VOV4.K’ho- Ơm tềng đăp bơta pơhìn khà kờp làng bol ngai sơlơ kra tĕ, Việt Nam gam lơh ngan lơh jăt uă broă nàng kờñ sền gàr, sền gròi mờ tơnguh uă bơta pràn kơldang să jan cau dờng sơnam in, ngan là sền gròi uă tus tiah làng bol jơi bơtiàn kòn cau dùl êt nă cau.

Nền cê là Kơrnoăt sồ 1579 bơh Thủ tướng Chính phủ dê kĭ ring bal Broă lơh Sền gàr pràn kơldang să jan cau dờng sơnam in tus nam 2030 mờ jơnau kờñ sền gàr, tơnguh uă bơta pràn kơldang să jan cau dờng sơnam in (cau bơh tơl 60 sơnam rlau hơđang) nàng gơdờp bal mờ bơta khà kờp làng bol ngai sơlơ kra tĕ, pơgồp bơnah lơh jăt geh cồng nha Broă lơh Khà kờp làng bol Việt Nam tus nam 2030.

Nàng lơh jăt ngan ngồn jơnau kờñ bal neh ai tơlik, Broă lơh Sền gàr pràn kơldang să jan cau dờng sơnam in tus nam 2030 neh ai lơh jăt 14 jơnau kờñ loh làng tus nam 2030. Tàm hơ̆ geh uă jơnau kờñ jŏ jòng kuơmàng, bè: 100% kấp ủy Đảng, gơnoar ătbồ ală kấp geh ală kơrnoăt, broă rơndăp lơh, bơcri kes priă ai sền gàr pràn kơldang să jan cau dờng sơnam in tàm nam 2025 mờ lơh sùm tus nam 2030; Cau dờng sơnam halà cau pròc mhàm să tờm sền gàr cau dờng sơnam gĭt jơnau yal bè khà kờp làng bol ngai sơlơ kra tĕ, gơnoar geh sền gàr pràn kơldang să jan bơh cau dờng sơnam dê geh 70% tus nam 2025; 85% nam 2030; Cau dờng sơnam geh kham sền gàr pràn kơldang să jan jăt tơngai êt ngan rlau jơh là dùl dơ̆ tàm dùl nam, geh lơh sră jăt sền ătbồ bơta pràn kơldang să jan geh 95% nam 2025; 100% nam 2030; Tơnguh khà cau dờng sơnam geh gŏ mờ sơm kòp, ătbồ ală bơta kòp ờ lơh bơtờp (kòp ung thư, gùng mhàm plai nùs, gơguh huyết áp, dà đồm sơdàng, kòp klờm soh gơkòl jŏ jòng, bồ tơngoh ngai sơlơ ờ gam ngac ngar tai...); Tơnguh khà xã, sơnah ƀòn, thị trấn lơh geh broă jàu tiah ơm kis rềp mềl mờ cau dờng sơnam geh êt ngan rlau jơh là bơh 20% nam 2025; 50% tàm nam 2030....

Jăt mờ hơ̆, bơnah broă bơh Broă lơh Sền gàr pràn kơldang să jan cau dờng sơnam in tus nam 2030 lam lơh jăt tàm làm gùt lơgar. Tơrgùm tàm ală càr, ƀòn dờng mờ ƀòn lơgar geh khà cau dờng sơnam jơnhoa rlau mờ khà kờp bal bơh gùt lơgar dê; tiah sar lơgar ngài, tiah kal ke, tiah jơi bơtiàn kòn cau dùl êt nă cau, tiah kơh bơnơm, bồt bơlào.

Nàng kờñ lơh geh ală jơnau kờñ ai tơlik tus nam 2030, Broă lơh geh bal 6 kơnòl broă mờ broă lơh, hơ̆ là: Tơnguh bơta đơng lam, ătbồ bơh ală kấp ủy Đảng, gơnoar ătbồ dê bè broă lơh sền gàr pràn kơldang să jan cau dờng sơnam in; lơh pràn mblàng yal hòi jà tam gơl broă lơh lơh geh ù tiah mpồl bơtiàn kờñ bal mờ tus bal sền gàr pràn kơldang să jan cau dờng sơnam in; Lơh kơ̆ kơl jăp, bơtàu tơnguh ală anih drơng broă kham sơm kòp sền gàr pràn kơldang să jan bơh sơnrờp, rơcăng sơndră kòp ờ lơh bơtờp, kham sơm kòp ai cau dờng sơnam in; rơhời geh broă lơh sền gàr pràn kơldang să jan jŏ tơngai ai cau dờng sơnam in; Bơto bơtê, bơto pơlam broă lơh ờs mờng ai cau lơh broă lơh sền gàr pràn kơldang să jan cau dờng sơnam in; Lơh sir broă lơh kơrnoăt boh lam gơrềng tus broă sền gàr pràn kơldang să jan cau dờng sơnam in; Kơlôi sơnơng, lơh broă bal mờ dunia mờ Ai tơl priă jền lơh jăt Broă lơh.

Kơnhoàl Đại Từ, càr Thái Nguyên tŭ do geh 33 jơi bơtiàn oh mi ơm kis bal, tàm hơ̆ jơi bơtiàn kòn cau dùl êt nă cau geh rlau 32%. Nàng lơh jăt jơnau kờñ tơnguh uă bơta niam khà kờp làng bol, tơngai lài, geh bơta dong kờl bơh Anih tờm Sền gàr pràn kơldang să jan cau dờng sơnam mpồl bơtiàn càr Thái Nguyên dê, kơnhoàl Đại Từ neh lơh geh 21 Câu lạc ƀộ tàp pràn să jan Việt Nam, gơhòi gơ jà geh rlau 2 rbô nă cau dờng sơnam tàm mpồl tus bal. Mờ uă broă lơh geh kuơ, dờng màng ngan, ală Câu lạc ƀộ neh pơgồp bơnah lơh niam wơl bơta pràn kơldang să jan mờ cèng wơl bơta chờ hờp ai cau dờng sơnam in tàm ù tiah kơnhoàl dê.

Bal mờ broă bơyai lơh tàp pràn să jan jăt tơl mpồl tàm ală tiah tiah làng bol ơm kis, mpồl làng bol ơm kis; pơrjum bơh 3 tus 4 dơ̆ jơh gùt Câu lạc ƀộ pah nhai; ală Câu lạc ƀộ tàp pràn să jan gam bơyai lơh broă lơh tìp măt, lùp bơsram mờng chài đah ală Câu lạc ƀộ tàm dơlam mờ bơdìh càr. Nàng gàr sùm broă lơh do, ală Câu lạc ƀộ lơh kes priă bơh uă priă jền, bè: cau tàm mpồl tă pơgồp, bơta dong kờl bơh ală mpồl cau, cau dùl nă să, mpồl lơh sa kă bro, oh kòn, kòn sau ală cau tàm mpồl dê,...

Jăt ồng Nguyễn Ngọc Yến, ồng là Kuang ătbồ Mpồl ala măt mpồl cau dờng sơnam càr Thái Nguyên dê đơs, nàng cau dờng sơnam kis chờ hờp, kis pràn, kis geh kuơ mờ ngui niam ală bơta mờng chài kuơmàng ngan bơh he dê tàm rài kis, sùm là anih kơldìng, krơh àng ai oh kòn, kòn sau in đòm jăt den broă sền gàr tơl làm ai cau dờng sơnam in ngan ngồn là pal geh jŏ jòng, broă lơh jŏ jòng mờ geh cồng nha rlau. Ồng Nguyễn Ngọc Yến, đơs: Pal geh kes priă dong kờl cau dờng sơnam bal mờ ală mpồl cau, lơh hìu bơta nđàc sền gàr cau dờng sơnam tŭ gơtìp kòp jê, lơh ală Câu lạc ƀộ ală rơnàng cau tàm dong kờl is, mờ tŭ do pal dan mờ dà lơgar priă jền nàng bơto pơlam ai jơh ală anih in.

Nàng lơh jăt jơnau kờñ tơnguh uă bơta niam khà kờp làng bol, càr Thái Nguyên kung gam pal kong mờ uă bơta lòng, tàm hơ̆ geh broă hòi jà mpồl bơtiàn tàm sơm băt tê bal sền gàr tơl làm cau dờng sơnam in. Mơya, mò Hồ Thị Thanh Thủy là Kuang ătbồ Chi cục Khà kờp làng bol deh dùh di kơrhia tàm hìu bơnhă càr Thái Nguyên dê đơs bè do: Gah lơh broă geh pơn jăt tai tă pơgồp jơnau đơs ai càr in nàng lơh jăt ală broă lơh sền gròi tus broă bơto yal bơta gĭt wă, yal tơngĭt bơta gĭt wă ai cau dờng sơnam in, nàng cau dờng sơnam gơtùi sền gàr is kung bè sền gàr is pràn kơldang să jan he dê, nàng kờñ tơnguh uă bơta pràn kơldang să jan bơh cau dờng sơnam dê mờ lam lơh ală broă lơh kham sền gàr pràn kơldang să jan, ătbồ bơta pràn kơldang să jan ai cau dờng sơnam in bal mờ bơta kơ̆p kờñ là bơta niam rài kis kung bè bơta pràn kơldang să jan cau dờng sơnam geh ală bơta tam gơl niam mờ tơnguh uă bơta niam khà kờp làng bol đơs is.

Cau cih VOV4- Cau mblàng Lơ Mu K’Yến