VOV4.K’ho– Ờ hềt tus 1 nhai tai geh lơh pơrjum dơ̆ 1 bơh Quốc hội khóa 15 dê. Ờ mìng pồ tơl mpồl kuang bàng, pơrjum do gam sền sơ wì 2, 3 tongume kuơmàng ndai, Den tàng, Chủ tịch Quốc hội ồng Vương Đình Huệ sồr pơn jat tai tam gơl pơrjum dơ̆ 1 bơh Quốc hội khóa 15 dê jat gùng dà tơrmù ƀà tŭ jơ sền ală jơnau yal, tơnguh tŭ jơ sền jơnau yal sền sơ wì dipal, nàng ală kuang bàng Quốc hội geh tŭ tơngai sền sơ wì mờ ai jơnau đơs.

Jat kờp dŭ, pơrjum dơ̆ 1 Quốc hội khóa 15 geh lơh broă tàm 11 ngai mờ nggùl. Jat hơ̆, Quốc hội lời 5 ngai ai broă lơh kuang bàng, lời 4 ngai mờ nggùl nàng sền sơ wì ală jơnau yal mờ 2, 3 tơngume kuơmàng ndai mờ dùl ƀùi lời ai broă lơh rơcang lài in; gam wơl là tŭ tơngai mut pơrjum, tơn jơh pơrjum mờ 1 ƀùi rơcang lài digơlan pal geh tai tŭ tơngai.

Tàm dơ̆ pơrjum, ală kuang geh jơng Ủy ban Thường vụ Quốc hội ring bal dơ̆ mut pơrjum dơ̆ 1, Quốc hội khóa 15 geh lơh tàm ngai 20/7 tus do, mờ kơrnuat bơceh lơh broă pơrjum broă lơh kuang bàng lài mờ cribơyai ală broă krơi is. Do là pơrjum dơ̆ sơn rờp mờ broă uă ngan là pồ tơl kuang bàng pal pơrjum tơn. Tàm hơ̆, geh mờr 500 nă kuang bàng mờ gal ngan kuang bàng cau lơh broă drơng broă Quốc hội, cau cih ƀău. Den tàng, ală kuang geh jơng Ủy ban sồr: Pal rơcang lài ai broă lơh rơcang sơndră kòp Covid-19 in dùl bă nền nòn. Tàm hơ̆, bơyai lơh cit sơnơm vaccine rơcang sơndră kòp Covid-19 gờñ ai ală kuang bàng mờ mpồl cau drơng broă in... sền sơ wì êt ngan rlau jơh 2 dơ̆ lài mờ tŭ mut tàm dơ̆ pơrjum. Bơdìh hơ̆ tai, sồr ală kuang bàng Quốc hội bañ tìp mat, ơm rềp pah dơ̆ pơrjum, tài neh jơh cit sơnơm vaccine kung digơlan gam bơtờp kòp. Den tàng, pal kơrhia ngan rlau jơh tŭ tus bal pơrjum dơ̆ 1, Quốc hội khóa 15. Bè tơngai geh lơh pơrjum dơ̆ 1, Quốc hội khóa 15, Chủ tịch Quốc hội ồng Vương Đình Huệ đơs: “Kờp jơh tŭ tơngai pal sền sơ wì wơl nàng lơh nền. Tàm pơrjum dơ̆ 1, Quốc hội 14, 10 ngai mìng lơh jơh broă lơh kuang bàng mờ bơ tơl tai bơnah broă yal bè broă lơh sa mpồl bơtiàn, priă jền, kes priă 6 nhai là jơh. Ai dơ̆ pơrjum do bol he geh uă tơngume kuơmàng ndai, bơta do sồr bol he pal kờp dŭ nền nòn, dơ̆ do bol he pal ai tơlik tai broă rơndap lơh 5 nam, geh broă rơndap lơh bơtàu tơnguh lơh sa mpồl bơtiàn 5 nam, sền sơ wì 5 nam lài, mờ yal nàng Quốc hội in sền sơ wì lơh nền broă rơndap lơh bơtàu tơnguh lơh sa mpồl bơtiàn 5 nam tơngai bơh nam 2021 tus nam 2025 mờ broă rơndap lơh priă jền 5 nam. Kờp dŭ nền nòn, ờ gơtùi ai bơh tàm khóa lài nàng lơh kơn jơ̆ tàm khóa do”.

Chủ tịch Quốc hội ồng Vương Đình Huệ kung sồr pal pơn jat tai tam gơl pơrjum dơ̆ 1, Quốc hội khóa 15 dê jat gùng dà tơrmù ƀà tŭ tơngai ală jơnau yal, tơnguh tŭ jơ sền jơnau yal sền sơ wì dipal, nàng ală kuang bàng Quốc hội geh tŭ tơngai sền sơ wì mờ ai jơnau đơs.

Chủ tịch Quốc hội ồng Vương Đình Huệ đơng lam broă rơcang tus pơrjum dơ̆ 1, Quốc hội khóa 15

Bè tơngume dơ̆ pơrjum, bal mờ broă lơh kuang bàng, tàm dơ̆ pơrjum do, Quốc hội sền sơ wì ală jơnau yal bè sền cồng nha lam lơh broă rơndap lơh bơtàu tơnguh lơh sa- mpồl bơtiàn, kes priă dà lơgar 6 nhai bồ nam mờ ală broă lơh lam lơh broă rơndap lơh bơtàu tơnguh lơh sa- mpồl bơtiàn, kes priă dà lơgar 6 nhai lồi nam 2021; ring bal kờp dŭ tă dơ̆ ngui kes priă dà lơgar nam 2019; sền sơ wì, ring bal ală Nghị quyết bơh Quốc hội dê bè broă lơh bơt bơtàu adat boh lam, kơrnuat boh lam nam 2022, broă rơndap ngui ù tiah dà lơgar tơngai bơh nam 2021 tus nam 2030 mờ broă rơndap lơh ngui ù dà lơgar tơngai bơh nam 2021 tus nam 2025.

Tàm pơrjum dơ̆ 57, Ủy ban Thường vụ Quốc hội pa do, ală kuang geh jơng kung ai jơnau đơs bè kờp dŭ broă lơh sền gròi bơh Quốc hội, Ủy ban Thường vụ Quốc hội nam 2022. Jat hơ̆, ală kuang geh jơng Ủy ban Thường vụ Quốc hội ring bal broă lơh sền gròi bơh Quốc hội mờ Ủy ban Thường vụ Quốc hội dê nam 2022 bơh Cau gơnoar cih Quốc hội ai tơlik mờ đơs là tơngume sền gròi dipal, lơh jat jơnau sồr bè broă lơh sền gròi, kơrnuat drơng broă sền gròi gơ jat bal mờ ală broă gơlik geh geh kuang bàng, cau tĕ khà sền gròi. Ală kuang geh jơng Ủy ban Thường vụ Quốc hội ring bal rơ wah 4 tàm 6 tơngume sền gròi yal Quốc hội mờ Ủy ban Thường vụ Quốc hội in. Đơs tàm dơ̆ pơrjum, Phó Chủ tịch Quốc hội ồng Đỗ Bá Tỵ đơs nền: “Bal mờ broă lơh sền gròi bal bơh Quốc hội dê, sồr Hội đồng Dân tộc mờ ală ủy ban jơh nùs lam lơh ală broă lơh mblàng lơh loh, ală tơngume, ală broă ờ suk geh sền gròi uă, pal lơh loh kơnòl bơh ală mpồl cau, cau dùl nă să dê, kơlôi sơnơng nàng bơyai lơh ală dơ̆ mblàng lơh loh, pơn jat tai tam gơl pa, ai ală mpồl sền gròi pơgồp bal mờ broă lơh sền gròi, sơlơ tơnguh cồng nha lùp mờ hơ jơnau lùp bơh Ủy ban Thường vụ Quốc hội dê”.

Tài tơngai bơh tŭ do tus ngai mut pơrjum ờ gam uă, tàm tŭ gam uă ngan broă pal bơyai lơh, den tàng, Chủ tịch Quốc hội sồr ală anih lơh broă geh gơ rềng rơcang lài pơgồp bal kờp sền, jơh nùs rơcang ală tơngume gơ wèt kơnòl he dê, gàr bơta niam, mhar pơyua sră nggal tus ală kuang bàng Quốc hội. Jat Chủ tịch Quốc hội ồng Vương Đình Huệ đơs, tơnơ̆ pơrjum dơ̆ 57, Ủy ban Thường vụ Quốc hội mìng pơrjum dùl dơ̆ tai nàng sền sơ wì ală tơngume gam wơl geh yal Quốc hội in tàm pơrjum dơ̆ 1, tàm hơ̆ geh ală tơngume kuơmàng gơ rềng tus broă rơndap lơhbơtàu tơnguh lơh sa mpồl bơtiàn, broă rơndap lơh priă jền, kes priă, broă rơndap lơh bơcri priă dà lơgar di mơ tơngai 5 nam... Chủ tịch Quốc hội sồr Chính phủ mhar pơyua sră nggal ngan ngồn bơh ală tơngume gơ rềng tus ală anih lơh broă bơh Quốc hội dê nàng lam lơh sền sơ wì wơl.

 Cau mblàng K’Duẩn