VOV4.K’ho – Bè Anih jơnau đơs Việt Nam neh sùm yal bè bơta kơl mus brê kơn jơ\ ngan tàm tiah rềp nhàr đah 2 kơnhòal Ea Kar mờ Krông Bông, gơnoar atbồ, gah lơh broă geh gơnoar càr Dak Lak gam lùp khàu, lơh glài ală cau geh gơ rềng kung bè lùp khàu kơ nòl bơh ală mpồl bal, cau dùl nă să lời gơlik geh bơta kơl mus brê. Bulah bè hơ\, tàm tu\ gơnoar atbồ, gah lơh broă geh gơnoar đơs nền geh krà` cê lơh glài den ală cau chu mus brê sồr geh jàu ù neh kơl mus nàng tam phan mờ geh broă rơndap lơh tam pà tu\ tam wơl brê.

Jat khà kờp bơh sơn rờp bơh gah lơh broă geh gơnoar kơnhòal Ea Kar dê, geh pơgap 140 lồ brê mờ ù brê tàm ală tiểu khu 701 mờ 704, bơnah brê bơh Kong ti Lâm nghiệp Ea Kar neh gơtìp làng bol chu mus, sơ gràm ai tàm kàl prang duh pa do. Đah kơnhòal Krông Bông, bơta chu mus brê kung gơlik geh kơn jơ\ ngan tàm bơnah brê gơ wèt Kong ti Lâm nghiệp Krông Bông mờ bă brê neh jàu UBND xã Cư Pui in atbồ, sền gàr. Bol chu mus brê geh đal git ua\ ngan là làng bol tàm thôn Ea Rớt, xã Cư Pui, kơnhòal Krông Bông. Ồng Y Thức Êban, Phó Chủ tịch UBND kơnhòal Krông Bông yal bơta geh ngan:

“Bơh jơnau yal 2 kơnhòal dê, ờ mìng is kơl mus brê gơlik geh tàm đah kơnhòal Ea Kar, mờ gam geh bal kơnhòal Krông Bông kung gơtìp kơl mus sơl. Jơnau yal bơh kơnhòal Krông Bông dê 5 nhai bồ nam là kơl mus rlau 37 lồ, mờ mìng is bă brê gơ wèt thôn Ea Rơt là chu mus 4 tiểu khu gơ wèt bơnah brê atbồ bơh Kong ti Lâm nghiệp Krông Bông dê”.

Tềng đap bơta do, pa do, gơnoar atbồ, gah lơh broă geh gơnoar 2 kơnhòal Ea Kar mờ Krông Bông bal mờ ala mat Sở nông nghiệp mờ Phát triển Nông thôn càr Dak Lak neh bơyai lơh pơrjum jal mhar tàm dùl phân trường sền gàr brê tàm tiah rềp nhàr. Tàm dơ\ pơrjum, ala mat ală hìu bơnhă thôn Ea Rơt neh dờp broă lơh chu mus brê. Bulah bè hơ\, 2, 3 nă cau den sồr gơnoar atbồ pal jàu ù brê neh kơl mus ai làng bol in lơh sa halà pơ gồp bal mờ kong ti lâm nghiệp tam wơl brê. Ồng Vàng Seo Măng, ơm tàm thôn Ea Rơt đơs:

“Rồn bơ klơn ală kơrnuat atbồ, sền gàr brê mơya bơnah hơ jơnau lùp ù lơh sa làng bol in, ờ di đah lơgar ờ ai mờ làng bol ờ go\ lơh sa ờ”.

Làng bol chu mus brê loh làng là lơh tìs adat boh lam, mơya ồng Nguyễn Văn Tâm, Chủ tịch UBND xã Cư Pui, kơnhòal Krông Bông den geh nùs nhơm kờ` dong kờl broă tam gơl gơs dipal broă sơ gràm ù brê:

“Ù làng bol sơ gràm tu\ do làng bol đơs là ù lâm trường den tàng tam phan ờ gơtùi. Dan mờ kong ti lâm nghiệp geh gùng dà tam wơl brê tàm dòr bơ nơm jơnhua. Broă rơndap lơh kong ti dong kờl bè lơi, tam pà bè lơi, dilah kơ lôi gơtùi broă rơndap lơh den yal gờ` làng bol in”.

Pal đơs loh làng là, ờ mìng chu mus brê lơh mìr, tiah do gam gơlik geh bơta tac ù lâm nghiệp, lơh gơbàn ờ nuam bè lơngap lơngai ờ do ờ dă, tam pìt tam phà ù brê. Gơnoar atbồ tiah do kung bè cau tờm brê ờ atbồ kơ\ là jơnau lơh gơbàn bơta brê sùm gơtìp kơl mus jat pah nam. Bulah bè hơ\, nam do, bă brê gơtìp chu mus, sơ gràm ai gơguh ua\ ni sơna bal mờ pơgap 170 lồ geh kờp. Broă kơl mus brê bal mờ làng bol gam geh ală cau geh đơs là cau pas, cau bơcri pria\ kung blơi ù brê mờ khà ua\ ngan.

Tềng đap ală jơnau sồr ờ di ngan bơh 2, 3 nă cau dê, ồng Lê Đình Chiến, Phó Chủ tịch UBND kơnhòal Ea Kar đơs nền, broă làng bol kơl mus brê là lơh tìs adat boh lam mờ ală anih lơh broă geh gơnoar kơnhòal Ea Kar geh lùp khàu, lơh glài krà`. Ờ geh broă tam gơl ù brê gơs ù lơh sa. Ồng Lê Đình Chiến đơs ngan: brê gơtìp kơl mus den pal tam wơl mờ kơ nòl broă do gơ wèt hờ Kong ti Lâm nghiệp Ea Kar dilah ờ jòi bàn cau tờm kơl mus brê:

“Roh brê là pal tam wơl brê mờ kong ti đah bi Chính dê pal lơh wơl. Dilah ờ kup bàn cau lơi chu mus brê, kơl mus brê nàng sồr tam wơl den kong ti pal tă pria\ nàng tam wơl brê”.

Đơs tus gùng dà bơsong bơta kơl mus brê tàm tiah rềp nhàr 2 kơnhòal Ea Kar mờ Krông Bông, ồng Đỗ Xuân Dũng, kuang atbồ Chi cục Kiểm lâm càr Dak Lak pà git, broă do neh sơr lèt rlau gơnoar broă Chi cục dê. Mìng geh Kuang àng den hơ\ sồng gơtùi lơh loh là geh halà ờ broă dong kờl bol kơl mus brê sơ gràm ai ù, tac ù brê:

“Broă do geh tềl tơnggo\ lơh tìs, mơya lơh tìs dùl bă ndơp ndơr. Mờ kơ nòl broă, mờng chài lơh broă Kiềm lâm dê den bol hi ờ tơl pràn nàng lơh broă do. Bè đah Chi cục kiểm lâm den bol hi gam cribơyai mờ Kuang atbồ Sở yal UBND càr in bè broă do nàng dan UBND càr jàu kuang àng càr in den hơ\ sồng geh tơl bơta pràn, bal mờ ală gah lơh broă ndai nàng lùp khàu, lơh glài den hơ\ sồng gơtùi lơh loh broă gơlik geh, hơ\ sồng gơtùi tơn jơh broă do”.

Ală brê brê neh gơtìp chu mus, sơ gràm ai, tac bro tài bơh làng bol mờ ală cau pas sơm tàm tiah brê rềp nhàr đah Ea Kar mờ Krông Bông kung bè tàm tiah tơnau bơ tơt rbòng dà Ea Rớt, mờ bol hi neh sùm yal gơtìp lơh glài bè lơi. Broă do, mpồl bơtìan gam kơp jơnau hơ bơh gơnoar atbồ, gah lơh broă geh gơnoar bơh càr Dak Lak dê.

Cau mblàng K’Duẩn