VOV4.K’ho – Ngai do, 8/6, pơrjum dơ\ 9, Quốc hội khóa 14 mut tàm broă lơh pơrjum dơ\ 2, pơrjum tơr gùm bal tàm càr lơgar Hà Nội. Do là dơ\ sơn rờp, dùl dơ\ pơrjum Quốc hội geh lơh bal mờ broă lơh pờ tơlik tơn tàm internet mờ pơrjum tơrgùm bal. Sền wơl tơnơ\ 8 ngai pơrjum pờ tơlik tơn tàm internet, Quốc hội neh lơh gơs dơ\ 1 broă lơh pơrjum dơ\ 9, Quốc hội khóa 14. Kềng bơdìh pơrjum Quốc hội, ală kuang bàng đơs nền: Broă bơyai lơh pơrjum pờ tơlik tơn tàm internet là bơta tam gơl pa mờ là bơnàng jă nàng lơh niam wơl broă bơyai lơh ală dơ\ pơrjum tàm tơngai tus.

“Ală dơ\ pơrjum pờ tơlik tơn tàm internet bơh Quốc hội dê lơh geh cồng nha niam ngan, geh tu\ gam [uơn rlau pơn drờm mờ pơrjum tơr gùm bal”, hơ\ là jơnau đơs bal bơh ua\ kuang bàng dê tàm dơ\ 1 bơh pơrjum dơ\ 9, Quốc hội khóa 14 dê jat broă lơh pờ tơlik tơn tàm internet. Kuang bàng Quốc hội Nguyễn Mai Bộ, gơ wèt Mpồl kuang bàng càr An Giang đơs:

“Bơh broă pơrjum pờ tơlik tơn tàm internet den loh làng là bol he sền go\ dùl bơta [uơn dờng ngan, hơ\ là bol he neh git ngui công nghệ. Broă dơ\ 2 là là loh làng là pria\ tă ai broă lòt rê bơh kuang bàng dê in, pria\ tă ai broă kuang bàng sàu sa, ơm rlô tàm hìu nac, pria\ tă ai pria\ rò mờ jun kuang bàng bơh hìu nac tus hìu lơh broă Quốc hội, bơh hìu lơh broă Quốc hội rê wơl hìu nac… Jat a` den ală pria\ tă drơng ală broă in gơmù mờ bơh bơta hơ\ kung ai tơnggo\ kơ nòl bơh Quốc hội dê là bol he tềm pềr kes pria\ nàng ngui tàm jơnau kờ` dờng màng rlau, tàm tu\ kes pria\ he dê ờ huan ua\”.

Bơh hìu pơrjum Diên Hồng, tus 63 mpồl kuang bàng Quốc hội ală càr, [òn dờng gơ wèt dà lơgar, jơh ală broă lơh ai jơnau đơs, cribơyai bơh ală kuang bàng dê ndrờm geh ai tơnggo\ loh làng mờ công nghệ thong tin, den tàng ờ lơh aniai tus cồng nha lơh broă bơh kuang bàng dê. Mò Nguyễn Thị Kim Thúy, Mpồl kuang bàng Quốc hội [òn dờng Đà Nẵng đơs nền, nùs nhơm tàm cribơyai ờ krơi bè pơrjum tơr gùm bal:

“Kuang bàng kung gam yơr [àng cribơyai halà cih mat nàng cribơyai mờ ờ mìng là kuang bàng tàm hìu pơrjum Diên Hồng mờ bal tàm hìu pơrjum kấp hơ đơm dê kung gơtùi cribơyai sơl. A` go\ là bơh ală dơ\ ai jơnau đơs hơ\ den geh ua\ jơnau đơs kung [ươn rlau mờ broă cih mat tàm kấp hơ đơm den kung mhar, geh tu\ geh ua\ dơ\ pơrjum mờ a` go\ là kuang bàng kấp hơ đơm gam cih mat lài mờ kuang bàng tàm kấp dà lơgar. Đơs bal là a` go\ [uơn ngan”.

Ai mò Đỗ Thị Lan, Mpồl kuang bàng Quốc hội càr Quảng Ninh den đơs là:

“Ờ lơh gơmù kung ờ lơh roh gơnoar cribơyai. Tàm kấp hơ đơm den kung gam gơtùi cribơyai sơl, mơya cribơyai mờ nùs nhơm là pal yal dà lơgar in git den kung ờ gơtùi sền gròi dùl dơ\ le\ jơh ală kuang bàng nđờ càr yơr [àng cribơyai, ai jơnau đơs, ờ gơtùi sền go\ jơh. Den tàng broă kờ` cribơyai pal yal dà lơgar in git nàng gơtùi pờ tơlik nàng cribơyai”.

Tàm jơh tu\ tơngai geh lơh dơ\ 1 bơh pơrjum dơ\ 9 dê, ală kuang bàng đơs là, mìng geh 2, 3 bơta kal ke dềt hơ\ là bồ jơ den gùng sơ`io rùp tơn gơtìp ờ niam mờ lơyài. Bulah bè hơ\, bơta do gơtùi lơh niam wơl tàm tơngai tus.

Ua\ jơnau đơs kuang bàng dê đơs nền, dilah Quốc hội pơn jat tai bơyai lơh pơrjum jat broă lơh pờ tơlik tơn tàm internet den dipal ngan, gơtùi tềm pềr kes pria\, lơh gơlik bơta niam nàng ală kuang bàng at gơnoar broă, kươmàng là tàm kấp hơ đơm tàm tu\ jơ lơh broă hành chính pơrjum Quốc hội, bơdìh tu\ jơ pơrjum kung gam gơtùi bơsong broă gơlik geh.

Ồng Vũ Tiến Lộc, mpồl kuang bàng Quốc hội càr Thái Bình đơs nền:

“A` kơp kờ` tàm pơrjum Quốc hội dơ\ tơnơ\ kung pal kờp tus broă ờ ua\ dơ\, ờ ua\ tu\ tơngai gơtùi lơh pơrjum pờ tơlik tơn tàm internet nàng tơrmù [à tu\ tơngai lòt rê, tơrmù [à pria\ tă drơng dơ\ pơrjum in mơya kung gam lơh geh jơnau kờ` mờ geh cồng nha. Bè hơ\ wèt tus gùng dà lơh broă tam gơl pa mơya kung gam pak gàr niam gơ noar, bơta lơh bal đah ală kuang bàng. Tài tàm tu\ pơrjum Quốc hội, ờ mìng geh cribơyai tàm hìu pơrjum mờ ală kuang bàng gam geh bơta gơ rềng lơh broă bal tai. Hơ\ là lơh broă bal đah cau ala mat làng bol mờ anih lơh broă geh gơ noar ală kấp, là bơta kươ gơguh ua\, dong tơnguh pràn jak lơh kơ nòl broă he dê”.

Tổng Thư ký Quốc hội, Chủ nhiệm Văn phòng Quốc hội, ồng Nguyễn Hạnh Phúc đơs ngan: Broă bơyai lơh pơrjum pờ tơlik tơn tàm internet là broă tam gơl pa mờ là bơnàng jă nàng lơh niam wơl broă bơyai lơh ală dơ\ pơrjum tàm tơngai tus:

“Bulah pơrjum pờ tơlik tơn tàm internet mơya kung gam gàr niam tơl broă lam lơh bè tàm hìu lơh broă Quốc hội. Hơ\ là broă pờ tê ring bal kung geh lơh bè ờs. Jơh 63 anih sơ`io rùp tơn pờ tê ring bal mờ ma\i mok ngac ngar mờ pơyua rê hờ anih pơrjum Diên Hồng bơh màn hình sơ`io rùp 1 phuk. Kuang bàng dan ai jơnau đơs kung lơh bè ờs sơl, kung gam cribơyai bè ờs. Bè hơ\ den tàng broă bơyai lơh pơrjum pờ tơlik tơn tàm internet mơya kung gam pal jat jơnau sồr. Do là bơta pa mơkung là bơnàng jă nàng kơ lôi sơ nơng tam gơl broă bơyai lơh pơrjum, nàng tơrmù tu\ tơngai dơ\ pơrjum”.

Mờ bơta rơcang lài wil tơl bơh Văn phòng Quốc hội dê, pơrjum dơ\ 9, Quốc hội khóa 14 dơ\ sơn rờp bơyai lơh pơrjum mờ broă lơh pờ tơlik tơn tàm internet geh cồng nha ngan. Do là broă lơh dipal nàng rề ơnàng ală broă lơh bơh Quốc hội dê bơh broă ngui công nghệ pa. Bơta do dong tềm pềr pria\ tă ngui, tơnguh cồng nha, dong Quốc hội gơtùi pơrjum khat tàm tu\ lơi, tàm khat dùl bơta lơi, tàm ală tu\ kươmàng Quốc hội ai tơlik ală gùng dà bè ală broă dờng màng bơh dà lơgar dê.

Cau mblàng K’Duẩn