VOV4.K’ho- Pa do, Ủy ban Thường vụ Quốc hội neh ai tơlik Nghị quyết sồ 268 bè broă ai gơnoar Chính phủ ai tơlik Nghị quyết geh 2, 3 tơngume krơi mờ jơnau cih bơh adat boh lam dê nàng lơh jat jơnau sồr rơcang sơndră kòp Covid-19. Jat hơ̆, Chính phủ geh lam lơh 4 tơngume krơi mờ jơnau cih bơh adat boh lam gam ngui tŭ do dê. Do là Nghị quyết kuơmàng ngan mờ jal mhar tàm tŭ tơngai kòp Covid-19 gam gơlik geh ngai sơlơ kal ke, ờ gơtùi git lài tàm uă càr, ƀòn dờng tiah đah jum dà lơgar. 

Jat hơ̆, Ủy ban Thường vụ Quốc hội ring bal mờ Nghị quyết bơh Chính phủ dê nàng lam lơh ală broă lơh jal mhar rơcang sơndră kòp Covid-19. Mùl màl, Chính phủ geh gơnoar lơh nền crơng gơs adat dờp, sơm cau bơtờp kòp Covid-19 mờ kung là sră ai gơnoar lơh broă. Jàu Bộ Y tế geh cih ală sră nggal lơh broă tàm thông tư jat sră nggal bal hiă nàng lơh jat jơnau kờñ jal mhar bơh broă lơh rơcang sơndră kòp dê. Thường trực Hội đồng Nhân dân geh jàu lơh nền ală broă gơ wèt gơnoar bơh Hội đồng Nhân dân dê mờ yal Hội đồng Nhân dân in tàm pơrjum rềp ngan rlau jơh. Gơ wèt mờ broă sồr cih broă tă tơm priă kham sơm kòp ai cau kòp Covid-19 in tàm ală anih dờp, sơm kòp Covid-19 bơh kes priă dà lơgar dê gàr jat mờ priă tă tơm ngan ngồn, Chính phủ pơn jat tai đơng lam lơh jat jat gùng dà kes priă dà lơgar geh kơnòl tă tơm jơh bơnah priă jền kham sơm kòp gơ rềng tơn tus broă sơm kòp Covid-19. Ồng Đỗ Đức Duy, Mpồl kuang bàng Quốc hội càr Yên Bái đơs là, broă ai tơlik Nghị quyết sồ 268 neh di tŭ lam lơh ngan ngồn ală kơnòl broă geh jàu tàm Nghị quyết bơh Quốc hội dê bè sơndră kòp, ai Nghị quyết ngui tàm rài kis: “Bơta do neh ai tơnggŏ bơta lòt bal bơh Quốc hội mờ Chính phủ dê kung bè bơta git wă mờ tam pà bal bơh Quốc hội dê bal mờ Chính phủ, mờ làng bol gùt lơgar. Bol hi đơs niam ngan bơta đơng pơlam ngac ngar, git rơcang lài bơh Chủ tịch Quốc hội mờ kuang đơng lam bồ Quốc hội, dipal mờ bơta geh ngan bơh kòp Covid-19 dê”.

Chủ tịch Quốc hội ồng Vương Đình Huệ

Kòp Covid-19 mờ ală broă gơlik geh kal ke ờ gơtùi git lài neh ai tơlik ală bơta kal ke pa tàm broă bơsong cau lơh broă, broă lơh, gàr tơl niam rài kis mpồl bơtiàn. Nàng gơtùi sơrlèt gan ală kal ke bơh kòp bơtờp dê, pal geh ală broă lơh dong kờl di tŭ, di gùng di dà, kuơmàng mơya kung kờñ pal geh bơta lơh ngan, rơcang lài, ngac ngar, geh kơnòl bơh jơh gùt mpồl chính trị dê nàng ală broă lơh dong kờl bơh dà lơgar dê mhar geh tus mờ làng bol. Cau tĕ khà mờ làng bol gùt lơgar ring bal mờ đơs niam Ủy ban Thường vụ Quốc hội neh di tŭ ring bal Nghị quyết sồ 268. Mò Nguyễn Thị Hoài Linh, cau tĕ khà tàm ƀòn dờng Hà Nội đơs: “Bơta do ai gŏ Quốc hội ơn màng kis, pràn kơldang să jan làng bol dê lài ngan rlau jơh, gàr tơl niam rài kis mpồl bơtiàn, gròi sền pràn kơldăng să jan mờ rài kis mờ làng bol dê. Bol hi gŏ iang nùs mờ pin dờn tàm gùng dà bơh Quốc hội mờ Chính phủ dê tàm broă lơh đơng pơlam tàm broă rơcang sơndră kòp Covid-19 tŭ do”.

Jat ồng Trịnh Xuân An, Kuang bàng Quốc hội càr Đồng Nai đơs, broă Ủy ban Thường vụ Quốc hội di tŭ ai tơlik Nghị quyết sồ 268 cih mùl màl 2, 3 tơngume krơi mờ jơnau cih bơh adat boh lam gam ai ngui tŭ do dê neh di tŭ tă bơsong kòl yan bè cơ chế kơrnuat boh lam nàng kờñ sơndră geh cồng nha mờ broă gơlik geh bơh kòp bơtờp dê: “Rơcang sơndră kòp bơtờp pal geh ală broă lơh nền ngac ngar, di tŭ, jơh nùs, kràñ cê mờ ai tơnggŏ kơnòl tềng đap làng bol. Do là broă lơh dipal ngan kờp jơh bal bè chính trị mờ adat boh lam, geh cau tĕ khà mờ ală kuang bàng Quốc hội đơs niam ngan; ai tơnggŏ bơta ngac ngar, nhap nhar, geh kơnòl, lòt bal bơh Quốc hội mờ Chính phủ dê tàm broă lơh rơcang sơndră kòp bơtờp. Jơnau kờñ hơ̆ là jơh ală tài bơh bơta kuơ bơh làng bol dê, jơh ală tài bơh bơta ờdo ờdă mờ bơtàu tơnguh bơh dà lơgar dê”.

Mò Nguyễn Thanh Hải, Mpồl kuang bàng Quốc hội càr Thái Nguyên

Ai mò Nguyễn Thanh Hải, Kuang bàng Quốc hội càr Thái Nguyên den đơs là, broă Nghị quyết bơh Ủy ban Thường vụ Quốc hội dê cih Thường trực Hội đồng Nhân dân geh jàu lơh nền ală broă gơ wèt gơnoar bơh Hội đồng Nhân dân dê mờ yal Hội đồng Nhân dân in tàm dơ̆ pơrjum rềp ngan rlau jơh gàr dipal mờ tŭ tơngai uă tiah gam pal lơh jat ală broă lơh rơcang sơndră kòp kràñ cê bè ờ huan ai tơrgùm gal cau, lơh jat ơm yah ngài mpồl bơtiàn: “Bol hi geh jat tàm hơ̆ nàng bơt bơtàu ală broă lơh ngan ngồn rlau ai càr bol hi in, nàng kờñ lơh gơlik ală cơ chế niam mờ digơlan geh tàm ală jơnau cih bơh adat boh lam dê bè Adat rơcang sơndră kòp bơtờp tŭ do ờ hềt cih ai pà ală phan lơh sơnơm tàm rơcang sơndră kòp den bè lơi, nàng lơh bè lơi rơcang sơndră kòp niam rlau tai, geh cồng nha rlau tai mờ tơrmù ƀà ală sră nggal hành chính mơya kung gam ờ lơh tìs ală jơnau cih bơh adat boh lam dê”.

Dùl tàm ală bơta pal sền gròi là Quốc hội jàu cơ chế ai Chính phủ, Thủ tướng Chính phủ lơh nền mờ lam lơh ală broă lơh ờ hềt geh adat boh lam cih halà krơi mờ jơnau cih tàm ală adat boh lam, kơrnuat boh lam gam ngui tŭ do nàng lơh jat jơnau kờñ jal mhar bơh broă lơh rơcang sơndră kòp Covid-19 dê.

Cau mblàng K’Duẩn