VOV4.K’ho– Broă rơndap lơh bơtàu tơnguh lơh sa- mpồl bơtiàn 5 nam bơh nam 2021 tus nam 2025 mờ broă wèt sền tus nam 2030 là dùl tàm 4 tơngume kuơmàng geh pơrjum Ban Chấp hành Đảng dà lơgar dơ̆ 3 khóa 13 geh lơh tàm Hà Nội tàm lồi poh lài tơrgùm cribơyai ai jơnau đơs. Đơs nền do là broă rơndap lơh kuơmàng geh gơtha lơh nền tus broă lam lơh jat jơnau kờñ, kơnòl broă bơtàu tơnguh lơh sa – mpồl bơtiàn mờ Pơrjum dờng Đảng dơ̆ 13 ai tơlik, broă geh Tổng Bí thư ồng Nguyễn Phú Trọng đơs tàm jơnau đơs mut pơrjum. Uă kuang bàng đảng viên, ală cau jak chài lơh sa đơs, Bộ Chính trị neh sền sơwì di ngan bè broă lơh sa, chính trị, mpồl bơtiàn bơh lơgar Việt Nam dê. Bơh hơ̆ đơs nền tàm 2, 3 bơta kuơmàng mờ dà lơgar pal tơrgùm bơtàu tơnguh, ai tơnggŏ nùs nhơm lơh ngan bơh Đảng mờ dà lơgar dê pơn jat tai lam lơh jơnau kờñ dơ̆ lĕ bal, lơh ngan lơh gơs ală jơnau kờñ lơh sa- mpồl bơtiàn tàm nam do.

Jat cau jak chài lơh sa ồng Đinh Trọng Thịnh, pơrjum Đảng dà lơgar dơ̆ do geh ală jơnau đơs tă pơgồp ngan ngồn nàng kờñ lam lơh niam ngan rlau jơh broă lơh bơtàu tơnguh lơh sa mpồl bơtiàn tàm 5 nam tus. Mờ kung đơs là, tàm tŭ tơngai kòp Covid-19 gơlik geh kal ke, Đảng, Dà lơgar neh geh bơta đơng lam ring bal ngan tàm broă lam lơh jơnau kờñ dơ̆ lĕ bal, hơ̆ là lơh ngan rơcang sơndră kòp bơtờp, mơya pal lam lơh bơtàu tơnguh lơh sa mpồl bơtiàn, tơnguh niam rài kis bơh làng bol dê. Bè hơ̆ den tàng, bulah kòp Covid-19 gơlik geh kal ke, jŏ jòng, mơya tŭ do, bol he neh gơtùi rơcang lài tàm broă sền gròi kòp bơtờp mờ lam lơh jat jơnau kờñ bơtàu tơnguh lơh sa mpồl bơtiàn. Tàm 6 nhai do, khà gơguh lơh sa niam đau geh 5,64% mờ pin dờn là tàm 6 nhai lồi nam 2021, lơh sa Việt Nam dê geh uă tŭ niam nàng bơtàu tơnguh, gơtùi lơh geh jơnau kờñ bơtàu tơnguh lơh sa mờ Đảng, Dà lơgar neh ai tơlik ai nam sơn rờp bơh tơngai lơh broă 5 nam, bơh nam 2021 tus nam 2025 dê. Ồng Đinh Trọng Thịnh đơs: “Jơnau sồr bơh Tổng Bí thư dê bè tam gơl pa bồ tơngoh kơlôi sơnơng, tam gơl jơnau git wă mờ bol he pal lơh geh cồng nha niam ngan rlau jơh tàm tơngai 5 nam bơh nam 2021 tus nam 2025 mờ tus nam 2030, hơ̆ là dùl tàm ală jơnau sồr kuơmàng ngan nàng bol he gơtùi gơs dùl dà lơgar lơh sa mờ măi mok bơtàu tơnguh. Bol hi đơs là, Pơrjum Đảng dà lơgar dơ̆ 3 do geh bơta kuơ dờng màng mờ geh gơtha lơh nền kung là bơnàng jă nàng gơnoar atbồ ală tiah, ală Bộ, mpồl lơh broă, gah broă lơh geh lơh jat niam ngan rlau jơh ală jơnau sồr bơh Bộ Chính trị, bơh Đảng dà lơgar dê kung bè bơh rài lơh sa dê, nàng bol he gơtùi bơtàu tơnguh dùl bă pràn kơldang tàm tơngai tơnơ̆ do”.

Ring bal mờ jơnau đơs do, ồng Cao Tiến Tư, Phó Chủ tịch xã Thuần Mỹ, kơnhoàl Ba Vì, ƀòn dờng Hà Nội kơp kơnờm, tềng đap bơta đơng lam jơh nùs bơh Đảng mờ dà lơgar dê, dà lơgar geh jai pha kòp Covid-19 mờ gơtùi gàr sùm khà gơguh lơh sa: “Bol hi là Đảng viên, bơh ală anih yal jơnau tơnggit git uă ngan jơnau yal, kung bè bơta lơh ngan bơh Đảng, Dà lơgar, Tổng Bí thư ồng Nguyễn Phú Trọng dê đơng lam, ờ mìng sơndră kòp mờ gam bơtàu tơnguh lơh sa, den hơ̆ là dùl tàm ală gùng dà di ngan bơh Đảng, Dà lơgar dê. Bơh hơ̆ gơtùi tơnguh gơnoar broă bơh Việt Nam dê tàm muh mat dunia; tàm tŭ tơngai kòp bơtờp lơh aniai ală lơgar tàm dunia, lơh gơmù lơh sa kơn jơ̆ ngan. Mơya Việt Nam neh gơtùi gàr bè ờs khà gơguh lơh sa niam ngan. Là Đảng viên, añ gŏ là gùng dà di ngan bơh Đảng mờ Dà lơgar dê, bol hi lơh jat mờ chờ hờp ngan là gùng dà do bơh Dà lơgar dê là di mờ nùs nhơm làng bol, là đảng viên tàm kấp hơ đơm den bol hi lơh jat mờ tơnguh nùs nhơm hơ̆”.

Bulah bè hơ̆, bơdìh mờ ală cồng nha lơh geh, tàm jơnau đơs mut pơrjum, Tổng Bí thư ồng Nguyễn Phú Trọng kung đơs tus ală broă gam ờ niam, pal geh broă lơh bơsong tàm tơngai tus. Jat cau jak chài lơh sa ồng Nguyễn Trí Hiếu đơs, bol he ờ gơtùi mìng đơs tus ală bơta niam bơh rài lơh sa dê mờ ờ đơs tus ală jơnau kờñ ờ hềt gơtùi lơh geh nàng jòi gùng dà, broă lơh bơsong. Mờ kung đơs là, nàng pơn jat tai sơndră kòp geh cồng nha mờ bơtàu tơnguh lơh sa den broă tơnguh mhar broă cit sơnơm vaccine rơcang sơndră kòp Covid-19 ai jơh gùt làng bol in là broă jal mhar mờ kuơmàng ngan: “Broă tam gơl niam ală bơta lơh sơnơm sền gàr pràn kơldang să jan jơh gùt làng bol in là bơta lài ngan nàng lơh geh jơnau kờñ bơtàu tơnguh lơh sa mờ sơndră kòp bơtờp nàng rài lơh sa Việt Nam dê pơn jat tai bơtàu tơnguh dùl bă pràn kơldang. Bol he pal pơn jat tai tam gơl thể chế mờ sră nggal lơh broă, tài đơs ngan là ală sră nggal lơh broă bơh Việt Nam dê gam kal ke, rơndap rơndồl, ờ ring bal mờ lơh gơbàn kòl yan ală mpồl lơh sa kă bro in. Den tàng, jat añ bol he pal pơn jat tai tam gơl sră nggal lơh broă nàng lơh bơnàng jă ai bơta bơtàu tơnguh in”.

Tơnơ̆ pơrjum do, Ban Chấp hành Đảng dà lơgar sồr: Mpồl kuang bàng duh broă Đảng Chính phủ pal đơng lam ală anih lơh broă geh gơnoar jal mhar, jơh nùs cih dờp ală jơnau đơs đơng lam bơh Đảng dà lơgar dê nàng lơh sir tai dùl bơnah ală jơnau rơcang cih broă rơndap lơh yal Quốc hội in sền sơwì, lơh nền. Broă rơndap lơh bơtàu tơnguh lơh sa- mpồl bơtiàn pal pơn jat tai geh bơ tơl, lơh loh, lơh gơlik bơta ring bal uă bè ală broă dờng, broă kuơmàng bè: Bơta dipal bơh jơnau kờñ tơrgùm bal, ală jơnau kờñ kuơmàng, ală bơta ring bal dờng bơh rài lơh sa dê mờ 12 kơnòl broă, broă lơh kuơmàng neh ai tơlik. Ală cơ chế, broă lơh nàng lam lơh geh cồng nha 6 kơnòl broă tờm mờ 3 bơta tam gơl kuơmàng neh geh Pơrjum dờng dơ̆ 13 Đảng dê đal git nàng mhar bơsong ală bơta ờ niam gam wơl bơh jŏ bơh rài lơh sa dê, gàr niam kơ̆ kơljap ngai sơlơ kơ̆ kơljap rlau broă lơh sa dờng, tam gơl pa broă lơh gơguh lơh sa, tơnguh cồng nha lơh geh, bơta niam mờ bơta pràn tàm pơrlòng, tam gơl niam broă bơcri priă kă bro, lơh gơlik bơta niam nàng làng bol, mpồl lơh sa kă bro in sơrlèt gan ală kal ke tài bơh kòp Covid-19 lơh gơbàn.

 Cau mblàng K’Duẩn