VOV4.K’ho- Phó Thủ tướng Thường trực Chính phủ ồng Trương Hòa Bình pa geh jơnau đơs pơn dŭt bè dơ̆ pơrjum Mpồl đơng lam Dà lơgar broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030. Phó Thủ tướng jào Ủy ban Dân tộc, Bộ Kế hoạch mờ Đầu tư bal mờ ală bộ, gah lơh broă dà lơgar, ală càr, ƀòn dờng gơrềng bal geh kơnòl pơgồp bal niam, lơh ngan lơh gơs ală kơnòl geh jào nàng gàr niam di tơngai, rơcang lài nàng lơh jăt broă lơh do tơn bơh nhai 10 nam 2021 do. Di tàm dơ̆ do.

                                      Bộ trưởng, Chủ nhiệm Ủy ban Dân tộc ồng Hầu A Lềnh

-Dan chờ gờm ồng neh geh Quốc hội kĭ tơnpồ at gơnoar broă Bộ trưởng, Chủ nhiệm Ủy ban Dân tộc! Ơ ồng, mờ gơnoar bal mờ kơnòl là cau lam bồ anih lơh broă kòn cau, di gơlan ồng kung gam kơlôi uă bè broă pơlam dong kờl Chính phủ nàng pơn jăt tai sền gàr mờ sền gàr niam rơlao ai làng bol kòn cau in?

Ồng Hầu A Lềnh: “Bol añ ai, lài ngan là pơn jăt tai lơh ngan nàng gơjăt bal broă lơh bơh ală rơnàng kuang bàng, đơng lam, kung bè mpồl kuang bàng lơh broă kòn cau tàm 75 nam do, nàng pơn jăt tai bal mờ ală anih lơh broă, gah lơh broă dà lơgar bal mờ ală càr, ƀòn dờng dan mờ Đảng nàng geh ală gùng dà broă lơh kuơ màng ngan, pa mờ lơh geh cồng nha ală gùng dà broă lơh hơ̆. Kuơ màng là Nghị quyết sồ 88 bơh Quốc hội bè kĭ rơndăp broă tơrgùm bal tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tàm tơngai tus do”.

-Ơ Bộ trưởng, bơh mùl màl rài kis mờ broă lơh den ồng kơlôi bè lơi bè bơta niam bal mờ bơta geh nàng tơnguh bơtàu tiah kơh bơnơm, tiah ñhoa?

Ồng Hầu A Lềnh: “Neh rơlao tàm broă bơsram sră, lơh broă mờ tơnguh bơtàu broă lơh tàm tiah làng bol kòn cau, bol añ dờp gŏ là tiah làng bol kòn cau là tiah krơi is ngan. Do là tiah geh uă bơta niam, bơta pràn bè broă lơh sa, bè bơta chài rơgơi mpồl bơtiàn, sền gàr bơta lơngăp lơngai dà lơgar mờ kung là tiah geh bơta niam chài rơgơi kòn cau uă bơta ngan. Ală bơta geh bơta pràn hơ̆ geh Đảng, Dà lơgar ai bơh uă tơngai lơh broă mờ neh geh uă gùng dà broă lơh nàng tơnguh bơta geh, bơta pràn hơ̆ nàng kờñ tơnguh uă rài kis phan bơna bal mờ nùs nhơm ai làng bol in. mơya, bơdìh mờ ală cồng nha neh lơh geh den kung gam uă ngan bơta kal ke. Kuơ màng là bè broă bơ̆t bơtàu broă lơh, broă bơto bơtê mờ bơsram, bơta ngăc ngar tàm broă lơh sa, broă bơyai lơh sa mờ kă bro phan bơh làng bol kòn cau”.

-Jăt ồng, broă lơh tờm lơi di pal tàm tơngai tŭ do nàng ai geh bơta pràn ală tiah gam tàm bơta kal ke in tơnguh bơtàu?

Ồng Hầu A Lềnh: “Bol añ kơkôi là ală broă lơh tờm den lài jơh là he lơh di tàm gùng dà broă lơh bơh Đảng, Dà lơgar. Kuơ màng là Nghị quyết pơrjum dờng Đảng ală cấp. tàm hơ̆ uă ngan là tàm tơngai pa do, tàm Nghị quyết Pơrjum dờng Đảng gùt lơgar dơ̆ 13 neh cih geh ală gùng dà broă lơh kuơ màng mờ loh làng ngan. Chính phủ kung neh lơh mùl màl jơh mờ broă lơh bơh Chính phủ dê. Añ đơs là ală gùng dà broă lơh bơh Đảng, Dà lơgar tŭ do neh geh tơl. Broă gam tai là bơyai lơh jăt ală gùng dà broă lơh hơ̆ den pal geh tơrgùm mờ geh broă tus bal bơh jơh ală mpồl lơh broă chính trị tàm tơngai tus. Hơ̆ là ală broă lơh mùl màl geh cèng wơl rài kis làng bol in geh gơguh rơlao.

-Bộ trưởng neh geh Thủ tướng Chính phủ ồng Phạm Minh Chính jào kơnòl là Phó kuang atbồ Thường trực Mpồl đơng lam Dà lơgar broă lơh jăt jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030, Bộ trưởng rơcang geh jơnau dan lơi mờ Thủ tướng Chính phủ nàng tơlĭk ală cơ chế, broă lơh tờm lơi nàng lơh geh cồng nha broă lơh jăt jơnau kờñ dà lơgar kuơ màng do?

Ồng Hầu A Lềnh: “Tàm tơngu me jơnau yal mờ mpồl duh broă sền nàng gĭt Dà lơugar bè jơnau yal kơlôi sơnơng geh cồng nha, geh yal mờ Thủ tướng Chính phủ tơlĭk kơrnoăt bơcri priă mờ yal mờ Quốc hội tàm pơrjum sơnrờp ngan bơh Quốc hội khoă 15 dê nàng tơlĭk kơrnoăt bơcri priă. Tŭ do, bol añ gam rơcang ală sră nggal gơrềng bal; tàm hơ̆ geh ală khà broă, bơta kờñ, kơrnoăt tam pà priă, ală Thông tư bơto sồr bơyai lơh jăt broă lơh; jơnau bơto sồr càr, ƀòn dờng crơng gơs Mpồl đơng lam, anih pơlam; Mờ kung lơh gơs gùng dà, kơrnoăt lơh broă hơ̆ sồng broă lơh tơngai bơh tŭ do tus nam 2025 bơh Mpồl đơng lam broă lơh jăt jơnau kờñ dê.

Bơdìh hơ̆ tai den Ủy ban Dân tộc pơgồp bal mờ ală Bộ, gah lơh broă dà lơgar, anih lơh broă gơrềng bal nàng bơ̆t bơtàu ală sră nggal, broă lơh cơ chế nàng yal mờ Thủ tướng Chính phủ kĭ tàm tơngai bơh tŭ do tus nhai 9 nam 2021. Mờ broă lơh ngan là tàm nam 2021 do geh lơh gơs jơh ală cơ chế, broă lơh bal mờ Thông tư bơto sồr nàng lơh geh jơnau ndrờm bal bơh Dà lơgar tus tàm ală càr, ƀòn dờng nàng lơh jăt broă lơh do geh cồng nha”.

-Ơi, dan ưn ngài Bộ trưởng!

Cau mblàng Ndong Brawl