VOV.K’ho- Jat Bộ Lao động- Thương binh mờ Xã hội yal, tơnơ̆ dùl nhai lam lơh jat Nghị quyết sồ 68 bơh Chính phủ dê bè 2, 3 broă lơh dong kờl cau lơh broă mờ cau ngui cau lơh broă gơtìp kal ke tài bơh kòp Covid-19 mờ Kơrnuat sồ 23 bơh Thủ tướng Chính phủ dê, khà cau lơh broă neh geh dong kờl tàm gùt lơgar là rlau 13 tơlak nă, mờ kờp jơh priă dong kờl là mờr 6 rbô tơmàn đông.

Mùl màl, ƀòn dờng Hồ Chí Minh neh dờp tă dong kờl tus làng bol, cau lơh broă in 788 tơmàn đông. Bình Dương neh dờp 349 tơmàn đông. Hà Nội dờp 386 tơmàn 800 tơlak đông, Bến Tre dờp rlau 32 tơmàn đông, Hậu Giang dờp 12 tơmàn 300 tơlak đông mờ uă càr, ƀòn dờng ndai ndrờm neh geh dờp khà priă dong kờl bơh Chính phủ dê. Bơta pal chờ hờp là jơh ală tiah neh jơh nùs lơh broă cèng wơl cồng nha mờ sơbac mhar. Bơh hơ̆, gùt lơgar neh geh git nđờ jơt tơlak nă cau geh dờp broă dong kờl, git nđờ tơlak nă cau lơh broă geh dờp bơta dong kờl mờ priă mat.

Cau mblàng K’Duẩn