VOV4.K’ho- Mho ngai 12/10, UBND càr Lâm Đồng bơyai lơh broă lơh tìp mat mờ jờng rơ cau lơh sa kă bro, mpồl lơh sa kă bro pơn rơ jak. Uă broă kal ke, ờ niam tàm broă lơh sa, kă bro geh ală mpồl lơh sa kă bro đơs mờ dan mờ càr sền gròi nàng tă bơsong. Tàm dơ̆ tìp mat,  kuang đơng lam bồ càr Lâm Đồng yal, bulah gơrềng bơh kòp dờng Covid-19, mơya lơh sa- mpồl bơtiàn 9 nhai nam 2021 bơh càr dê kung gam lơh geh uă cồng nha niam ngan. Cồng nha do geh bơta tă pơgồp bal dờng ngan bơh mpồl cau lơh sa kă bro dê mờ rlau 11 rơbô mpồl lơh sa kă bro tàm càr.

Gùt anih pơrjum dơ̆ tìp mat bal bơh mpồl lơh sa kă bro mờ kuang đơng lam bồ UBND càr Lâm Đồng dê

Nàng bơsong bơta kal ke, bơtàu tơnguh wơl lơh gơdờp mờ kòp dờng, ală cau lơh sa kă bro neh geh jơnau đơs, jơnau dan mờ kuang đơng lam bồ càr Lâm Đồng dê uă broă kờñ pal sền gròi nàng tă bơsong. Tờm ngan là jơnau dan tơrmù priă cồng ngân hàng; tơn jŏ tơngai tơm bảo hiểm y tế tàm tơngai 6 nhai; sền sơwì tơrmù priă dia ù tiah; dong kờl mpồl lơh sa kă bro gĭt mờ lơh jat ală rơndap broă lơh tam gơl kỹ thuật sồ nàng sơr băc mhar ngui tàm broă atbồ, yal tơngĭt phan bơna.

Cau mblàng K’Hạnh