VOV4.K’ho– Tàm jơnau yal broă lơh tơngai lơh broă khóa 14 bơh Quốc hội dê đơs nền: Tơngai lơh broă do neh lơh geh cồng nha bal mờ ală cồng nha tơl làm tàm ală gah bơh crơng gơs adat boh lam, sền gròi, lơh nền broă kuơmàng bơh dà lơgar dê tus lơh broă mờ lơgar ndai nghị viện. Bơh hơ̆, neh pơgồp bơnah lam dà lơgar kơ̆ kơljap sơrlèt gan kal ke, lơh gơlik ală tam gơl niam, pràn kơldang tàm rài kis lơh sa- mpồl bơtiàn, sền gàr dà lơgar, sền gàr lơngap lơngai, lơh broă mờ lơgar ndai, tam gơl mờ tơnguh niam rài kis làng bol.

Tơngai lơh broă Quốc hội khóa 14 neh chồl pràn mờ tơnguh bơta niam broă lơh crơng gơs adat boh lam, lơh gơlik bơnàng jă adat boh lam ring bal ai bơta bơtaù tơnguh mhar, kơ̆ kơljap bơh dà lơgar dê. Tàm tơngai lơh broă pa do, mờ 72 adat boh lam, 2 kơrnuat boh lam mờ uă nghị quyết pơlam lơh jat jơnau cih adat boh lam geh ring bal neh lơh gơlik bơnàng jă adat boh lam ai broă tam gơl pa, tơnguh cồng nha lơh broă bơh mpồl duh broă dà lơgar dê; tơnguh bơta làng bol tờm mờ gơnoar lơh tờm bơh làng bol; chồl pràn bơtàu tơnguh lơh sa drà kă bro jat gùng dà xã hội chủ nghĩa.

Chủ tịch Quốc hội, mò Nguyễn Thị Kim Ngân pà git, broă lơh sền gròi geh sền dờng màng, tơngume sền gròi geh bơta tờm, tơrgùm jơh ală gah, ngai sơlơ tơnguh cồng nha, lơh geh uă cồng nha kuơmàng, geh cau tĕ khà mờ làng bol đơs niam ngan. Bơh broă lơh sền gròi neh đơs nền bơta dipal bơh broă lơh, adat boh lam, pơn jat tai tơnguh ală broă lơh niam, di tŭ git gŏ bơta ờ niam. Sền gròi tơngume pơn jat tai bơtàu tơnguh, lơh geh cồng nha loh làng mờ 7 tơngume gơ rềng tus bơtàu tơnguh lơh sa- mpồl bơtiàn mờ rài kis bơh làng bol dê; broă bơyai lơh geh tam gơl, ngai sơlơ niam, mờng chài: “Lùp mờ hơ jơnau lùp pơn jat tai geh uă tam gơl pa, ngan là broă lơh “lùp mhar, hơ sơbac” neh lơh gơlik bơta niam nàng tơnguh jơh bal bè khà kuang bàng Quốc hội lùp jơnau, tàm pơndang, jơh bal bè tơngume mờ bơta niam jơnau lùp, jơnau hơ, lơh gơlik bơta duh hồl, gơ hòi gơ jà bơta sền gròi uă ngan bơh kuang bàng Quốc hội, cau tĕ khà mờ làng bol gùt lơgar dê. Broă ai sră pin dờn gơ wèt tus mờ cau at gơnoar broă bơh Quốc hội pồ halà ring bal tơn pồ geh lam lơh nền nòn, pơgồp bơnah pơn jat tai tơngguh bơta làng bol lơh tờm tàm broă lơh bơh anih làng bol pồ dê kung bè tàm rài kis mpồl bơtiàn”.

Cơldŭ Diên Hồng- Hìu lơh broă Quốc hội Việt Nam

Quốc hội khóa 14 neh sền sơ wì, lơh nền uă broă kuơmàng bơh dà lơgar dê, geh gơ rềng uă ngan tus rài kis lơh sa- mpồl bơtiàn, bơtaù tơnguh tiah kơh bơnơm, tiah làng bol jơi bơtiàn kòn cau dùl êt nă cau, gơ jat bal mờ kơnòl broă sền gàr dà lơgar, sền gàr lơngap lơngai, lơh broă mờ lơgar ndai. Quốc hội neh lơh nền gùng dà bơcri priă ală rơndap broă, broă lơh kuơmàng dà lơgar, geh kuơ dờng ngan gơ wèt tus mờ bơta bơtàu tơnguh lơh sa- mpồl bơtiàn bơh dà lơgar dê bè lơh 2, 3 gơl gùng ù gơl ntoat rat tàm gơl gùng tiah đah tô – tiah đah jum dà lơgar tàm tiah đah mat tơngai lik tơngai bơh nam 2017 tus nam 2020; ală rơndap broă dềt bơh rơndap broă lơh ƀlàng rơndeh par dunia Long Thành dê; lơh nền ơm lơh jat gùng dà bơcri priă rơndap broă đèng hạt nhân Ninh Thuận...

Broă lơh kuang bàng geh sền sơ wì, lam lơh nền nòn, di mờ broă rơndap lơh, lơh jat jơnau kờñ ngan ngồn mờ dờp geh bơta ring bal uă. Broă sền sơ wì, lơh nền crơng gơs, tơmut bal, tam gơl nhàr ù tiah mờ rơndap tap sèng ală mpồl hành chính kấp kơnhoàl, kấp xã tàm ală càr, ƀòn dờng gơ wèt dà lơgar neh pơgồp bơnah lam lơh geh cồng nha gùng dà bơh Đảng, Nghị quyết bơh Quốc hội dê bè lơh niam mpồl kuang bàng duh broă, chul chồl bơtàu tơnguh lơh sa- mpồl bơtiàn, sền gàr dà lơgar, sền gàr lơngap lơngai, ờdo ờdă mpồl bơtiàn tàm kấp hơđơm. Ală kuang bàng Quốc hội kung là rơbàng tơrbŏ kuơmàng đah Quốc hội mờ cau tĕ khà bơh broă iat, yal song dơpă bơta kơp kờñ bơh làng bol dê tàm hìu pơrjum kung bè mblàng yal, ai broă dong kờl mờ jơnau cih bơh adat boh lam dê ngui ngan ngồn tàm rài kis. Chủ tịch Quốc hội, mò Nguyễn Thị Kim Ngân đơs nền: “Tơngai lơh broă Quốc hội khóa 14 neh lơh geh cồng nha bal mờ ală cồng nha tơl làm tàm ală gah bơh crơng gơs adat boh lam, sền gròi, lơh nền broă kuơmàng bơh dà lơgar dê tus lơh broă mờ lơgar ndai nghị viện neh pơgồp bơnah lam dà lơgar sơrlèt gan kal ke, lơh gơlika lă tam gơl niam, pràn kơldang tàm rài kis lơh sa- mpồl bơtiàn, sền gàr dà lơgar, sền gàr lơngap lơngai, tam gơl mờ tơnguh niam rài kis làng bol, tă pơgồp uă ngan tàm ală cồng nha dờng màng ngan bơh broă lơh mờr 35 nam tam gơl, lơh niam tai bơhiàn 75 nam pơn iờ să bơh Quốc hội dê”.

Di tŭ do, ala mat Quốc hội, Chủ tịch Quốc hội, mò Nguyễn Thị Kim Ngân ai tơnggŏ bơta git ưn ngài jơh nùs mờ uă ngan rlau jơh tus jơh gùt làng bol mờ cau tĕ khà gùt lơgar neh sùm pin dờn jàu kơnòl dờng màng bơh cau ala mat làng bol dê; bơta pơgồp bal, geh bal kơnòl bơh Chủ tịch lơgar, Chính phủ, Ủy ban Mặt trận dà lơgar Việt Nam, Anih cah rơña làng bol jơnhua ngan rlau jơh dà lơgar, Viện Kiểm sát làng bol jơnhua ngan rlau jơh dà lơgar, ală anih lơh broă, mpồl lơh broă geh gơ rềng kung bè bơta lơh bal, bơta dong kờl bơh gơp bơyô dunia dê.

 Cau mblàng K’Duẩn