VOV4.K’ho- Dơ̆ tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp tơngai lơh broă bơh 2021- 2026 geh lơh tàm ngai 23/5, là broă lơh chính trị kuơmàng bơh dà lơgar dê, geh bơyai lơh tơnơ̆ dơ̆ bơyai lơh geh cồng nha Pơrjum dờng cau ala măt gùt lơgar dơ̆ XIII bơh Đảng dê. Broă săc rwah kuang bàng là cau jơi bơtiàn kòn cau dùl êt nă cau lơh broă tàm Quốc hội mờ Hội đồng Nhân dân ală kấp geh gơnoar broă mờ bơta kuơ dờng màng ngan tàm ală anih lơh broă chính trị ală kấp dê đơs bal mờ anih lơh broă làng bol dê pồ đơs is. Tàm ală broă lơh pơrjum cribơyai bơh Mặt trận dà lơgar ală kấp dê sac rwah cau tơlik măt tĕ khà là cau jơi bơtiàn kòn cau dùl êt nă cau nàng tơlik măt tĕ khà kuang bàng Quốc hội mờ kuang bàng Hội đồng Nhân dân ală kấp pal geh ală broă jàu krơi is mơya kung bañ àñ ơnòng uă ir broă jàu ai dùl nă kuang bàng in.

Jăt ồng Nguyễn Lâm Thành- Phó Kuang ătbồ Mpồl duh broă jơi bơtiàn kòn cau Quốc hội dê đơs, broă sền dờng màng gơnoar tĕ khà, tơlik măt tĕ khà bơh làng bol jơi bơtiàn kòn cau dùl êt nă cau dê tàm tĕ khà pồ kuang bàng Quốc hội mờ anih lơh broă làng bol pồ tàm ală tiah dê sùm geh ală kấp sền gròi, bơto pơlam. Nàng lơh bè lơi, ngui niam geh bơta pràn bơl tơl nă cau tơlik măt tĕ khà dê là cau jơi bơtiàn kòn cau tàm ƀòn lơgar khi dê gam ơm kis tơn. Tài bơh ờ gŏ geh cau lơi gĭt wă geh tiah kơh bơnơm, tiah nhàr lơgar rlau mờ ală cau gam mờ neh pah ngai pah tŭ ơm bal, sa bal, lơh broă bal mờ làng bol. Ồng Nguyễn Lâm Thành, đơs: Ală cau tơlik măt tĕ khà do gĭt wă loh ngan bè ală bơta geh is, ală bơta is rơmis mờ khi ơm kis mơkung là kơnhoàl ù tiah bơh cau tĕ khà là cau jơi bơtiàn kòn cau dùl êt nă cau dê. Dơ̆ bàr tai là gĭt wă geh adat bơhiàn bơh yau, ală bơta kơlôi sơnơng bơta kơ̆p kờñ, hơ̆ ndrờm là ală bơta mờ cau tĕ khà gam sền gròi. Bơta tai là dùl dà đơs bal, jơnau đơs bal mờ tàm bơta gĭt gơ̆p mpồl bơtiàn, gĭt gơp jơi nòi, pròc mhàm bal. Hơ̆ là bơta pràn bơh cau tơlik măt tĕ khà là cau jơi bơtiàn kòn cau dùl êt nă cau dê.

Tŭ do, broă lơh rơcăng tĕ khà pồ kuang bàng Quốc hội khoá XV mờ kuang bàng Hội đồng Nhân dân ală kấp, tơngai lơh broă bơh nam 2021- 2026 tàm tiah làng bol jơi bơtiàn kòn cau dùl êt nă cau, jăt Mpồl duh broă jơi bơtiàn kòn cau Quốc hội dê đơs neh lơh jăt niam, di jơnau ai bơh kơrnoat boh lam dê. Mơya, tài bơh uă jơnau krơi is geh bal bơta ờ rơcăng mờ bơta ờ gơtùi gĭt lài, bơta jak mpồl lơh broă tiah jơi bơtiàn kòn cau dùl êt nă cau gam ờ hềt uă. Khà cau jơh bơsram đại học, cao đẳng mờ kuơmàng là bơsram dờng rlau mờ đại học geh khà dùl êt ngan tàm rơndăp khà kờp làng bol. Broă lơh mblàng yal tàm tiah làng bol jơi bơtiàn kòn cau dùl êt nă cau mờ tiah kơh bơnơm geh bơta kal ke krơi is, bơta gĭt wă bơh làng bol dê ờ hềt jak chài ngan, adat bơhiàn gam kơn jơ̆ ir. Den tàng bè hơ̆, ală tiah pal sơlơ mblàng yal, bơto yal, bơto pơlam ai làng bol in gĭt wă nền nòn bè gơnoar tĕ khà mờ tơlik măt tĕ khà bơh he dê. Sền dờng màng broă lơh bơto pơlam, bơto bơtơl bơta gĭt wă, bơta chài hòi jà tàm pơrlòng tĕ khà ai ală cau tơlik măt tĕ khà in kung bè sơlơ tơnguh tai broă lơh yal tơngĭt jơnau, mblàng yal tàm tiah jơi bơtiàn kòn cau dùl êt nă cau in.

Kuơmàng, ală kấp ủy Đảng, gơnoar ătbồ, Mpồl duh broă tĕ khà ală kấp pal bơyai lơh mblàng yal, bơto yal gơnoar mờ kơnòl bơh cau tĕ khà dê tàm tĕ khà. Sền dờng màng mblàng yal mờ dà jơi bơtiàn kòn cau dùl êt nă cau, bơyai lơh cribơyai bè jơnau sồr rơndăp tăp sèng, bơnah cau; bè rài kis ală cau tơlik măt tĕ khà kuang bàng Quốc hội mờ kuang bàng Hội đồng Nhân dân ală kấp dê nàng lơh bè lơi làng bol gŏ geh broă niam ngan tus bal tàm broă lơh tĕ khà hơ̆ ngan là gơnoar kuơ bơh làng bol dê. Hơ̆ là pồ geh ală cau ala măt ai làng bol in nàng tus bal lơh, sồr lơh, gròi sền broă lơh jăt gùng dà broă lơh kơrnoat boh lam, ngan là gùng dà broă lơh gơrềng tus tiah làng bol jơi bơtiàn kòn cau dùl êt nă cau, tiah kơh bơnơm.

Jăt ồng Ma Công Khâm, Bí thư Đảng ủy, Chủ tịch Ủy ban Nhân dân xã Thượng Lâm, kơnhoàl Lâm Bình, càr Tuyên Quang dê yal, tàm xã Thượng Lâm, bal mờ rlau 90% khà kờp làng bol là làng bol jơi bơtiàn kòn cau dùl êt nă cau, broă lơh tĕ khà, tơlik măt tĕ khà bơh làng bol dê tàm xã sùm geh làng bol sền gròi gĭt loh. Bal mờ hơ̆, xã kung sền dờng màng rlau tus gơnoar tĕ khà, tơlik măt tĕ khà bơh ală cau tơlik măt tĕ khà là cau jơi bơtiàn kòn cau dùl êt nă cau dê nàng broă lơh tĕ khà geh lơh ƀươn mờ geh cồng nha. Ồng Ma Công Khâm, yal tai: Broă yal tơngĭt cau tơlik măt tĕ khà kuang bàng Hội đồng Nhân dân kung geh ală mpồl chính trị mpồl bơtiàn tàm ù tiah xã dê geh jơh tơl nă cau sền gròi. Gơwèt mờ xã den mat ală cau tĕ khà, tơlik măt tĕ khà tus tơngai do neh yal jơh. Jăt tàm ală jơnau sồr den geh lam lơh kờp sền mờ cribơyai ală broă lơh 1, 2, 3 mờ sền dờng màng ală cau geh bơngă pin dờn, geh bồ tơngoh jak, geh bơta jak tàm broă đơng lam ătbồ nàng lơh geh kơnòl broă tŭ geh pồ lơh kuang bàng Hội đồng Nhân dân.

Bal mờ hơ̆, broă sền dờng màng gơnoar tĕ khà, tơlik măt tĕ khà bơh làng bol jơi bơtiàn kòn cau dùl êt nă cau dê tàm tĕ khà Quốc hội mờ Hội đồng Nhân dân ală kấp kờñ pal geh lơh jăt dùl ròt bal bơh broă sền gŏ, sac rwah, rơndăp tăp sèng, bơto bơtê, tề lam, tơn pồ, ngui nàng kờñ lơh geh jơnau sồr bè tơl khà kuang bàng jăt jơnau sồr bal bơh Đảng mờ Dà lơgar dê. Bè jŏ jòng, kờñ pal pơn jăt tai sền gròi gơwèt mờ mpồl kuang bàng, công chức là cau jơi bơtiàn kòn cau dùl êt nă cau.

Gơwèt mờ kuang bàng geh bơta pràn jak mơya gam ờ hềt tơl jơnau sồr pal geh den pal ai tơmŭt tàm broă lơh, broă rơndăp lơh bơto pơlam nàng lơh geh jơnau sồr kuang bàng, công chức, tàm hơ̆ geh ală anih lơh broă làng bol pồ. Rơndăp kuang bàng jơi bơtiàn kòn cau lơh ngan ndrờm pal mờ rơndăp khà kờp làng bol tơl tiah, tơl ƀòn lơgar. Bơdìh hơ̆ tai, pal sền dờng màng ngan tus ală jơnau yal tơngĭt kơrnoat boh lam geh gơrềng, bè: Adat tĕ khà kuang bàng Quốc hội mờ tĕ khà kuang bàng Hội đồng Nhân dân; ală sră nggal bơto pơlam bè dơ̆ tĕ khà bơh Dà lơgar dê, bơh Ủy ban Thường vụ Quốc hội mờ Mpồl duh broă tĕ khà dà lơgar dê.

Cau cih Hải Nguyễn- Cau mblàng Lơ Mu K’Yến