Jăt ală cau jăk chài đơs, tàm bơta kòp Covid-19 gơtìp kal ke, broă gàr ờ do ờ dă bơta pràn kơl dang să jan ai kơnòm bơsram in là kuơ màng ngan. Tàm bơta lơgar he lơh jăt broă gơdờp ờ do ờ dă, ndrờm bal, sền gròi kòp Covid-19 geh cồng nha, geh tus hờ hìu bơsram nàng bơsram sră tơn là broă kờñ di pal ngan bơh kơnòm bơsram dê, den tàng pal geh broă lơh gờñ ngan nàng ai ală kơnòm bơsram in lòt bơsram. Broă tam cah tiah nàng geh broă bơyai bơto bơsram tơn ha là bơto bơsram pờ tàm internet là di pal tàm bơta do. Mơya, bal mờ broă tam cah tiah den gam geh uă broă lơh ndrờm bal ndai nàng kơnòm bơsram in lòt bơsram bè: cit sơnơm vaccine, bơyai lơh bơsram tam cah ngài, “5K”. Jăt Phó Chủ nhiệm Ủy ban Văn hoá-Giáo dục Quốc hội ồng Tạ Văn Hạ đơs, pal bơyai lơh sền gròi broă lơh sơnơm gơwèt mờ kơnòm bơsram tàm hìu bơsram nền nòn ngan tŭ ală kơnòm bơsram geh lòt bơsram wơl tài “tiah tơlir” tàm broă rơcang sơndră mờ kòp Covid-19 mìng geh bơta di mơ: “Kòp gơtờp ờ geh tiah, kòp ờ geh nhàr ù tiah lơi. Ngai do tơlir, mơya ngai hìng gơs tiah ờ tơlir tai. Den tàng wèt tus do he pal geh broă lơh di pal, bè tàm lơgar Nhờk geh broă lơh tơrluh ù, di lah bè tơrluh ù, ală kơnòm bơsram geh bơsram là geh bè lơi mờ broă rơndăp săp sèng bè lơi. He pal bơ̆t bơtàu dùl broă lơh di pal gơwèt mờ tàm hìu bơsram, tŭ gơtìp F0 broă lơh geh bơsong bè lơi, gơwèt mờ ală kơnòm bơsram bè lơi, gơwèt mờ ală cau pơgru bè lơi”.

Kuang bàng ala măt Quốc hội ồng Nguyễn Anh Trí kung đơs là, tàm bơta kis bal, gơdờp bal ờ do ờ dă mờ kòp Covid-19 den broă bơsram kung pal kơlôi tus mờ broă tam gơl. Kơnờm bơsram ờ gơtùi bơsram pờ tàm internet, bơsram bơh tàm ti vi sùm tài ờ geh tơl bơta niam mờ bè jŏ jòng geh lơh ờ niam tus mờ bơta pràn kơl dang să jan, nùs nhơm bơh ală kơnòm bơsram. Den tàng, pal ai geh tiah bơsram ờ do ờ dă nàng cau mè bèp iang nùs jun kòn lòt bơsram: “Broă lơh kuơ màng là bơyai lơh geh broă lơh sơnơm tàm ală hìu bơsram tơn. Do là broă lơh sơnơm tàm ală tiah dê. Bơdìh mờ ală cau pơgru bơto, bơdìh mờ ală cau ròng siam den geh dùl mpồl cau kuơ màng ngan hơ̆ là kuang bàng lơh sơnơm. Pah ngai was bơta duh să jan, hơ̆ sồng bơto sồr ai ală kơnòm bơsram in ală broă, hơ̆ sồng di lah geh gơtìp pin gơbàn kòp den xét nghiệm kơnòm bơsram in”.

Tàm dơ̆ pơrjum pa do đah Chính phủ mờ Bộ Giáo dục mờ Đào tạo bè broă lơh jăt rơndăp broă nam bơsram 2021-2022 tàm bơta kòp Covid-19, Phó Thủ tướng Chính phủ ồng Vũ Đức Đam neh sồr gah bơto bơtê mờ bơsram pơgồp bal mờ ală mpồl lơh broă geh gơnoar lơh jăt ală broă lơh nàng gàr niam bơta ờ do ờ dă tŭ kơnòm bơsram geh lòt bơsram wơl. Jăt mờ hơ̆, bal mờ broă chồl mhar broă cit sơnơm vaccine ai kơnòm bơsram bơh 12 sơnam tus hờ đơm 18 sơnam den pal sền wơl, tơnguh wơl broă lơh sơnơm tàm hìu bơsram, gàr niam tiah kis ờ do ờ dă ai kơnòm bơsram in tàm bơta kòp gơtờp: “Ală kơnòm bơsram tàm hơ̆ uă ngan là ală kơnòm tàm sơnam ờ hềt geh cit sơnơm vaccine lòt bơsram, he pal geh broă sền gàr. Sồr Bộ Y tế mờ Bộ Giáo dục mờ Đào tạo đơng lam sền wơl, rơcang broă sền gròi lơh sơnơm tàm hìu bơsram, lơh bè lơi ai jơh ală kơnòm bơsram tàm hìu bơsram ndrờm geh anih mùl màl nàng sền gròi bơta pràn kơl dang să jan tàm bơta kòp gơtờp, gàr niam bơta di nùs nhơm, he lòt bơsram den pal ờ do ờ dă mờ tàm hìu bơsram hơ̆ là tiah ờ do ờ dă”.

Tŭ do, geh 23 càr, ƀòn dờng ai kơnòm bơsram lòt bơsram tơn, 15 càr, ƀòn dờng bơsram pơgồp bal pờ tơlik tàm internet mờ bơsram tơn, ală càr, ƀòn dờng gam tai bơsram tàm internet mờ bơh tàm ti vi. Uă càr, ƀòn dờng gam tam gơl rơhời tus mờ broă lòt bơsram tơn tŭ kòp gơtờp gam tàm bơta geh sền gròi. Uă cau jăk chài đơs là, tŭ bơyai lơh geh broă sền gròi broă lơh sơnơm tàm hìu bơsram nền nòn, pơgồp bal dữ liệu bơh kơnòm bơsram ală hìu bơsram mờ dữ liệu rơcang sơndră mờ kòp gơtờp bơh ƀòn lơgar hơ̆ dê mờ lơh jăt nền nòn ală broă lơh ndai den geh ai gơs tiah niam ờ do ờ dă ai kơnòm bơsram in iang nùs lòt bơsram.

Cau mblàng Ndong Brawl