VOV4.K’ho– Tàm hìu lơh broă Quốc hội pa geh lơh pơrjum dơ\ 2, Mpồl duh broă te\ khà dà lơgar, Chủ tịch Quốc hội, mò Nguyễn Thị Kim Ngân, Chủ tịch Mpồl duh broă te\ khà dà lơgar neh đơng lam mờ pơlam dơ\ pơrjum. Tus bal geh ală kuang bàng tàm Mpồl duh broă te\ khà dà lơgar. Tơngume tờm bơh dơ\ pơrjum dê tơrgùm tàm broă rơcang lơh te\ khà Kuang bàng Quốc hội khóa 15 mờ Hội đồng Nhân dân ală kấp tơngai lơh broă bơh nam 2021 tus nam 2026.

Tàm dơ\ pơrjum, Kuang atbồ Mpồl cau gơnoar cih, Kuang atbồ Cơldu\ lơh broă Quốc hội, Kuang atbồ Cơldu\ lơh broă Mpồl duh broă te\ khà dà lơgar, ồng Nguyễn Hạnh Phúc yal Jơnau rơcang cih jơnau yal bè broă lam lơh broă lơh te\ khà Kuang bàng Quốc hội khóa 15 mờ Hội đồng Nhân dân ală kấp tơngai lơh broă bơh nam 2021 tus nam 2026 bơh pơrjum dơ\ 1 tus tu\ do mờ rơcang lài ală gùng dà, broă rơndap lơh tàm tơngai tus.

Ală kuang bàng geh jơng bơh Mpồl duh broă te\ khà dà lơgar dê kung neh ai jơnau đơs, sền sơ wì ring bal jơnau rơcang cih Nghị quyết Jơnau pơlam bè sră nggal tơlik mat te\ khà, sră pồ mờ ală bơta sră nggal ngui tàm broă lơh te\ khà Kuang bàng Quốc hội khóa 15 mờ Hội đồng Nhân dân ală kấp tơngai lơh broă bơh nam 2021 tus nam 2026.

Đơs pơn dut pơrjum, Chủ tịch Quốc hội, mò Nguyễn Thị Kim Ngân, Chủ tịch Mpồl duh broă te\ khà dà lơgar pà git, tus tu\ do, Mpồl duh broă te\ khà dà lơgar neh lơh jat di Adat te\ khà Kuang bàng Quốc hội mờ Hội đồng Nhân dân. Ală broă lơh rơcang lài ai broă lơh te\ khà in neh geh lơh niam, di mờ tơngai pơrgon, ngan là ală tiểu ban mờ ală Cơldu\ dong boă ai Cơldu\ lơh broă Mpồl duh broă te\ khà dà lơgar in: “Mờ bơta jơh nùs, sơbac mhar, bol he neh cribơyai song dơpă ală tơngume. A` đơs niam ngan jơnau yal bơh Kuang atbồ Cơldu\ lơh broă Mpồl duh broă te\ khà dà lơgar dê bè broă rơcang ală sră nggal, ală jơnau đơs cribơyai tàm pơrjum neh ring bal mờ ală jơnau rơcang cih jơnau yal lài hơ\. A` sồr Cơldu\ lơh broă Mpồl duh broă te\ khà dà lơgar cih dờp jơnau đơs bơh ală Kuang atbồ Tiểu ban dê bè ală sră nggal kơrnuat boh lam, bè kuang bàng, bè bơsong jơnau yal yă, yal khàu, bè lơngap lơngai ờ do ờ dă mờ lơh sơnơm”.

Chủ tịch Quốc hội, mò Nguyễn Thị Kim Ngân đơng lam pơrjum

Chủ tịch Quốc hội, mò Nguyễn Thị Kim Ngân, Chủ tịch Mpồl duh broă te\ khà dà lơgar sồr Cơldu\ lơh broa\ Mpồl duh broă te\ khà dà lơgar pơn jat tai cribơyai mờ ală tiểu ban sền gròi lam lơh di mờ tơngai hơ pơrgon broă lơh. Jat Chủ tịch Quốc hội, mò Nguyễn Thị Kim Ngân, Chủ tịch Mpồl duh broă te\ khà dà lơgar đơs, broă lip sră, bơdìh mờ ală tơngume yau gam bè ờs bơta kuơ den sồr pal pơgồp bal mờ ală broă lơh kơrnuat boh lam pa bơh Đảng, dà lơgar dê, kờp du\ lài jơnau lùp gơlik geh tàm tơngai te\ khà; mơkung sồr anih lơh broă, tiểu ban sơbac mhar lơh gơs kơnòl broă he dê.

Pơrjum dơ\ 2 Mpồl duh broă te\ khà dà lơgar neh ring bal Nghị quyết jơnau pơlam bè sră nggal tơlik mat te\ khà, sră pồ mờ ală bơta sră nggal ngui tàm broă lơh te\ khà Kuang bàng Quốc hội khóa 15 mờ Hội đồng Nhân dân ală kấp, tơngai lơh broă bơh nam 2021 tus nam 2026. Chủ tịch Quốc hội, mò Nguyễn Thị Kim Ngân, Chủ tịch Mpồl duh broă te\ khà dà lơgar sồr, tơ nơ\ dơ\ pơrjum do, Mpồl lơh broă kuang bàng, Cơldu\ lơhbroă Mpồl duh broă te\ khà dà lơgar mhar lơh sir ală sră nggal mờ lơh jat ală tơngume gàr bơta niam, tơngai hơ pơrgon; yal cồng nha tàm pơrjum tơ nơ\.

Gùt anih pơrjum

Tus tu\ do, Quốc hội, Ủy ban Thường vụ Quốc hội, Mpồl duh broă te\ khà dà lơgar, Thủ tướng Chính phủ, Mpồl bơyai broă dà lơgar, Ban Tuyên giáo dà lơgar, Ủy ban sền sơ wì dà lơgar, Bộ Nội vụ, Bộ Tài chính neh lơh gơs broă ai tơlik ală sră nggal pơlam gơ rềng tus dơ\ te\ khà Kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Bè broă rơcang lài kuang bàng tơlik mat te\ khà, tàm tơngai tu\ do, ală kấp geh gơnoar neh rơcang ală sră nggal pơlam, kờp du\ rơndap tap sèng, khà, kơrnuat tam pà cau tơlik mat te\ khà tàm dà lơgar rê hờ kấp hơ đơm. Broă rơcang lài nàng gàr niam lơngap lơngai, ờ do ờ dă ai dơ\ te\ khà tàm gùt lơgar in neh geh lơh jat jơh nùs, ring bal. Broă crơng gơs Ủy ban te\ khà tàm kấp hơ đơm gam geh ală càr, [òn dờng jal mhar lam lơh, gàr niam jat tu\ tơngai mờ adat boh lam neh cih. Tus tu\ do, ờ hềt geh jơnau yal yă, yal khài bè ală broă gơ rềng tus broă lơh te\ khà.

Cau mblàng K’Duẩn