VOV4.K’ho- Tĕ khà kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh nam 2021- 2026 là broă lơh chính trị kuơmàng bơh dà lơgar dê, là tŭ niam nàng làng bol he lơh jăt gơnoar lơh tờm bơh he dê bơh broă sac rwah, pồ geh ală kuang bàng pơnrơ ngan, jak ngan, nùs nhơm niam ngan, dipal ala măt ai làng bol in tàm Quốc hội mờ Hội đồng Nhân dân ală kấp. Ngan tài bè hơ̆, den tàng broă sồr lơh broă lơh yal tơngĭt, mblàng yal jơnau tĕ khà kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh nam 2021- 2026 pal geh ală anih lơh broă, mpồl lơh broă bơh dà lơgar tus ƀòn lơgar sền gròi, lơh jăt bơh uă broă lơh krơi is nàng kờñ pơgồp bơnah uă ngan tàm cồng nha lơh geh bơh dơ̆ tĕ khà dê.

Kung bal mờ gùt lơgar sơl, ală ƀòn lơgar tiah làng bol jơi bơtiàn kòn cau dùl êt nă cau gam lơh pràn broă lơh mblàng yal bal mờ uă broă lơh krơi is, nàng kờñ dong làng bol gĭt loh bè bơta kuơmàng bơh dơ̆ tĕ khà dê mờ geh kơnòl mờ pang sră pồ bơh he dê. Bơh bồ nhai 3 nam 2021, Mpồl duh broă Jơi bơtiàn kòn cau mờ Ủy ban Jơi bơtiàn kòn cau neh geh Broă rơndăp lơh 1449 bè lam lơh jăt broă lơh yal tơngĭt jơnau, mblàng yal dơ̆ tĕ khà kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh nam 2021- 2026 gơwèt mờ tiah làng bol jơi bơtiàn kòn cau dùl êt nă cau.

Jăt mờ hơ̆, tơngume mblàng yal tơrgùm bè jơnau kờñ, gơtha mờ bơta kuơmàng bơh dơ̆ tĕ khà dê; ală jơnau yal kơrnoat boh lam geh gơrềng bè: Sơnoa boh lam nam 2013, Adat Tĕ khà kuang bàng Quốc hội, Adat Tĕ khà kuang bàng Hội đồng Nhân dân ală kấp gam geh ngui tŭ do; ală sră nggal bơto pơlam bè dơ̆ tĕ khà bơh Dà lơgar dê, sră nggal bơh Ủy ban Thường vụ Quốc hội dê mờ Mpồl duh broă Tĕ khà dà lơgar dê.

Mblàng yal ală bơta pal jăt, ală broă pơlam lơh tĕ khà, ală jơnau sồr pal geh bơh kuang bàng Quốc hội mờ kuang bàng Hội đồng Nhân dân dê, bè gơnoar tĕ khà, gơnoar tơlik măt tĕ khà bơh làng bol dê mờ kơnòl cau tĕ khà dê tàm ală tŭ tus bal tĕ khà.

Mblàng yal bè bơta kờñ bal bơh làng bol dê, làng bol jơi bơtiàn kòn cau dùl êt nă cau gơwèt mờ gùng dà tàm gơl pa bơh Đảng dê; srơh tàm pơrlòng lơh gơs cồng nha gờm chờ dơ̆ tĕ khà; jờng rơ di tŭ ală tiah mờ ală cau dùl nă să is geh cồng nha lơh geh jak ngan tàm broă lơh tĕ khà, ngan là broă lơh tĕ khà tàm ală tiah geh gal làng bol jơi bơtiàn kòn cau dùl êt nă cau ơm kis, tiah kơh bơnơm, tiah nhàr lơgar, tiah kal ke uă ir.

Mblàng yal bè tơngume ală dơ̆ tìp măt mờ cau tĕ khà, bè rài kis mờ broă lơh broă bơh ală cau tơlik măt tĕ khà dê, kuơmàng là ală cau tơlik măt tĕ khà là cau jơi bơtiàn kòn cau dùl êt nă cau, cau tơlik măt tĕ khà tàm tiah làng bol jơi bơtiàn kòn cau dùl êt nă cau, cau tơlik măt tĕ khà là cau jơi bơtiàn dùl êt nă cau, cau tơlik măt tĕ khà gơwèt ƀòn lơgar kal ke ir.

Mblàng yal bè broă drơng broă, sền gàr ai dơ̆ tĕ khà lơh geh cồng nha mờ mblàng yal bè cồng nha dơ̆ tĕ khà, pơgồp bal broă lơh rơcăng sơndră kòp Covid-19.

Tŭ do, ală ƀòn lơgar tiah sar lơgar ngài gam jơh nùs lơh pràn broă lơh mblàng yal tĕ khà tus tàm tơl thôn, ƀòn, dong làng bol ală jơi bơtiàn gĭt wă bè gơnoar mờ kơnòl bơh he dê tàm dơ̆ tĕ khà mờr tus. Kấp ủy gơnoar ătbồ ƀòn lơgar neh sac rwah ală kuang bàng lơh broă hòi jà làng bol gĭt đơs dà jơi bơtiàn kòn cau dùl êt nă cau, geh bơta mờng chài bè broă lơh hòi jà làng bol, pơgồp bal niam đah mblàng yal mờ rùp hin bal mờ mblàng yal mờ bơr. Mpồl kuang àng tờm xã, ling sền gàr tiah nhàr lơgar, đoàn ơruh pơnu, mpồl cau ùr...kung geh hòi tơrgùm jơh nàng tus bal lơh “broă lơh mblàng yal”. Mò Nguyễn Thị Hồng Vân Phó Chủ tịch Ủy ban Mặt trận dà lơgar Việt Nam càr Lạng Sơn, pà gĭt: Bol añ neh geh broă rơndăp lơh nàng lơh pràn broă lơh mblàng yal bè tĕ khà mờ gùng dà broă lơh bơyai lơh mblàng yal pal mùl màl dipal, ngac ngar mơya pal lơh gơtùi mờ geh cồng nha. Tàm hơ̆, kuơmàng tơrgùm tus ală cau là làng bol ơm tàm tiah kal ke, tiah làng bol jơi bơtiàn kòn cau dùl êt nă cau tàm tiah nhàr lơgar...Bơh hơ̆ lơh gơlik geh bơta lơh gơ rề, nàng ngai tĕ khà Quốc hội mờ Hội đồng Nhân dân ală kấp tơngai lơh broă bơh nam 2021- 2026 den ngan ngồn là Ngai chờ bơh jơh tơl nă làng bol dê.

Nàng gơhờp mờ bơta niam chài tơl jơi bơtiàn dê, broă mblàng yal ai làng bol in geh lơh uă li la bơh rùp hin, pang rùp hòi jà, ngui uă ngan ală gah yal tơngĭt jơnau mpồl bơtiàn, sền dờng màng ală broă lơh mblàng yal mờ bơr. Uă broă lơh mblàng yal bơceh pa bè ngui niam gơnoar broă bơh cau geh bơngă pin dờn dê, bơyai lơh đơs crih tam ya lòt ntrờn làm bă tiah tàm ală dơ̆ pơrjum, dơ̆ pờ drà halà sền swì cih wơl sră nggal mblàng yal tĕ khà mờ dà jơi bơtiàn kòn cau tàm tiah hơ̆ in nàng gơ in ƀươn gĭt mờ ƀươn kah...

Mò Phạm Thị Lan Phó Chủ tịch Ủy ban Mặt trận dà lơgar Việt Nam càr Gia Lai đơs nền cồng nha lơh geh bơh mpồl “cau mblàng yal mờ bơr dê” tàm tiah sar lơgar ngài, bè do: Kuơmàng là ală cau geh bơngă pin dờn pơnrơ ngan, ală cau kra ƀòn, kuang ƀòn, cau ătbồ thôn, ngui tơn jơnau đơs khi dê, dà đơs tàm tiah hơ̆ dê bè Jrai, Bahnar nàng yal wơl ală jơnau yal jăt nùs nhơm bal tus mờ tơl nă làng bol in. Bơh gah mblàng yal jơnau do den uă ngan làng bol, ngan là cau jơi bơtiàn kòn cau dùl êt nă cau khi kung geh sơl ală bơta rơcăng lài, bơta gĭt wă, ngui sră pồ bơh he dê nàng pồ geh ală cau geh tơl nùs nhơm niam, broă lơh jak, geh bơta pràn, bơta jak nàng tus bal lơh kuang bàng Hội đồng Nhân dân ală kấp.

Gơtùi đơs, bơh broă lơh pràn yal tơngĭt jơnau bè tĕ khà bơh uă broă lơh li la, rơ̆ ru, broă mblàng yal bè tĕ khà tàm tiah sar lơgar ngài neh pơgồp bơnah đơs lah wơl ală jơnau đơs tìs, jơnau kơlôi ờ di, đơs pơrlồm bu ba bơh ală mpồl cau gơjrañ kơuềng dê; dong làng bol jơi bơtiàn kòn cau dùl êt nă cau in gĭt wă loh, là: lòt đùh sră là pơgồp bơnah pồ geh cau geh bồ tơngoh jak, ala măt ai làng bol in ai tơlik ală gùng dà broă lơh bơtàu tơnguh...dong rài kis bơh să tờm khi dê brồ guh klàs bơh rƀah, kơ̆ kơl jăp rài kis. Bơh hơ̆, làng bol jơi bơtiàn kòn cau dùl êt nă cau gĭt wă loh làng rlau bè gơnoar, kơnòl bơh he dê mờ rcăng tus bal Ngai Tĕ khà.

Cau cih Thu Hoà- Cau mblàng Lơ Mu K’Yến