VOV4.K’ho– Pa do, tàm hìu lơh broă Chính phủ, Phó Thủ tướng Thường trực Chính phủ ồng Trương Hòa Bình, Kuang atbồ Mpồl đơng lam dà lơgar Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 đơng lam dơ̆ pơrjum bơh Mpồl đơng lam dê. Tus bal pơrjum geh Bộ trưởng, Chủ nhiệm Ủy ban Dân tộc ồng Hầu A Lềnh, Phó Kuang atbồ Ban Thường trực, kuang đơng lam ală mpồl, bộ, gah broă lơh là kuang geh jơng bơh mpồl đơng lam dê.

Broă lơh jơnau kờñ dà lơgar bè làng bol jơi bơtiàn kòn cau dùl êt nă cau mờ tiah kơh bơnơm là 1 tàm 3 broă lơh jơnau kờñ dà lơgar tơngai bơh nam 2021 tus nam 2025 neh geh Quốc hội ring bal gùng dà bơcri priă mờ khà priă bơcri bơtàu tơnguh geh tă bơh kes priă dà lơgar, geh kuơ dờng màng ngan gơwèt tus mờ bơtàu tơnguh lơh sa- mpồl bơtiàn bơh dà lơgar dê, dong kờl ai geh broă lơh mờ gàr niam rài kis ai làng bol tàm tiah làng bol jơi bơtiàn kòn cau dùl êt nă cau mờ tiah kơh bơnơm in, mùl là tiah tờm gơbàn rƀah bơh gùt lơgar dê. Den tàng, Phó Thủ tướng sồr ală Bộ, gah broă lơh mờ Mpồl đơng lam pal tơnguh nùs nhơm geh kơnòl, mhar bơt bơtàu mờ lam lơh jat broă rơndap lơh ngan ngồn nàng gơtùi bơyai lơh geh cồng nha broă lơh do bơh quý 4 nam do in, pơgồp bơnah tơnguh mhar broă tă priă bơcri dà lơgar, bơsong bơta gơrềng bơh kòp Covid-19 dê, bơtàu tơnguh wơl lơh sa, gàr niam rài kis làng bol.

Yal mờ Mpồl đơng lam, Bộ trưởng, Chủ nhiệm Ủy ban Dân tộc ồng Hầu A Lềnh pà git, Ủy ban gam pơgồp bal jơh nùs mờ ală bộ, gah broă lơh geh gơ rềng rơcang ală sră nggal drơng Mpồl duh broă sền sơ wì dà lơgar in sền sơ wì yal Thủ tướng Chính phủ in ring bal bơcri priă broă lơh jat jơnau sồr. Tơngume tờm bơh broă lơh dê geh 10 rơndap broă dềt. Jơnau kờñ tàm tơngai bơh nam 2021 tus nam 2025 là tơrmù hời rơhời bơta tam cah ngài bè bơta niam rài kis, priă lơh geh bơh tiah làng bol jơi bơtiàn kòn cau dùl êt nă cau mờ tiah kơh bơnơm dê pơndrờm mờ khà kờp bal bơh gùt lơgar dê; tus nam 2025 tơrmù 50% khà xã, thôn, ƀòn uă kal ke, tus nam 2030 ờ gam xã, thôn, ƀòn uă kal ke. Kờp jơh priă bơcri lam lơh tơngai do êt ngan là 147 rbô tơmàn đông.

Tàm dơ̆ pơrjum, ala mat ală mpồl, bộ, gah broă lơh geh gơ rềng tơrgùm cribơyai bè tơngai lam lơh ală kơnòl broă tờm, ngan là tơngai bơh tŭ do tus lồi nam 2021, rơndap tap sèng, kơnòl broă bơh Cơldŭ đơng pơlam tàm dà lơgar dê, mpồl kuang bàng dong broă tàm ală càr, ƀòn dờng, broă lơh hòi jà bơta pràn bơcri priă bơ tơl (geh priă ODA, priă tă pơgồp bơh mpồl bơtiàn).

Phó Thủ tướng Trương Hòa Bình đơng lam pơrjum

Đơs pơn dut dơ̆ lơh broă, Phó Thủ tướng Thường trực ồng Trương Hòa Bình đơs niam Ủy ban Dân tộc mờ ală Bộ, gah broă lơh, kuang geh jơng tàm mpồl đơng lam dà lơgar neh đơng lam jơh nùs, kràñ cê ală kơnòl broă geh jàu jat broă rơndap lơh ai tơlik. Bulah bè hơ̆, Phó Thủ tướng sồr Ủy ban Dân tộc pal ai mờng chài mờ pal mhar lơh gơs 2 kơnòl broă neh rlau tơngai hơ pơrgon; mờ kung pal mhar yal Kuang atbồ đơng lam in kĭ tơlik Quy chế lơh broă mờ broă lam lơh nam 2021 bơh Mpồl đơng lam dà lơgar dê bơh cồng nha jơnau đơs bơh ală bộ, gah broă lơh geh jơng tàm dơ̆ pơrjum Mpồl đơng lam dà lơgar ngai 22/3/2021.

Bè ală kơnòl broă tờm 6 nhai lồi nam, Phó Thủ tướng Trương Hòa Bình đơs loh, ală bộ, mpồl, gah broă lơh geh gơ rềng pal pơgồp bal niam rlau tai, jơh nùs lơh gơs jơh ală broă rơcang lài nàng gơtùi lam lơh jat, tàm hơ̆ tơrgùm lơh sir thể chế mờ ală sră nggal pơlam lơh jat broă lơh. Sền gròi kơlôi sơnơng, ai tơlik ală cơ chế, broă lơh nàng pơn jờng, hòi jà tai ală bơta pràn tă pơgồp bơh dunia mờ mpồl bơtiàn nàng lam lơh broă lơh. Mờkung sơlơ tơnguh broă lơh mblàng yal, hòi jà làng bol pơgồp bal bơta pràn lam lơh broă lơh: “Bơta kuơmàng là lơh bè lơi tơnguh jơnau git wă brồ guh is, kơlôi rơcang is bơh làng bol dê, jơnau git wă bơtàu tơnguh, ờ kơp kơnờm tàm dà lơgar. Bol he kung pal lơh gơlik nùs nhơm tàm pơrlòng duh hồl, hòi jà ală bơta pràn bơcri priă ai phan bơna, ai ală broă lơh in, kuơmàng là sơn đờm mut lơh broă. Geh broă lơh pơn jờng sơn đờm mut lơh broă, ngan là ai cau kơnòm să in. Den tàng he pal bơto broă lơh gơ in dipal tàm tơngai pa 4.0 công nghệ cao”.

Jơnau kờñ bơh broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030 dê là tơrmù hời rơhời bơta tam cah ngài bè bơta niam rài kis, priă lơh geh bơh tiah làng bol jơi bơtiàn kòn cau dùl êt nă cau mờ tiah kơh bơnơm dê pơndrờm mờ khà kờp bal gùt lơgar dê; tus nam 2025 tơrmù 50% khà xã, thôn, ƀòn uă kal ke, tus nam 2030 ờ gam xã, thôn, ƀòn uă kal ke.

Jat Phó Thủ tướng Thường trực Chính phủ ồng Trương Hòa Bình đơs, tàm tŭ tơngai kòp Covid-19 pơn jat tai gơ rềng uă ngan tus tơl gah rài kis lơh sa- mpồl bơtiàn, Broă lơh jơnau kờñ dà lơgar bè làng bol jơi bơtiàn kòn cau dùl êt nă cau mờ tiah kơh bơnơm geh dùl bơta kuơ dờng màng ngan, ờ mìng pơgồp bơnah pơn jờng broă lơh gơlik phan mờ jơnau kờñ ngui sa, ai geh broă lơh, bơtàu tơnguh lơh sa, kă bro, mờ gam geh bơta kuơ dờng màng bè tơl niam rài kis mpồl bơtiàn, kuơmàng là gơ wèt mờ ală cau ờ pràn, ală hìu bơnhă rƀah, hìu bơnhă geh rài kis kal ke tàm ală tiah sar lơgar ngài.

 Cau mblàng K’Duẩn