VOV4.K’ho– Poh lài, pơrjum dơ̆ 2, Quốc hội khóa 15 geh lơh jat broă lơh pờ tơn tàm internet bơh anih sơñio rùp tơn bơh Hìu lơh broă Quốc hội tus 62 mpồl kuang bàng Quốc hội ală càr, ƀòn dờng gơwèt dà lơgar. Bal mờ broă lơh bơt bơtàu adat boh lam, dơ̆ pơrjum do, Quốc hội neh lời uă tŭ tơngai nàng sền sơwì ală broă lơh sa- mpồl bơtiàn, kes priă dà lơgar, gròi sền mờ ală broă kuơmàng ndai. Poh lài, Mpồl kuang bàng Quốc hội ală càr tàm tiah Tây Nguyên neh jơh nùs tus bal ală tơngume tàm dơ̆ pơrjum, tàm hơ̆ geh uă jơnau đơs gơ rềng tus broă ngan ngồn tàm tiah do.

Tơnơ̆ tŭ iat sră yal bè jơnau rơcang cih Nghị quyết bè 2, 3 broă lơh, bơta dong kờl krơi is bơtàu tơnguh bơh ală càr, ƀòn dờng: Hải Phòng, Nghệ An, Thanh Hóa mờ Thừa- Thiên Huế mờ Jơnau yal sền sơwì bè jơnau rơcang cih Nghị quyết bè 2, 3 cơ chế, broă lơh krơi is bơtàu tơnguh bơh ală càr do dê, Mpồl kuang bàng Quốc hội càr Dăk Lăk neh cribơyai, ring bal uă tơngume ală sră yal, jơnau yal. Mờ kung ai jơnau đơs bè tơngume do. Mpồl kuang bàng Quốc hội càr Dăk Lăk đơs là, tơngume bơh Chính phủ dê gàr bơta pal geh. Ală sră nggal yal neh nền nòn ngan. Dilah Nghị quyết geh ring bal den geh lơh gơlik bơta niam ai ală tiah in rơcang lài lam lơh mờ tơnguh bơta pràn, bơta ƀuơn he dê. Bulah bè hơ̆, pal sền gròi tus cồng nha lam lơh jat. Ồng Y Vinh Tơr, Kuang atbồ Mpồl kuang bàng Quốc hội càr Dăk Lăk geh jơnau dan: “Cồng nha lam lơh jat den kung ring bal mờ tŭ tơngai là bơh bồ nam 2022 nàng lơh gơlik bơta niam ai ală tiah in geh tŭ tơngai bơtàu tơnguh. Tài do là ală broă lơh tơrlòng lài; 2, 3 cơ chế, broă lơh krơi is den kung geh tŭ tơngai ngan ngồn. Tàm jơnau yal sền sơwì kung geh đơ,s tus jơh nam 2025 là dipal nàng tŭ ai tơlik ală cơ chế, broă lơh tàm tơl tŭ tơngai ngan ngồn in. Bè hơ̆ den tus tơngai hơ̆ he gơtùi sền sơ wì dilah broă lơh hơ̆ geh cồng nha, dipal den bol hi pơn jat tai lam lơh uă, ngui tàm thể chế gơs ală broă lơh bal ai ală tiah in nàng lơh gơlik bơta niam bơtàu tơnguh pa tàm tŭ tơngai pa”.

Tus bal tă pơgồp jơnau đơs cribơyai bè broă lam lơh broă lơh, bơta dong kờl Bảo hiểm xã hội, Mpồl kuang bàng Quốc hội càr Kon Tum dan, pal pơnjat tai dong kờl bè Bảo hiểm y tế ai cau ờ jai blơi is in. Do là broă kuơmàng dong làng bol, ngan là làng bol jơi bơtiàn kòn cau dùl êt nă cau geh tai bơta niam nàng geh ngui ală broă drơng ala sền gàr pràn kơldăng să jan, tơrmù ƀà bơta kơn jơ̆ bè priă jền. Ồng Phạm Đình Thanh, Phó Kuang atbồ Mpồl kuang bàng Quốc hội càr Kon Tum yal, hơ̆ là tơnơ̆ tŭ Chính phủ ai tơlik Kơrnuat sồ 861 bè ring bal mat ală xã tiah 3, tiah 2, tiah 1 gơwèt tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2025, khà cau geh kes priă dà lơgar dong kờl blơi Bảo hiểm y tế càr dê gơmù uă ngan.

Mpồl kuang bàng Quốc hội càr Kon Tum tus bal pơrjum

Lòt sền ngan ngồn bơh Mpồl kuang bàng Quốc hội càr Kon Tum dê ai gŏ, tàm khà ală cau ờ gam geh dà lơgar dong kờl bè bảo hiểm y tế, geh uă cau cau geh rài kis kal ke ngan, ờ jai blơi is Bảo hiểm y tế ai să tờm mờ hìu bơnhă in. Kuơmàng, ală cau do uă ngan gơwèt là cau jơi bơtiàn kòn cau dùl êt nă cau. Tàm khà rlau 51 rbô 800 nă làng bol bơh càr Kon Tum dê ờ gam geh dà lơgar dong kờl bè Bảo hiểm y tế geh tus rlau 49 rbô 300 nă cau là làng bol jơi bơtiàn kòn cau dùl êt nă cau, geh rlau 95%. Tềng đap bơta geh ngan do, ồng Phạm Đình Thanh geh jơnau dan: “Chính phủ, Thủ tướng Chính phủ pal đơng lam ală Bộ, gah broă lơh geh gơ rềng mhar kờp sền, sền sơwì di bơta geh ngan bè broă gơlik geh nàng di tŭ ai tơlik ală broă lơh dipal kờñ pơn jat tai dong kờl bè bảo hiểm y tế ai ală làng bol gam gơtìp kal ke tàm rài kis in mơya ờ jai blơi is bảo hiểm y tế; nàng dong làng bol, ngan là làng bol jơi bơtiàn kòn cau dùl êt nă cau geh tai bơta nàng geh dờp ală broă drơng ala sền gàr pràn kơldăng să jan, tơrmù ƀà bơta kơn jơ̆ bè priă jền khi dê mờ kung pơgồp bơnah tơnguh khà làng bol jơi bơtiàn kòn cau dùl êt nă cau blơi bảo hiểm y tế, nàng tus nam 2025 geh 98% làng bol jơi bơotiàn kòn cau dùl êt nă cau blơi bảo hiểm y tế jat jơnau kờñ mờ Nghị quyết sồ 88, Quốc hội khóa 14 neh ai tơlik”.

Mpồl kuang bàng Quốc hội càr Dăk Lăk den đơs là, broă tam gơl Adat kă bro bảo hiểm là kuơmàng nàng sền gàr gơnoar kuơ mờ bơta kuơ dipal bơh mpồl bal, cau dùl nă să dê blơi bảo hiểm y tế; tơnguh broă lơh kă bro bảo hiểm; pơgồp bơnah tơnguh mờ gàr sùm bơta bơtàu tơnguh kơ̆ kơljap bơh rài lơh sa- mpồl bơtiàn dê, gàr kơ̆ kơljap rài kis làng bol; sơlơ tơnguh cồng nha atbồ dà lơgar gơwèt tus mờ broă lơh kă bro bảo hiểm. Bulah bè hơ̆, uă broă lơh kă bro bảo hiểm geh jơnau cih ngan ngồn, loh làng rlau. Pal sền gròi bè sră pơrgon blơi bảo hiểm: Ală jơnau cih bơh jơnau rơcang cih dê ndrờm wèt hờ broă sềngàr gơnoar broă bơh ală anih tac bảo hiểm dê là tơm, bè tàm bơnah 1, bơta 14 geh đơs, ală gah geh gơnoar ring bal bè tơngume bơh sră pơrgon dê, mùl màl den tơngume do gam ờ niam.

Mpồl kuang bàng Quốc hội càr Dăk Lăk cribơyai ală tơngume tàm pơrjum

Mò Lê Thị Thanh Xuân, Phó Kuang atbồ Mpồl kuang bàng Quốc hội càr Dăk Lăk dan: “Uă ngan ală sră pơrgon geh anih tac bảo hiểm cih lài. Gơwèt mờ cau geh bồ tơngoh bơsram sră, geh git wă den gơtùi sền mờ git ală bơta, bơnah cih tàm hơ̆ geh kuơ halà ờ geh kuơ he in. Mơya gơwèt mờ cau jơi bơtiàn kòn cau dùl êt nă cau, cau ờ pràn ndai den broă sền jơh ală bơta mờ git ală bơta, bơnah geh cih tàm sră pơrgon den là bơta ờ huan geh. Den tàng pal geh bơta gàr niam đah gah blơi mờ gah tac. Bol hi dan pal sền gròi tus sră pơrgon bảo hiểm nàng lơh bè lơi bè jơnau cih tàm sră pơrgon pal geh đơs loh làng, ƀuơn wă. Ală cau ờ pràn gơtùi git mờ blơi. Ngan là tàm gah sền gàr kòn bơnus”.

Kung tàm dơ̆ cribơyai, ală kuang bàng Quốc hội càr Dăk Lăk neh tă pơgồp jơnau đơs ală tơngume gơ rềng tus: tơm priă jơnau hơ pơrgon blơi bảo hiểm, bơsong tam pìt tam phà bảo hiểm, gơnoar atbồ dà lơgar gơ wèt tus mờ ală mpồl tac bro bảo hiểm tàm ƀòn lơgar, bơyai lơh bơto pơlam, bơto bơtê, tơnguh bồ tơngoh git wă, dờn dờp ai broă kă bro bảo hiểm in nàng gơtùi sền gròi ală broă ờ niam gơlik geh ală broă yal yă, yal khài....

 Cau mblàng K’Duẩn