VOV4.K’ho – Drim òr 5/9, tàm Hà Nội, hìu sơ nơm dà lơgar ling klàng 108 mờ trung tâm ung thư MD Anderson lơgar Mỹ pơgồp bal bơyai lơh pơrjum Khoa học ung thư Việt Nam - Mỹ bnam 2017. Tàm pơrjum, ală cau jak chài bè ung thư bơh lơgar Mỹ dê neh tam pà mờng chài mờ ală bác sỹ Việt Nam bè ală gơguh jak tàm kham tơ moh, sơm kòp ung thư toh, ung thư klờm soh, ung thư gùng lơh lề phan sa, bơta chài reh gùng mhàm mờ xạ trị…

Đơs tàm pơrjum, Thứ trưởng Bộ Khoa học mờ Công Nghệ ồng Trần Quốc Khánh pà git, ung thư là dùl tàm ală kòp geh khà gơbàn ngai sơlơ uă tàm lơgar he. Chính phủ Việt Nam gam tơr gùm ai bơta kơlôi sơnơng khoa học bè ală broă lơh kham tơ moh, sơm kòp mờ rơcang sơndră lài geh cồng nha.