VOV4.K’ho– Poh lài geh lơh Pơrjum pờ tơn tàm internet gùt lơgar tơn jơh broă lơh tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp, tơngai lơh broă bơh nam 2021 tus nam 2026. Tus bal tàm anih pờ tơlik tơn bơh Hìu lơh broă Quốc hội geh Chủ tịch Quốc hội lài do, kuang đơng lam bồ Đảng, dà lơgar lài do; kuang đơng lam bồ, ala mat kuang đơng lam bồ ală Bộ, mpồl, gah broă lơh... mờ ală càr, ƀòn dờng tàm gùt lơgar. Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơs nền, bol he geh gơnoar pơn iờ să bè ală cồng nha neh lơh geh tàm dơ̆ tĕ khà pa do.

Tàm pơrjum, ală kuang bàng neh cribơyai ală mờng chài niam, broă lơh bơceh pa, kuơmàng là tàm tŭ tơngai kòp bơtờp geh ală broă gơlik geh kal ke. Jat Chủ tịch Ủy ban Nhân dân càr Bắc Giang ồng Lê Ánh Dương đơs, bơta krơi is bơh dơ̆ tĕ khà geh cồng nha dê geh tă pơgồp kuơmàng ngan, ai tơnggŏ loh làng gơnoar broă ngac ngar, bơceh pa bơh ală Mpồl tĕ khà tàm càr Bắc Giang dê: “Ală cau tàm Mpồl tĕ khà tàm phan soh sền gàr, geh tam pà kơnòl broă jat tơl mpồl, cèng bal mờ thùng ơn sră pồ lòt tơl gơl gùng, tơl hìu bơnhă làng bol gam lơh jat broă tam cah is gàr ờdo ờdă. Broă lơh bòl glar ngan, mơya ală cau tàm Mpồl tĕ khà mờ cau tĕ khà ndrờm ai tơnggŏ bơta lơh ngan sơrlèt gan kal ke nàng bơyai lơh tơl làm dơ̆ tĕ khà. Ală rùp să hơ̆, lơh gơlik bơta ngoh rơngac uă ngan tàm nùs nhơm làng bol, gơ gơs rùp să ờ gơtùi huĭ tàm ală dơ̆ tĕ khà tàm càr”.

Đơs bè cồng nha bơh dơ̆ tĕ khà kuang bàng Quốc hội khóa 15, kuang bàng Hội đồng Nhân dân ală kấp tơngai lơh broă bơh nam 2021 tus nam 2026 jat bơta sền sơ wì bơh Mặt trận dà lơgar Việt Nam dê, ồng Đỗ Văn Chiến, Chủ tịch Ủy ban Mặt trận dà lơgar Việt Nam đơs là: “Bơh ală broă chính trị dờng màng bơh Đảng, Dà lơgar dê mờ broă lơh rơcang sơndră kòp Covid-19 tàm lơgar he dê ai gŏ, kuang bàng, công chức, viên chức mờ cau lơh broă tàm ală anih lơh broă Mặt trận bơh dà lơgar tus kấp hơ đơm git loh tai jơnau bơto sồr kuơmàng ngan bơh Chủ tịch Hồ Chí minh dê: Ƀuơn dùl rhiang dơ̆ ờ geh làng bol kung ờ jai. Kal ke nđờ jơt rbô dơ̆ geh làng bol kơlôi rơcang kung sir jơh”.

Pơrjum pờ tơn tàm internet gùt lơgar tơn jơh broă lơh tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026

Đơs tơn jơh pơrjum, Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơs là, pơrjum neh ring bal đơs, tềng đap bơta đơng lam bồ nền nòn ngan bơh Bộ Chính trị, Ban Bí thư, bơta đơng lam, pơlam lơh jat jơh nùs, bơceh pa bơh Quốc hội, Ủy ban Mặt trận dà lơgar Việt Nam, ală kấp, ală gah broă lơh, ală mpồl drơng broă tĕ khà dê bơh dà lơgar tus kấp hơ đơm, dơ̆ tĕ khà kuang bàng Quốc hội mờ Kuang bàng Hội đồng Nhân dân ală kấp tơngai lơh broă bơh nam 2021 tus nam 2026 neh lơh geh cồng nha niam ngan tàm uă gah, gàr niam bơta làng bol lơh tờm, ring bal, di mờ adat boh lam, ờdo ờdă, tềm pềr mờ ngan ngồn là Ngai chờ dờng bơh jơh gùt làng bol dê.

Pơrjum kung ai geh 5 jơnau bơsram mờng chài, hơ̆ là: gơtùi tơnguh bơta pràn tam klac dờng bơh jơh gùt làng bol, bơta pràn tam klac bơh ală jơi bơtiàn kòn cau mờ ală gah jat yàng, bơta pin dờn bơh làng bol dê, jơnau git wă geh kơnòl bơh làng bol dê, bơta tus bal jơh nùs bơh jơh gùt mpồl lơh broă chính trị dê tàm broă lơh tĕ khà là bơta lơh nền, gàr nền nòn ai cồng nha bơh dơ̆ tĕ khà dê in. Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơs nền: “Gàr lam lơh niam broă rơndap lơh broă lơh kuang bàng; bơh broă cribơyai sac rơ wah, yal tơnggit cau tơlik mat tĕ khà, ai jơnau đơs cau tĕ khà bè cau tơlik mat tĕ khà, lam sồr tĕ khà nàng gơtùi rơ wah ală cau tơlik mat tĕ khà dipal, lơh jat tơl ală bơta pal geh, tơl khà jat jơnau sồr. Rơ wah cau geh jơng tus bal ală mpồl drơng broă tĕ khà tàm kấp hơ đơm geh pràn jak, mờng chài, jơh nùs, geh kơnòl, git loh adat boh lam bè tĕ khà, chài rơgơi lơh broă, gàr kơ̆ kơrnuat pal jat tàm broă đùh sră pồ, broă kờp sră pồ; lơh niam broă bơto pơlam mờng chài lơh broă lơh tĕ khà ai ală mpồl drơng broă tĕ khà in, ngan là ală Mpồl tĕ khà”.

Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơs pơn dut pơrjum

Chủ tịch Quốc hội ồng Vương Đình Huệ, Chủ tịch Mpồl duh broă tĕ khà dà lơgar đơs nền, bol he geh gơnoar pơn iờ să bè ală cồng nha neh lơh geh tàm dơ̆ tĕ khà pa do. Kuơmàng là tàm bơta kal ke tài gơ rềng bơh kòp bơtờp dê, cồng nha bơh dơ̆ tĕ khà dê sơlơ ai gŏ bơta pràn bơh nùs nhơm kờñ gơboh dà lơgar, nùs nhơm tam klac dờng, nùs nhơm brồ guh is sơrlèt gan kal ke mờ bơta kơp kơnờm brồ guh bơh jơi bơtiàn Việt Nam dê, bơtòm tơrgùm tàm bơta pin dờn kơ̆ kơljap bợh làng bol dê gơ wèt tus mờ Đảng, dà lơgar mờ rài atbồ dà lơgarhe dê.

Jat Chủ tịch Quốc hội ồng Vương Đình Huệ đơs, tàm tơngai tus, kơnòl broă ai tơlik gơ wèt tus mờ Quốc hội khóa 15 mờ Hội đồng Nhân dân ală kấp là dờng ngan, kuơmàng ngan, sồr pal mhar sơn đờm lam lơh mơ. Kuơmàng là pal tơrgùm tàm broă bơyai lơh geh cồng nha pơrjum dơ̆ 1 bơh Quốc hội khóa 15 dê. Do là dơ̆ pơrjum kuơmàng ngan, mờ kơnòl broă tờm là sền sơ wì, lơh nền mpồl lơh broă mờ kuang bàng dờng màng bơh Mpồl duh broă dà lơgar dê tàm tơngai lơh broă; sền sơ wì, lơh nền 2, 3 broă lơh, broă rơndap lơh dờng bơh dà lơgar he dê ai 5 nam mờr tus in bè: Broă rơndap lơh bơtàu tơnguh lơh sa- mpồl bơtiàn, broă rơndap lơh priă jền, broă rơndap lơh bơcri priă dà lơgar di mơ tơngai mờ 2, 3 Broă lơh jơnau kờñ dà lơgar bơh tơngai bơh nam 2021 tus nam 2025 dê.

 Cau mblàng K’Duẩn