VOV4.K’ho- Kòp dờng Covid-19 neh lơh bơtờp tus jơh ală dà lơgar mờ kơnhoàl ù tiah tàm dunia, lơh gơrềng kơn jơ̆ ngan tus uă bơta bơh rài kis lơh sa- mpồl bơtiàn. Tàm bơta hơ̆, Đảng mờ Dà lơgar Việt Nam ờ mìng sền gròi, gàr niam gơnoar ai làng bol tàm lơgar in mờ gam lơh jăt di tŭ broă lơh sền gàr gơwèt mờ làng bol Việt ơm tàm lơgar ndai in.

Bulah kes priă dà lơgar ờ geh uă, kal ke bơta lòng gam uă, lơgar he neh dong kờl gĭt nđờ rbô nă làng bol lơgar Việt Nam ơm tàm lơgar ndai kơ̆ kơl jăp rài kis, sền gàr màng kis, jơtài phan bơna mờ ală gơnoar, bơta kuơ dipal; mơkung là dùl tàm dùl êt ngan dà lơgar ai ală rơndeh par jun pơndiang làng bol geh rài kis kal ke, jơnau kờñ jal mhar rê hờ lơgar tờm dùl bă niam bơnĕ ngan, mờng chài ngan, ờdo ờdă mờ lơh jăt niam broă lơh rơcăng sơndră kòp geh cồng nha.

Kờp is tàm nam 2020, Bộ Ngoại giao lơgar Việt Nam neh pơgồp bal mờ ală Bộ: Y tế, Quốc phòng, Kuang àng, Giao thông- Vận tải mờ ală tiah geh gơrềng bal ai rlau 300 nơm rơndeh par, jun mờr 85 rbô nă làng bol bơh 59 lơgar, kơnhoàl ù tiah tàm dunia rê hờ lơgar dùl bă niam bơnĕ ờdo ờdă. Ồng Phạm Bình Minh Phó Thủ tướng Chính phủ mơkung là Bộ trưởng Bộ Ngoại giao lơgar Việt Nam dê, pà gĭt: Bơta dờng ngan rlau jơh tàm tơngai gơbàn kòp Covid-19, hơ̆ là Việt Nam là dùl êt ngan ală lơgar geh ală rơndeh par jun làng bol Việt Nam gơtìp gơkòl rê hờ lơgar, hơ̆ là bơta kuơmàng ngan rlau jơh.

Khà cau Việt Nam lơh broă tàm lơgar ndai pơgăp 500 rbô nă mờ 100 rbô nă kơnòm bơsram lòt bơsram hờ lơgar ndai. Cau ùr Việt Nam bau mờ cau lơgar ndai pơgăp rlau 200 rbô nă. Gơwèt mờ làng bol ală jơi bơtiàn dùl êt nă cau, mìng lòt lơh broă tàm ală lơgar, bè: Lo, Nhờk, Hàn Quốc, Saudi Arabia, Malaysia, Đài Loan, Singapore, Lybia, tiah Trung Đông, lơgar Qatar, lơgar Czech..., dùl bơnah cau neh geh rê hờ lơgar, tàm hơ̆ pơnrơ ngan rlau jơh là rơndeh par jun làng bol Việt Nam bơh tiah gơbàn kòp uă ngan Vũ Hán, lơgar Lo rê hờ lơgar tàm ngai 10/2/2020.

Gơwèt mờ ală làng bol kung gam ơm kis, bơsram sră mờ lơh broă tàm lơgar ndai, Bộ Ngoại giao Việt Nam mờ ală anih lơh broă ala măt lơgar Việt Nam tàm lơgar ndai sùm lùp, sồr lơh mờ lơh broă bal niam mờ đah lơgar ndai, anih lơh broă geh gơnoar tàm lơgar hơ̆ nàng kờn ai tơl bơta pal geh tàm rài kis pah ngai, geh kham sơm kòp, bơsram sră, lơh broă...niam ngan rlau jơh ai làng bol in.

Pơnrơ bè lơgar Nhờk, là tiah geh uă cau jơi bơtiàn dùl êt nă cau lòt bơsram mờ lơh broă, Đại sứ quán neh lùp mờ anih tờm bơto pơlam bơh ală càr dê, sồr khi ai tai sồ điện thoại geh đơs dà Yoan. Bơta do kuơmàng ngan tài bơh mpồl bơtiàn rlau 200 rbô nă cau là cau lòt bơsram broă lơh, tàm khà hơ̆ geh cau jơi bơtiàn dùl êt nă cau lòt lơh broă, dà đơs mìng chài tơm bơh bơr bè ờs mờ ơm kis ƀươn ƀoài lơm, dilah bơtờp kòp den ờ gĭt đơs bè lơi nàng cau in gĭt. Tŭ do, càr lơgar Tokyo mờ mờr nggùl khà kờp làng bol càr lơgar do dê neh tơnguh tai sồ điện thoại geh đơs dà Yoan. Mờr 20 mpồl cau Việt Nam tàm 20 càr bơh lơgar Nhờk dê dong kờl ai Đại sứ quán in dong kờl mpồl bơtiàn. Kuang bàng mờ cau lơh broă bơh  Đại sứ quán Việt Nam dê tàm lơgar Nhờk neh tă dùl nă cau dùl ngai priă nhai nàng blơi phan sa pal geh ai ală cau rƀah ờ geh priă jền nàng blơi. Gơtùi đơs, do là broă lơh tơngŏ nùs nhơm tàm dong tàm ròng bal, bơh jŏ là bơhiàn niam bơnĕ ngan bơh cau Việt Nam he dê.

Ồng Vũ Hồng Nam, Đại sứ Việt Nam tàm lơgar Nhờk yal: Nam 2020 là dùl nam kal ke ngan, bơh sơnrờp tơn, bol añ neh gĭt, broă lơh sền gàr làng bol là kuơmàng ngan, bol añ gĭt nền geh kơnòl hơ̆ gơwèt mờ Dà lơgar mờ làng bol mờ dong bol añ sơrlèt gan jơh ală bơta kal ke nàng lơh gơs kơnòl broă geh jàu.

Broă lơh sền gàr làng bol Việt Nam tàm lơgar ndai neh mờ gam lơh kơ̆ kơl jăp bơta pin dờn bơh ală cau kòn ơm ngài mờ ƀòn lơgar tờm in tàm ală gùng dà broă lơh bơh Đảng mờ Dà lơgar dê; dong làng bol Việt Nam ơm tàm lơgar ndai sơlơ “ram nùs”, sơlơ gơboh kờñ mờ kah tus ƀòn lơgar dà lơgar tờm. Oh Vũ Thị Tuyên, cau jơi bơtiàn Thái, ơm tàm Bắc Quang, càr Hà Giang gam bơsram tàm lơgar Mỹ đơs: Bol oh dan blơi vĕ rơndeh par neh uă dơ̆ ngan mơya ờ gơtùi rê hờ Việt Nam, gơlơh muăt jrùm ngan mơya kung ưn ngài ngan ală mơi, ală wa Đại sứ quán đah do, tàm ƀang Sanfransico, Texas dong kờl bol oh jòi ală rơndeh par, jòi anih ơm anih sa, anih bĭc nàng geh tơl pràn jòi ală rơndeh par ndai.

Tŭ do, uă dà lơgar mờ kơnhoàl ù tiah kung gam ờ huan ai halà kơryan jơh ală gùng par dunia, ờ ai mù halà sồr sền swì sră pơ àr bè sră cơng tàng bơta pràn kơldang să jañ lơh uă cau năc gơtìp kòl tàm ală ƀlàng rơndeh par dunia. Nàng pleh ală jơnau gơtìp kòl bè hơ̆, bơto sồr làng bol Việt Nam đơs bal mờ làng bol jơi bơtiàn dùl êt nă cau đơs is gam ơm tàm lơgar ndai bañ lik lòt uă, pleh pơhìn bơtờp kòp, lơh jăt broă lơh rơcăng sơndră kòp jăt jơnau bơto sồr bơh lơgar hơ̆ dê, sùm sền swì mờ sền ală jơnau yal bè ală rơndeh lòt rê, gùng par dunia kung bè jơnau sồr bè ală sră pơ àr pal geh nàng lòt tàm ală rơndeh par nàng ờ gŏ di lời gơlik geh jơnau gơtìp gơkòl tàm lơgar ndai.

Cau cih VOV4- Cau mblàng Lơ Mu K’Yến