VOV4.K’ho- Mho ngai 24/6, Kuang ătbồ Ban Lơh sa dà lơgar ồng Trần Tuấn Anh neh lơh broă mờ Mpồl kuang đơng lam Đảng Bộ Nông nghiệp mờ Phát triển Nông thôn dê bè tơn jơh 10 nam lơh jăt Kơrnoat sồ 19 bơh Ban Chấp hành Đảng dà lơgar khoá XI dê bè pơn jăt tai tam gơl pa gùng dà broă lơh ù tiah tàm tơngai lơh pràn tơl làm broă lơh tam gơl pa, mờ Kơrnoat sồ 26 bơh Ban Chấp hành Đảng dà lơgar khoá X dê bè lơh broă sa sươn sre, cau lơh broă sa mờ ƀòn lơgar.

Ủy viên Bộ Chính Trị ồng Trần Tuấn Anh lơh broă mờ Bộ Nông nghiệp mờ Phát triển Nông thôn

Ồng Trần Tuấn Anh- Kuang ătbồ Ban Lơh sa dà lơgar đơs loh: broă cribơyai tàm dơ̆ lơh broă dong Mpồl đơng lam in bơtơl ală jơnau kơlôi sơnơng, tơngume kuơmàng tàm bàr pe broă lơh Kơrnoat pa bè ù tiah mờ Kơrnoat pa bè lơh broă sa sươn sre, cau lơh broă sa mờ ƀòn lơgar; pờ tơlik ală gùng dà, pơlam gùng, gùng dà broă lơh tàm tŭ tơngai pa, bal mờ jơnau kờñ ai phan kuơ geh is ù tiah, kuơmàng là ù lơh broă sa sươn sre gơ gơs là bơta pràn mờ bơta gơn kơnờm pa dong lơh broă sa sươn sre, lơh sa- mpồl bơtiàn ƀòn lơgar bơh lơgar he dê bơtàu tơnguh mhar mờ kơ̆ kơl jăp jŏ jòng rlau.

Cau mblàng Lơ Mu K’Yến