VOV4.K’ho – “Nam 2020 lơh sa dà lơgar kung gam pơn jat kơ\ kơljap mờ gơguh GDP mờr 7%”. Do là jơnau đơs bơh ală cau jak chài lơh sa dê tàm dơ\ cribơyai mờ tơngume “Lơh sa nam 2020: Bơta kơp kơ nờm bơh mpồl bơtìan ASEAN”.

Nam 2019, lơh sa lơgar Việt Nam dê gơguh sơr lèt rlau mờ jơnau kờ` geh ai tơlik mờ gàr sùm khà gơguh jơnhua ngan rlau jơh tiah ASEAN mờ tàm mpồl ală rài lơh sa bơtàu tơnguh niam ngan rlau jơh tàm châu Á. Jat khà kờp bơh Tiah tờm yal tơnggit mờ kờp du\ lài lơh sa – mpồl bơtìan dà lơgar, gơguh GDP nam 2019 đơs lài geh 7,15%. Do là khà gơguh jơnhua rlau bơh Chính phủ dê (6,8%) mờ khà jàu bơh Quốc hội dê (bơh 6,6 tus 6,8%). Gơguh lơh sa jơnhua, broă lơh sa dờng kung gam kơ\ kơljap, khà pria\ ngui sa CPI lơyah ngan rlau jơh tàm ua\ nam (pơgap 3%). Hoàc huơr kes pria\ dà lơgar tàm khà lơyah pơn drờm mờ ală nam lài, mìng pơgap 3,54% GDP. Bơta pràn jak tàm pơr lòng gùt plai ù bơh lơgar Việt Nam dê gơguh 10 khà, gơguh tus khà 67 tàm 141 rài lơh sa geh sap sèng. Cau jak chài lơh sa, ồng Ngô Trí Long pà git:

“Nam 2019, broă lơh sa dờng pơn jat tai kơ\ kơljap, 2 nam sùm bol he lơh gơs khà geh jàu mờ tàm nam do, 5 khà sơr lèt rlau mờ khà geh jàu, blơi mờ tac phan hờ lơgar ndai gơguh ua\, rlau 500 tơmàn dolar Mỹ, do là khà pờ dờng ngan, bè gơ hòi gơ jà pria\ bơcri kung ua\ ngan, bè đah mpồl bơtìan ai geh broă lơh cau lơh broă in, tam gơl niam rài kis. Do là ală bơta niam ngan”.

Ală cau jak chài kung pà git, nam 2020, lơh sa lơgar Việt Nam mờ dunia digơlan niam rlau. Dơ\ tam dră kă bro đah Mỹ mờ Lo neh ờ huan kal ke tài bơh lơh geh 2, 3 jơnau ring bal, geh lơh gơlik bơta pin dờn tus mờ drà kă bro. Nam 2020, lơh sa lơgar Việt Nam dê pơn jat tai kơ\ kơljap mờ gơguh bơh 6,8 tus 7%, kơryan bơta roh bơngă khà pria\ tàm pơgap bơh 3,2 tus 3,5%. Jat hơ\, mpồl lơh sa dùl nă să is kung gam pơn jat tai là bơta pràn ai bơta bơtàu tơnguh rài lơh sa in.

Ồng Nguyễn Đức Thành, Kuang atbồ Viện Kơlôi sơnơng lơh sa mờ broă lơh, Đại học Kinh tế, Đại học Quốc gia đơs là, mờ gơnoar broă Chủ tịch bơh Mpồl ASEAN dê, lơgar he geh ngui ua\ tu\ niam nàng kờ` chồl pràn bơtàu tơnguh:

“Tàm bơta mut gơ rờm bal bơh lơgar Việt Nam dê tàm nam 2020 tàm mpồl bơtìan lơh sa ASEAN ngai sơlơ ua\ mờ niam rlau tai, tàm hơ\, Việt Nam geh ngui tai drà kă bro ASEAN mut gơ rờm bal ua\ rlau tai, kung bè ală lơgar ASEAN kung sền Việt Nam bè dùl mpồng nàng lik hờ ală lơgar bơdìh mpồl, ngan là Lo, Mpồl tam klac châu Âu. Nam 2020, Việt Nam at gơnoar broă là Chủ tịch mpồl ASEAN, Việt Nam geh ngui ua\ tu\ niam nàng chồl pràn kă bro tàm dơlam is mpồl kung bè broă lơh ndai, geh dong kờl ai bơta bơtàu tơnguh lơh sa, lơh broă mờ lơgar ndai mờ lơh sa lơgar Việt Nam in”.

Ua\ mpồl lơh broă dunia kung geh ală jơnau đơs niam ngan gơ wèt mờ bơta kơp kơ nờm lơh sa lơgar Việt Nam dê tàm nam 2020, tàm hơ\ geh jơnau đơs, Việt Nam geh là dùl tàm ală lơgar gơtùi ngui niam ală tu\ niam nàng chồl pràn gơguh lơh sa mờ tam gơl niam broă kă bro. Kuơ màng broă mut gơ rờm bal dunia pơn jat tai dong Việt Nam tus bal ua\ rlau tai tàm ròt ală lơgar tac phan gùt plai ù. Broă mut gơ rờm bal dunia bơh lơgar Việt Nam dê geh lơh pràn ngan, tu\ Việt Nam neh tus bal 16 Hiệp định kă bro khat gơboh 2 lơgar, ua\ lơgar. Mờ broă tus bal ală Hiệp định pa, tơl làm bè EVFTA, CPTPP… geh lơh gơlik jơnau pơn rơ niam nàng lơgar Việt Nam in rề ơnàng, geh bơta li la bè drà kă bro tac phan bơna, pơgồp bơnah gàr kơ\ khà bơtàu tơnguh.

Cau mblàng K’Duẩn