VOV4.K’ho- Gah đơng lam ling klàng càr Lâm Đồng pa kĭ broă lơh pơgồp bal lơh broă mờ Mpồl đơng lam gah jat yàng Phờk Việt Nam càr Lâm Đồng. Broă pơgồp bal geh lơh gàr kơ̆ kơljap rlau tai bơta gĭt gơ̆p, rềp mềr ling klàng làng bol, lơh jat niam nùs nhơm tam klăc bal jơi bơtiàn. Mơkung là bơnàng jă nàng pơn jat tai lơh jat niam srơh “Lam sồr làng bol jak” mờ “Lam sồr làng bol jak tàm bơt bơtàu ƀòn lơgar pa”.

Tàm ală nam do, càr Lâm Đồng sùm sền gròi tus broă pin dờn gah jat yàng. Bơh hơ̆, lơh gơlik geh bơta rềp mềr, gĭt wă bal mờ gơ̆p ală gah jat yàng mờ ală anih lơh broă, gah, sơnah lơh broă mờ gơnoar atbồ tiah do dê. Bơta geh ngan hơ̆ neh đơs nền broă lơh gah jat yàng di pal bơh Đảng mờ Dà lơgar dê; làng bol gah jat yàng là dùl bơnah ờ gơtùi tàm cah is bơh mpồl tam klăc dờng gùt jơi bơtiàn dê.

Gah jat yàng Phờk mờ mpồl phàu crong bơh lài tus tŭ do kung gam lòt bal sơl tàm uă broă lơh. Bơta lòt bal hơ̆ neh pơgồp bơnah gàr kơ̆ kơljap bơta lơngap lơngai chính trị, rơndap tap sèng, ờdo ờdă gùt mpồl bơtiàn. Mơkung, pơgồp bơnah tơnguh uă rùp să muh mat Cau ling Wa Hồ dê tàm nùs nhơm làng bol.

Lơh jat Chỉ thị bơh Thường vụ Quân ủy dà lơgar mờ broă rơndap lơh bơh Đảng ủy Quân khu 7 dê bè pơn jat tai tam gơl pa mờ tơnguh broă đơng lam, sồr ling klàng lơh jat broă lơh gah jat yàng tàm tơngai pa, Gah đơng lam ling klàng càr Lâm Đồng neh kĭ hơ broă lơh pơgồp bal lơh broă mờ Mpồl đơng lam gah jat yàng Phờk Việt Nam càr tàm bồ nhai 4 pa do.

Gah đơng lam ling klàng càr Lâm Đồng còp mờ gờm chờ Tổ đình Ling Quang, ƀòn dờng Dà Làc di dơ̆ lơh chờ Vu Lan

Đại tá Trần Văn Khương, Chính ủy Gah đơng lam ling klàng càr Lâm Đồng đơs nền: “Broă kĭ hơ lơh broă pơgồp bal do nàng kờñ pơn jat tai sơlơ tơnguh mpồl tam klăc dờng gùt jơi bơtiàn, bơt bơtàu mờ lơh ngan lơh geh bơta rềp mềr, bơta tam klăc bal đah mpồl ling phàu crong mờ Mpồl đơng lam gah jat yàng Phờk Việt Nam càr dê; lơh jat niam gơnoar broă bơh Mpồl jat yàng Phờk Việt Nam càr Lâm Đồng tàm broă lơh bơt bơtàu mờ sền gàr Dà lơgar. Bơh hơ̆, pơgồp bơnah gàr kơ̆ kơljap bơta lơngap lơngai chính trị, rơndap tap sèng, ờdo ơdă gùt mpồl bơtiàn mờ bơtàu tơnguh lơh sa, bơta niam chài, mpồl bơtiàn tàm ù tiah gùt càr dê”.

Jat hơ̆, tơngume pơgồp bal tơngai bơh nam 2021-2025 tàm hơ̆ geh: yal tơngĭt bơta gĭt wă sền gàr dà lơgar mờ bơta lơngap lơngai ală cau kơđơng yàng, cau duh broă yàng, cau pin dờn jat yàng; yal tơngĭt gùng dà broă lơh bơh Đảng, adat boh lam bơh dà lơgar dê, bơta sền gàr dà lơgar, bơta lơngap lơngai, pơlam gùng dà bồ tơngoh ai ală cau kơđơng yàng, cau duh broă yàng, cau pin dờn jat yàng... Pơgồp bal mblàng yal hòi jà ơruh pơnu là oh kòn làng bol jat yàng lơh jat niam kơnòl broă ling klàng. Pơgồp bal bơyai lơh yal tơngĭt bơta pa gơlik geh nàng ală cau kơđơng yàng, cau duh broă yàng, cau pin dờn jat yàng wă loh làng, dùl nùs bal tam dră wơl mờ ală jơnau mblàng yal tìs, bơta bơchồt bơh ală cau pơlơ̆ dră, geh nùs nhơm ờ niam dê sơmờm ală broă geh gơrềng tus gah jat yàng Phờk nàng sơndră wơl. Bơyai lơh ai mpồl ling in lòt lơh broă đah bơdìh lơh broă lơh lam sồr làng bol dong kờl làng bol gah jat yàng Phờk tiah sar lơgar ngài tơn jơh jơgloh, tơmù rƀah. Bơyai lơh dơ̆ tìp mat, lùp còp, gờm chờ di ală ngai lơh chờ dờng bơh Mpồl ling klàng mờ gah jat yàng Phờk dê lơh jat geh cồng nha ală broă lơh bè bơt “Hìu nùs nhơm ling klàng làng bol”, “Hìu tam klăc dờng” ai ală cau jat yàng Phờk geh rài kis kal ke, ală anih pơrjum bơta niam chài, tàp pràn să jan tàm ală anih jat yàng bơh yàng Phờk dê.

Hòa thượng Thích Thanh Tân, Kuang atbồ Mpồl đơng lam gah jat yàng Phờk Việt Nam càr Lâm Đồng đơs nền, Mpồl đơng lam gah jat yàng Phờk Việt Nam càr geh lam lơh dơ̆ lĕ bal, tơl làm ală tơngume pơgồp bal bơh kấp càr tus kấp kơnhoàl. Làng bol gah jat yàng Phờk kung sùm rcang lài tă pơgồp bal, dong kờl kuang bàng, cau ling mpồl ling phàu crong càr lơh jat ală broă lơh tàm bơta pràn dilah geh ai.

Đại tá Nguyễn Công Anh, Phó Chủ nhiệm Chính trị Quân khu 7 neh đơs niam ngan ală tơngume pơgồp bal; mơkung đơs nền Gah đơng lam ling klàng càr Lâm Đồng là dùl tàm ală mpồl lòt lài tàm broă lơh jat tơngume do tàm Quân khu 7. Kung tàm do, bơdìh mờ broă đơs tus ală kơnòl broă pal lơh tơnơ̆ tŭ kĭ hơ, Phó Chủ nhiệm Chính trị Quân khu 7 đơs sùm broă pal lơh niam broă lơh mblàng yal nàng đơs nền rlau tai gơnoar broă mờ bơta tam klăc bal đah mpồl ling phàu crong mờ gah jat yàng Phờk tàm tiah đah Jum Tây Nguyên dê.

Kuang atbồ Mpồl lam sồr làng bol Tỉnh ủy Lâm Đồng mò Phạm Thị Phúc tơngŏ bơta chờ hờp mờ pin dờn tàm broă kĭ hơ broă lơh pơgồp bal lơh broă đah Gah đơng lam ling klàng càr mờ Mpồl đơng lam gah jat yàng Phờk Việt Nam càr Lâm Đồng. Kơ̆p kờñ là, broă pơgồp bal geh gàr kơ̆ kơljap rlau tai bơta gĭt gơ̆p tam klăc bal ling klàng làng bol, lơh jat niam nùs nhơm tam klăc dờng jơi bơtiàn dê. Hơ̆ geh là bơnàng jă nàng pơn jat tai lơh jat niam srơh “Lam sồr làng bol jak” mờ “Lam sồr làng bol jak tàm bơt bơtàu ƀòn lơgar pa”. Ling klàng mờ gah jat yàng Phờk geh pơn jat tai lòt bal nàng pơgồp bơnah lơh geh cồng nha broă lơh tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026 mờr tus.

 Quốc Học jat băo Lâm Đồng- Cau mblàng K’ Hạnh