VOV4.K’ho - Tàm  ala\ ngai lồi nam Mật Tuất, di tu\ hìu đah cau klau tus yal bơr lap bao, hìu đah cau ùr la hìu nha\ ồng Đàng Năng Long kis tàm kơnhoàl Lăk, càr Dak Lak, cau geh ua\ ngan rơwas tàm Việt Nam, neh bơyai lơh yàng Rơwas nàng yal la bơh tu\ do kòn ùr neh geh bao. Kềng gah tơnau Lak dờng ơnàng bềng càl, adat bơhìan geh lơh niam bơne\ ngan  do neh lơh geh  niam bơne\ ngan.

             Ồng mò Đàng Năng Long- Nguyễn Thu Ba geh 4 na\ kòn ùr mờ 7 nơm rơwas, pơnrơ ngan mờ broa\ lơh ka\ bro nhơl chờ hìu nha\, la anih tus geh ua\ ngan cau nac lơgar cau ơm wơl kờ` gơboh ngan tàm Dak Lak, kung la anih lơh mờ tac kơphe rơwas mìng dùl lơm tàm nam 2010 mờ nam 2013. Mìng geh kòn ùr dơ\ 3 sơnđan la Diễm My jơh  bơsram dờng gah dà đơs lơgar cau, rê tàm thị trấn Liên Sơn dong mè bèp bơtàu tơngguh ka\ bro nhơl chờ. Nam do,  khai hơ\ sồng geh bao ơm bơrtơu bè rài jat đah  jơi mè  la bi Duy Hưng,  cau lơh broa\ tin học gam lơh broa\ tàm do.

            Cau M’nông sơnđan cau yàng  atbồ rơwas la yàng Nguach Ngual. Ơm kis tàm ù tiah kơh bơm M’Nông di rlau 50 nam do,  mờ gam geh rơwas hìu bơh ala\ Gru cau M’nông bơđào sền ròng rơ was kup bơh rơwas brê, đơs dà M’nông bè cau M’nông, pah ngai geh tam  tìp mờ  cau nac ua\ lơgả ngan, ồng Long neh geh ua\ ngan  bơcah  pa tàm lơh jat bơhìan yau, bơta niam chài bơh  bơhìan chài rgơi yau mờ tu\ do.

            Bơh sơnđờm dơ\ lơh yàng tus lồi dơ\ lơh yàng, tềng bơta go\ ngan bơh cau 2 đah hìu nha\, ồng Đàng Năng Long bal mờ dùl na\  cau oh mi cau M’nông dờp oh mi la ồng Y Thang Uông, mut lơh ala\ adat bơhìan duh khoai,  geh pơ dơng phan duh. Bal mờ sơ lào phan pơdơng bè lap bao  bè ờs  pal geh la bồ sur quay, pơnàng cùr sa nha, ơlak, ba`, tềng  blàng hìu gam lơh gơ nơng nàng lơh yàng mờ geh ơn lài ua\ ngan phan sa mờ rơwas kờ` ngan bè prìt dum,  prìt lir,  tơngời,  tào,  rpual,  lơ u ris.

             Tài bơh tàm [òn pa geh cau chơt, den tàng  cau tờm hìu ờ dròng cing mồng. Dơ\ lơh yàng geh lơh ờ lơ nga` mờ gam  lơh di tơl. Tơnơ\  jơh lơh adat,  ùr ban mờ klau bơrtơu geh  lơh jà rơ was sa ala\ phan sa bơkah. Ala\ plai rpual,  plai  prìt sơkò, tào… rơ was geh sa tàm bơr la  jơh mo. Rơwas gam geh ngui sơnròm rhềp phe tềng blàng hìu nàng sa, hala lơh nhơl bruh bè  dà.

          Cau mblàng K’ Brọp