VOV4.K’ho- Poh lài, geh lơh pơrjum nisơna bơh Quôk hội khóa 15 dê jat broă lơh pờ tơlik tơn tàm internet mờ 62 anih pờ tơlik tơn tàm ală càr, ƀòn dờng. Dơ̆ pơrjum nàng kờñ di tŭ sền sơ wì, lơh nền 2, 3 broă dờng, kuơmàng, jal mhar bè lơh sa, mpồl bơtìan, priă jền, kes priă nàng dong kờl di tŭ ai broă lơh rơcang sơndră kòp Kovid-19 mờ broă lơh bơtàu tơnguh wơl, bơtàu tơnguh lơh sa- mpồl bơtìan in.

Tơngume kuơmàng sơn rờp geh ală kwang bàng Quôk hội tơrgùm cribơyai tàm dơ̆ pơrjum nisơna bơh Quôk hội khóa 15 dê hơ̆ là: Sền sơ wì ring bal Nghị quyết bè broă lơh nam priă jền, broă lơh priă jền nàng dong kờl lam lơh broă lơh bơtàu tơnguh wơl mờ bơtàu tơnguh lơh sa mpồl bơtìan. Nghị quyết do geh gơtha dờng màng ngan nàng sơndră mờ kòp Kovid-19, bơsong ală hoàc huơr, bơtàu tơnguh wơl mờ bơtàu tơnguh kơ̆ kơljap lơh sa- mpồl bơtìan. Do kung là tơngume geh cau tĕ khà sền gròi ngan. Cau tĕ khà Nguyễn Văn Huy ơm tàm ƀòn dờng Yên Bái, càr Yên Bái đơs: “ Añ chờ hờp ngan tŭ git pơrjum dơ̆ do bơh Quôk hội dê ring bal uă tơngume kuơmàng, ngan là ală tơngume gơ rềng tus kòp Kovid-19. Là dùl nă cau tĕ khà tàm tiah kơh bơnơm, añ gŏ bơta đơng lam dipal, di tŭ bơh Quôk hội, Cíñ phủ dê tàm broă rơcang sơndră kòp bơ tờp, ngan là broă tam gơl gùng dà rơcang sơndră kòp gơs gơ dờp ờdo ờdă, ngac ngar, gròi sền geh cồng nha kòp Kovid-19. Añ kung kơp kờñ tơngai tus, Quôk hội, Cíñ phủ geh kơ cế sền sơ wì, gròi sền niam rlau tai nàng tŭ lam lơh jat ală Nghị quyết, broă lơh bơsong ală hoàc huơr, bơtàu tơnguh wơl mờ bơtàu tơnguh lơh sa- mpồl bơtìan, bơsong ală broă sền gả ờdo ờdă rài kis mpồl bơtìan.”

Bè bơta jal mhar bơh pơrjum nisơna do dê, Kwang gơnoar cih, Kwang atbồ cơldŭ lơh broă Quôk hội ồng Bùi Văn Cường pà git, nàng pơgồp bơnah bơtàu tơnguh wơl, bơtàu tơnguh lơh sa- mpồl bơtìan, pơrjum nisơna geh lơh nàng kờñ geh ală broă lơh nền di tŭ bè nam priă jền, broă lơh priă jền nàng dong kờl lam lơh broă lơh bơtàu tơnguh wơl mờ bơtàu tơnguh lơh sa- mpồl bơtìan, bơsong ală kòl yan adat boh lam ai bơcri priă bơtàu tơnguh in: “Dơ̆ pơrjum do ngan là jal mhar tài bol he gam kờñ pal geh dùl broă lơh nền gơ rềng tus bơtàu tơnguh wơl mờ bơtàu tơnguh lơh sa. Den tàng bơnah priă jền là kuơmàng ngan nàng bơtàu tơnguh wơl lơh sa. Dilah geh ring bal tàm ală ngai bồ nam 2022 den geh chồl pràn gơguh lơh sa nam 2022- 2023 mờ tus jơh tơngai lơh broă. Hơ̆ là bơta kuơmàng, jal mhar. Dilah lời tus pơrjum nhai 5 den gơ lơyài 5 nhai den hơ̆ sồng gơtùi lơh nền.”

Gùt anih pơrjum tàm hìu lơh broă Quôk hội

Tàm pơrjum do, Quôk hội kung sền sơ wì, ring bal 8 adat geh: Adat tam gơl, bơ tơl 2, 3 bơta bơh Adat bơcri priă dà lơgar, Adat bơcri priă jat broă lơh bal đah dà lơgar mờ cau dùl nă să, Adat bơcri priă, Adat cok khà priă, Adat ồs đèng, Adat mpồl lơh sa kă bro, Adat dia ngui phan kuơmàng mờ Adat lơh jat kơrnuat lơh glài tìs dân sự. Tus bal cribơyai tàm pơrjum do, Mpồl kwang bàng Quôk hội càr Dăk Lăk ring bal uă bè broă tam gơl, bơ tơl 2, 3 bơta bơh 8 adat dê geh lơh gơs kơrnuat boh lam tơl làm ală gùng dà, broă lơh bơh Đảng mờ di tŭ bơsong ală kòl yan, kal ke gơlik geh tàm bơta geh ngan.

Tă pơgồp jơnau đơs bè Adat bơcri priă dà lơgar, ồng Y Vinh Tơr, Kwang atbồ Mpồl kwang bàng Quôk hội càr Dăk Lăk ring bal mờ 3 tơngume pal tam gơl, mơya ồng sồr pal sền gròi rlau tai tus broă tam pà kấp, tam pà gơnap gơ noar mờ kơ nòl broă gơ wèt tus mờ ală rơndap broă geh priă bơcri ODA: “Tơngume gơ rềng tus jơnau hơ pơrgon dunia đah dà lơgar mờ Cíñ phủ Việt Nam mờ gah kĭ jơnau hơ pơrgon là mpồl lơh broă bal dunia, ală tơngume gơ rềng tus broă lơh jat ală tơngume do. Dilah ờ sền sơ wì nền nòn, ờ lơh loh ală kơ nòl bơh Ƀộ, gah broă lơh, ală tiah dê den tàm tŭ lam lơh rơp gơlik geh ală broă lơh tìs. Kuơmàng, gơ rềng tus tơngai lam lơh, cồng nha lơh geh den gơ rềng uă ngan tus bơngă pin dờn bơh Việt Nam dê tàm tŭ tơngai mut gơ rờm bal.”

Sền gròi tus Adat lơh jat Kơrnuat lơh glài tìs dâ sự, mò Nguyễn Thị Thu Nguyệt đơs là, pal lơh loh rlau bè ală kơ cế ala mat: “Tàm bơta 55 den cih, tam gơl wơl mat sơnđan bơta cih adat dê là “ala mat lơh jat kơrnuat lơh glài mờ ala mat bơsong bè jơtài, phan bơna”, tàm do kung ờ hềt lơh loh kơ cế bè bơsong ala mat lơh jat kơrnuat lơh glài mờ kơ cế bè ala mat bơsong jơtài, phan bơna là bơta lơi. Bè hơ̆ dan Cíñ phủ pal geh jơnau cih loh làng rlau bè kơ cế ala mat bơsong jơtàu, phan bơna bè lơi gơ in loh làng.”

Kwang bàng Quôk hội càr Dăk Lăk ai jơnau đơs bè ală tơngume tam gơl, bơ tơl 8 adat

Dùl tơngume kuơmàng ndai geh Quôk hội sền sơ wì, ring bal dơ̆ do là Nghị quyết bè gùng dà bơcri priă rơndap broă lơh gùng rơndeh ntoat rat tiah đah tô- tiah đah jum hờ tiah đah mat tơngai lik tơngai bơh nam 2021 tus nam 2025. Củ tịc Quôk hội ồng Vương Đình Huệ đơs nền, gùng lòt là bơta tờm bơh gah lơh sa dê, pơgồp bơnah lơh niam bơta pràn bơcri, chồl pràn bơtàu tơnguh lơh sa- mpồl bơtìan, sền gàr dà lơgar, sền gàr lơngap lơngai, bơtàu tơnguh rơndap sap sèng phan bơna là kơ nòl kuơmàng. Tàm tơngai tŭ do, bră mhar lam lơh rơndap broă sơlơ geh kuơ ngan ngồn, chồl pràn tă priă bơcri dà lơgar, pơgồp bơnah bơtàu tơnguh wơl mờ bơtàu tơnguh lơh sa.