VOV4.K’ho– Tàm pơrjum Quốc hội pa do, uă kuang bàng Quốc hội đơs là, bal mờ broă lam lơh ală broă lơh sền gròi kòp Covid-19 den pal lam lơh geh cồng nha rlau tai ală broă lơh dong kờl làng bol, cau lơh broă, cau ngui cau lơh broă kong gơ rềng tài bơh kòp bơtờp. Bal mờ hơ̆, ală kuang bàng Quốc hội kung sồr ală Bộ, gah broă lơh dà lơgar pal geh bơta pơgồp bal ring bal tàm broă lơh gơlik mờ tac bro phan bơna ai mpồl lơh sa kă bro mờ cau lơh broă sa in.

Cribơyai ală broă lơh rơcang sơndră kòp Covid-19, uă kuang bàng Quốc hội đơs là, gùng dà broă lơh kràñ cê, jơh nùs rơcang sơndră kòp bơtờp mơya bañ ngui ală broă lơh kră kơldang ir. Mùl màl tàm tơngai lài, geh ală tiah ngui ală broă lơh rơcang sơndră kòp kră kơldang ir, lơh gơbàn lal ke ai làng bol, cau lơh broă mờ mpồl lơh sa kă bro in tàm broă pơndiang phan bơna, lơh broă tac phan bơna đah ală tiah gơtìp kal ke, geh tŭ là gơtìp ơm ờ gơtùi lơh tơn.

Jat ồng Phan Đức Hiếu, Mpồl kuang bàng Quốc hội càr Thái Bình đơs, pal geh bơta sơlơ tơnguh rlau tai, pơgồp bal đah ală tiah, tàm broă rơcang sơndră kòp jat gùng dà tàm dờn dờp bal mờ gơp mờ yal loh làng jơnau tơnggit, nàng lơh gơlik ală gùng ai lòt tàm broă pơndiang, tac bro phan bơna đah ală tiah: “Tàm tŭ tơngai tŭ do den kòp bơtờp gơlik geh tàm ală tiah krơi is ngan mờ ală broă lơh rơcang sơndră kòp kung krơi ngan sơl. Tàm dùl bơta lơi hơ̆ den do là ală broă lơh kuơmàng pal geh, mơya dilah bơta krơi is đah ală broă lơh rơcang sơndră kòp lơh gơbàn kòl yan tus broă pơndiang, tac bro phan bơna mờ broă lơh kòn bơnus dê. Jat jơnau yal añ geh git tŭ do tàm ală gơl gùng dờng den kung gam gơlik geh bơta kòl yan bè phan bơna den tàng bơta pơgồp bal đah ală tiah tàm bơta bè do là tơrmù lơyah ngan rlau jơh ală bơta pal geh, broă lơh krơi is ờ duh pal geh den lơh gơlik bơta tơnguh pơndiang, tac bro phan bơna”.

Mblàng lơh loh bè ală broă lơh nàng pơndiang, tac bro phan bơna đah ală tiah, Bộ trưởng Bộ Công thương ồng Nguyễn Hồng Diên pà git, tơngai sơn rờp sơndră kòp Covid-19, ală tiah kung gam rơ mơp dơl, kwi kuơ lơh gơbàn tus broă tac phan bơna pal geh làng bol in gơtìp kal ke, ờ tơl phan bơna uă tài bơh kòl yan tàm broă tac phan, pơndiang phan. Ală bơta ờ niam do neh geh ală anih lơh broă atbồ sền sơ wì mờ tơrgùm ală broă lơh nàng bơsong: “Bộ Công thương sồr gah lơh sa suơn sre chồl pràn lơh gơlik ală bơta phan sa, ngan là phan sa ris, biap, kơnuh, plai đo tàm tiah geh kòp mờ ală tiah ndai kung bè gùt lơgar nàng rơcang tac phan. Ală gah Giao thông, kuang àng, lơh sơnơm, gơnoar atbồ ală tiah, ngan là ală tiah geh kòp lơh jat nền nòn jơnau đơng lam bơh Chính phủ, Thủ tướng Chính phủ dê ờ ai tơlik ală bơta pal geh ndai mờ ngui dùl bă kră kơldang ală jơnau sồr. Ală càr, ƀòn dờng tàm tiah geh kòp pal pơn jat tai kờp sền, jal mhar dong kờl ală mpồl lơh sa kă bro tac phan bơna ngui sa pal geh pah ngai nàng gơtùi prap rơcang gàr lài phan ngui sa pal geh pah ngai tàm ù tiah he dê bơh 10 tus 15 ngai ndrờm mờ tŭ tơngai ơm yah ngài, mơkung bơsong kràñ cê broă tac phan tàm siêu thị, drà ờs mờng mờ drà drơng rài kis làng bol, hơ̆ sồng ală drà bơh sơn rờp tai, bơtàu tơnguh ală bơta broă kă bro bè tac phan làm bă tiah, tac phan tàm điện tử bơh ngài”.

Uă kuang bàng Quốc hội kung đơs là, bal mờ lam lơh ală broă lơh sền gròi kòp bơtờp den pal lam lơh geh cồng nha rlau tai ală broă lơh dong kờl làng bol, cau lơh broă, cau ngui cau lơh broă kong gơ rềng tài bơh kòp Covid-19. Tŭ kòn bơnus là anih tờm den geh lơh gơlik ală bơta pràn, bơta niam pa nàng sền gròi mờ kơryan kòp. Tŭ do, Chính phủ neh geh uă broă lơh dong kờl bè: tơrmù priă ngui đèng, priă ngui dà, tơn jŏ tơngai tơm priă gơguh uă, tơrmù 2, 3 bơnah priă tă, dong kờl jal mhar làng bol, cau lơh broă mờ cau ngui cau lơh broă. Mò Vũ Thị Lưu Mai, Mpồl kuang bàng ƀòn dờng Hà Nội đơs là, broă Chính phủ lam lơh sơbac mhar ală bơnah dong kờl jal mhar jat nùs nhơm niam ngan, lơh gơlik tơl bơta ƀuơn ai cau geh dờp broă dong kờl in mơya pal di cau, ờ di lơh nggồr nggàc, ờ gŏ di lam lơh ờ ngan ngồn, mờ kung pal sền sơ wì broă ngui broă lơh sền sơ wì tơnơ̆: “Tài tŭ do tàm bơta geh ngan den gơ wèt mờ 2, 3 gah bè dia, hải quan den bol he ngui broă lơh sền sơ wì tơnơ̆. Dilah yal ờ di den gơtìp ai wơl, tă tơm mơya gơ wèt mờ bơnah dong kờl den krơi mờ bol he sền sơ wì bơta dipal. Tài tŭ yal den làng bol mìng git tong sră nggal mờ broă đal git bơta dipal, hơ̆ là kơnòl atbồ dà lơgar bơh anih geh gơnoar dê tàm broă lam lơh kơnòl. Tŭ neh tă priă dong kờl làng bol in den ngan là neh dờp bơta dipal. Bơdìh hơ̆ tai den broă lơh dong kờl là ai tơnggŏ bơta niam chài dờng màng là rùp hin bơh Chính phủ dê, dong kờl nàng bal mờ làng bol lòt gan kal ke. Den tàng, broă lam lơh kung pal cèng bơta niam chài sơl”.

Nàng lơh jat Nghị quyết sồ 30 bơh Quốc hội khóa 15 dê, pa do Chính phủ neh ai tơlik Nghị quyết sồ 86 bè ală broă lơh jal mhar rơcang sơndră kòp Covid-19. Broă lơh do geh sền là pờ gùng, lơh gơlik bơta ƀuơn ai ală bộ, gah broă lơh, ală tiah in rơcang lài ală broă lơh sơndră kòp. Bơta kuơmàng rlau tai tàm Nghị quyết là Chính phủ neh geh gùng dà sơndră kòp pal ngan ngồn, lơh jat bơta geh ngan mờ lơh geh cồng nha là lài ngan rlau jơh. Uă jơnau đơs đơs là do là gùng dà di ngan mờ niam ngan.

 Cau mblàng K’Duẩn