bal jơh ală bơta jŏ tơngai kơ̆ kơl jăp, jŏ jòng, bơsong geh ală bơta ờ hềt niam, ờ hềt pràn jak bơh tơngai pa do dê. Kờñ pal geh nùs nhơm bồ tơngoh kơlôi sơnơng broă lơh pa tàm bơ̆t bơtàu mờ lơh jăt broă lơh dong kờl jơi bơtiàn kòn cau, tàm hơ̆ nùs nhơm geh kơnòl, bơta lơh ngan jơh nùs bơh să tờm cau lơh mờ lơh jăt broă dong kờl dê kung gam là jơnau lơh nền sơl.

 Cau cih Hoàng Thái (VOV4)- Cau mblàng Lơ Mu K’Yến