VOV4.K’ho- Tàm ală nam do, mpồl ling phàu crong càr Lâm Đồng neh lơh ngan tus bal bơt bơtàu ƀòn lơgar pa. Kuơ màng, ală mpồl ling klàng neh sùm lòt bal mờ làng bol jơi bơtiàn kòn cau tàm tiah sar lơgar ngài; bơto pơlam làng bol lơh sa geh cồng nha, mơkung tus bal lơh broă, bơt bơtàu ală broă lơh ƀòn lơgar pa. Bơh hơ̆ nùs nhơm ling klàng – làng bol sơlơ rềp mềr; lơh niam rlau tai rùp să “Cau ling Wa Hồ” tàm rài kis làng bol dê.

Đại tá Nguyễn Văn Sơn - Phó Chính ủy Gah đơng lam ling klàng càr Lâm Đồng pà gĭt, tàm ală nam do, mpồl ling phàu crong càr dê sùm lơh jat niam srơh “Ling klàng sơm bat tê bal bơt bơtàu ƀòn lơgar pa”. Ngan là, sền gròi ngan, bơcri priă lơh tàm tiah làng bol jơi bơtiàn kòn cau.

Ngan là, bơh nam 2015 tus tŭ do, Gah đơng lam ling klàng càr Lâm Đồng neh hòi jà tă pơgồp bal priă bơcri gĭt nđờ tơmàn đong nàng lơh gùng che ồs đèng, gùng lòt, hìu bơsram, hìu sơnơm, rƀòng dà tàm ƀlàng sre...; hòi jà rlau 15 rơbô 300 ngai lơh broă tàm hơ̆ geh ală mpồl ling klàng, ling griăp ƀòn, rcang lài cau bơh ală anih lơh broă, mpồl ling tàm Mpồl ling phàu crong. Dong kờl làng bol tàm ù tiah kơnhoàl Dam Rong, kơnhoàl Lâm Hà bè tờm chi, sơn tìl phan ròng, phan bơna, măy mok lơh sa mờ lơh gơlik phan. Bơh hơ̆, dong kờl làng bol tàm 11 xã bơtàu tơnguh lơh sa suơn sre, tơnguh uă priă lơh geh bơh phan lơh sa dê, tơnguh priă lơh geh, kờp dŭ priă lơh geh bơh broă lơh sa geh pơgap 5 tơmàn 200 tơlak đong. Neh geh pơgap 2 rơbô hìu bơnhă rƀah, tàm hơ̆ geh hìu bơnhă rƀah làng bol jơi bơtiàn kòn cau neh dờp geh ală broă lơh dong kờl bơh broă lơh bơt bơtàu ƀòn lơgar pa.

Mpồl ling phàu crong càr Lâm Đồng tus bal lơh gùng lòt bơt bơtàu ƀòn lơgar pa tàm tiah làng bol jơi bơtiàn kòn cau

Tàm 5 nam pa do, Gah đơng lam ling klàng càr dê neh bơt bơtàu mờ jàu pà 85 hìu nùs nhơm, hìu bơta kờñ gơboh bal ai ală hìu bơnhă chính sách mờ cau geh màng mờ dà lơgar in. Khà dong kờl kờp bal pơgap 80 tơlak đong dùl nơm hìu. Bơdìh hơ̆, Mpồl ling phàu crong càr dê neh pơgồp bal mờ ală gah sơnah lơh broă, ală mpồl lơh broă lơh jat broă lơh sền gròi pràn kơl dang să jan ai làng bol in, ngan là ai làng bol tàm tiah kal ke, tiah sar lơgar ngài, tiah làng bol jơi bơtiàn kòn cau tàm càr. Bè, neh bơyai lơh kham sơm kòp, pà sơnơm ờ sa priă ai làng bol in mờ pơgap 15 rơbô 500 nă cau mờ kờp jơh khà priă rlau 360 tơlak đong.

Kra ƀòn Kră Jăn Ha Siêng – Sơnah ƀòn Đăng Gia Rít B, thị trấn Lạc Dương, kơnhoàl Lạc Dương, càr Lâm Đồng đơs: Gùng dà broă lơh bơt bơtàu ƀòn lơgar pa bơh Đảng, Dà lơgar dê là di pal ngan, tàm hơ̆ geh bơta sơm bat tê bal, tă pơgồp bal dà kơl hề, bơta dong kờl dờng màng bơh mpồl ling klàng làng bol Việt Nam dê. Ală bi tàm mpồl ling klàng tàm kơnhoàl, càr dê neh bal mờ ală Kuang bàng, viên chức, cau lơh broă dong kờl làng bol jơi bơtiàn kòn cau bol añ lơh gùng lòt, ngai sơlơ lơh kloh niam rlau tai, hìu bơsram geh bơcri priă lơh dờng niam, hìu pơrjum thôn geh lơh niam, ai tơl bơta ƀuơn ai làng bol in geh tiah pơrjum mpồl bơtiàn geh kuơ ngan. Bơh hơ̆, pơgồp bơnah tam gơl muh mat ƀòn lơgar pa tàm sơnah ƀòn bol añ dê ngai sơlơ tam gơl pa, sơlơ niam rlau tai.

Dùl kơnòl broă kuơ màng tàm broă sơm bat tê bal bơt bơtàu ƀòn lơgar pa tàm tiah làng bol jơi bơtiàn kòn cau, hơ̆ là dong kờl làng bol tàm broă lơh sa suơn sre. Mpồl ling phàu crong neh pơgồp bal mờ ală gah, sơnah lơh broă sa suơn sre, ală kơnhoàl, ƀòn dờng tàm càr, ală mpồl lơh broă chính trị- mpồl bơtiàn lơh broă lơh mblàng yal mờ bơto pơlam bơta chài tam phan ai làng bol jơi bơtiàn kòn cau in. Ală broă lơh dong kờl geh lam lơh bè bơta chài lơh kòi sre, broă sơng ka sền gàr tờm chi sa plai, phan tam lyah ngai, dong kờl lơh geh 12 broă lơh tam, sơng ka sền gàr tờm kơphê, broă lơh phơng vi sinh... Pơgồp bal mờ Anih tờm bơto pơlam lơh sa suơn sre, Anih tờm lơh sa suơn sre ală kơnhoàl, Kuang bàng jak chài lơh sa suơn sre tàm ală xã mờ ală mpồl lơh broă ndai lơh jat broă pờ geh 11 ơdŭ tàm jàu khoa học kỹ thuật, 5 broă lơh mắc ca bơtàu tơnguh lơh sa... ; bơh hơ̆, dong pờ geh gùng dà lơh sa, dong sơlơ bơtàu tơnguh lơh sa, tơnguh bơta gĭt wă, tơnguh priă lơh geh, tơnguh uă rài kis ai làng bol in, ngan là làng bol jơi bơtiàn kòn cau.

Dùl kơnòl broă kuơ màng ngan rlau jơh tàm broă sơm bat tê bal bơ̆t bơtàu ƀòn lơgar pa mờ Mpồl ling phàu crong càr dê neh lơh ngan lơh sir mờ lơh geh tềl tơngŏ uă ngan rlau jơh tàm nùs nhơm làng bol dê hơ̆ là dong broă lơh sền gàr tơl niam rài kis mpồl bơtiàn, tơn jơh bơta ờ gĭt sền sră. Ngan ngồn, Mpồl lơh sa Gah sền gàr dà lơgar tiah đah Tô càr Lâm Đồng dê neh dong kờl phan bơna ai ală hìu bơsram mẫu giáo tàm ù tiah 11 xã gơwèt tiah mpồl ling drơng broă mờ kờp jơh khà priă rlau 2 tơmàn 700 tơlak đong. Bơyai lơh pờ, bơto bơtê akhar mờ lơh sir broă lơh bơto bơtê tơn jơh bơta ờ gĭt sền sră bơh làng bol jơi bơtiàn kòn cau in, tơl ơdŭ kờp bal geh bơh 25 tus 30 nă cau bơsram tàm thôn Păng Pá, kơnhoàl Dam Rong, thôn Tân Hợp, xã Tân Thanh, kơnhoàl Lâm Hà, dong rlau 420 nă làng bol jơi bơtiàn kòn cau neh gĭt sền sră mờ gĭt cih. Bơdìh mờ hơ̆, gam bơyai lơh gĭt nđờ jơ̆t dơ̆ mblàng yal ai làng bol in bè lơh jat rài kis niam chài rơgơi, ơm kloh niam, sa sào sàng goh...

Ală cồng nha kuơ màng do pà gŏ, gơnoar bơh Mpồl ling phàu crong càr Lâm Đồng dê tàm broă tus bal bơt bơtàu ƀòn lơgar pa tàm tiah làng bol jơi bơtiàn kòn cau là pal cih dờp ngan. Bơh hơ̆, pơgồp bơnah tàm cồng nha bal bơh càr Lâm Đồng dê tàm broă bơt bơtàu ƀòn lơgar pa- tiah drà ngăc ngar. Muh mat ƀòn lơgar, ngan là tiah làng bol jơi bơtiàn kòn cau neh geh uă bơta niam, uă bơta tam gơl pa, pơgồp bơnah lơh niam tai rùp să “Cau ling wa Hồ” tàm nùs nhơm làng bol dê.

Quốc Học jat băo Lâm Đồng- Cau mblàng K’Hạnh