VOV4.K’ho- Bơt bơtàu kơ̆ kơljap mpồl sền gàr lơngap lơngai làng bol, kơryan ală bơta cau tìs, hòi jà làng bol jàu git nđờ rhiang bơta phàu crong, phan bơrtoh, hơ̆ là ală cồng nha geh pơn rơ ngan bơh tŭ mpồl kuang àng cíñ quy rê lơh broă tàm ală xã tàm kơnhoàl tiah nhàr dà lơgar Tuy Đức, càr Dăk Nông.  

Bơsong broă lơh sơbac mhar, geh cồng nha, hơ̆ là jơnau đơs bơh làng bol tàm ală ƀòn bơh xã Quảng Trực dê tŭ đơs bè ală kuang bàng, kuang àng cíñ quy rê lơh broă tàm cac tiah nhàr dà lơgar dê. Bi Thị Bơi ơm tàm ƀòn Bu Prăng 1, xã Quảng Trực, kơnhoàl Tuy Đức ai gŏ bơta pin dờn gơ wèt tus mờ mpồl kuang àng xã tơnơ̆ broă gơlik geh bơh hìu bơnhă bi dê: “Hìu bơnhă añ dê lài do geh dùl nă cau bơñul ñô mut, khai ià yoas kờñ mut sreh chơt oh mi añ. Gŏ bè hơ̆ den añ hòi điện thoại kuang àng xã mờ mpồl lơh broă bơh mpồl ling sền gàr tiah nhàr dà lơgar in. Bulah hìu añ ơm ngài tiah tàm gùl xã, mơya ờ hềt tus 10 phuk, ală bi hơ̆ neh geh mat nàng bơsong di tŭ. Geh kuang bàng, kuang àng cíñ quy rê lơh broă den bơta lơngap lơngap geh gàr kơ̆, dilah gơlik geh broă lơi den ală bi geh mat di tŭ ngan.”

Bi Vũ Thị Mỹ Duyên, ơm tàm ƀòn Dăk Huýt, xã Quảng Trực pà git, làng bol iang nùs ngan tŭ geh ală kuang bàng kuang àng xã cíñ quy: “Đơs bal là bè bơta lơngap lơngai geh gàr kơ̆ uă rlau mờ lài. Ală oh mi kung jơh nùs ngan mờ làng bol, bulah khat tàm tŭ lơi, dilah bol hi geh broă lơi mờ hòi điện hoại den ală bi hơ̆ tus mơ mờ bơsong broă gơlik geh mhar ngan.”

Ồng Điểu Drây, kuang atbồ ƀòn Bu Prăng 1 pà git, làng bol jơi bơtiàn kòn cau dùl êt nă cau tàm tiah nhàr dà lơgar ngài ngan do sùm ờ geh sră cih mat mờ ngai deh kòn dê mờ ờ tơl uă ngan bơta sră pơ àr is. Kuang bàng kuang àng xã neh tus tơn tơl hìu, pơlam làng bol yal di, yal tơl jơnau tơnggit nàng lơh sră kăn kướk làng bol: “Tŭ làng bol lơh mờ geh bơta kòl yan lơi den lùp oh mi kuang àng xã, oh mi geh mblàng yal, tơngkah, pơlam tơn, sền làng bol gam ờ tơl sră pơ àr lơi, pal lơh sră nggal lơi. Oh mi kuang àng xã rê tàm ƀòn lơgar den añ gŏ niam ngan.”

Jat Đại úy Trần Văn Dũng, kuang atbồ Kuang àng xã Quảng Trực pà git, 6 nă kuang bàng kuang àng cíñ quy tơl nă cau gehbơto bơtê dùl gah mờng chài krơi is, mơya tŭ rê tàm xã den ală bi neh bơsram, tàm bơ tơl mờ gơp, nàng tơl nă cau ndrờm gơtùi lơh jơh ală broă tàm kấp hơ đơm. Bal mờ broă cribơyai ai kấp ủy gơnoar atbồ tàm ƀòn lơgar in sền gàr kơ̆ lơngap lơngai tàm tiah nhàr dà lơgar, kuang àng xã Quảng Trực neh bơt bơtàu, gàr kơ̆ uă broă lơh sền gàr lơngap lơngai, ờdo ờdă bơh ală ƀòn: “Bol hi pơgồp bal mờ đoàn viên, ơruh pơnu kuang àng càr pà làng bol in 1 rbô nơm móc khoă sền gàr lơngap lơngai, tàm hơ̆ geh cih sồ điện thoại bơh kuang atbồ kuang àng xã, Phó kuang atbồ kuang àng xã mờ sồ điện thoại bơh mpồl gròi sền hình sự kuang àng kơnhoàl Tuy Đức dê nàng làng bol in yal mhar ală broă gơlik geh gơ rềng tus cau tìs. Bơdìh hơ̆ tai den bol hi kung pơgồp bal mờ mpồl ling sền gàr tiah nhàr dà lơgar bơt bơtàu ală mpồl atbồ is gùng nhàr dà lơgar, jrong tiah nhàr dà lơgar nàng ờ mìng tus bal sền gàr tiah nhàr dà lơgar mờ gam bơyai lơh ală anih gròi sền tŭ gơlik geh bơta cau tìs tàm ƀòn lơgar. Den bơh ală broă lơh bè hơ̆ den pa do, bol hi neh kup bàn mhar 2 dơ̆ tung kơñau rơndeh măi.”

Broă lơh geh cồng nha bơh mpồl kuang àng cíñ quy rê tàm xã dê neh pơgồp bơnah bơt bơtàu mpồl sền gàr lơngap lơngai làng bol kơ̆ kơljap tàm tiah nhàr dà lơgar Quảng Trực, tiah geh tus 17  jơi bơtiàn kòn cau oh mi ơm kis tàm bă ù ơnàng rlau 60 rbô lồ. Ồng Điểu Plơu, Phó Củ tịc Ủy ban Ñân dân xã Quảng Trực pà git: “Quảng Trực là xã tiah nhàr dà lơgar uă kal ke, ngan là bè gùng lòt rê kal ke ngan tàm kàl mìu, làng bol den ơm kis rah rài, ù tiah den dờng ơnàng, den broă lơh atbồ kung kal ke ngan. Đơs bè mpồl kuang àng cíñ quy rê lơh broă tàm xã den niam ngan tàm broă lam lơh kơnòl broă kung bè cribơyai mờ kấp ủy gơnoar atbồ tàm ƀòn lơgar in. Tơngai rềp ndo, añ gŏ là pơndrờm mờ lài den bơta lơngap lơngai cíñ trị tàm xã Quảng Trực neh niam, kơ̆ kơljap, xã ngai sơlơ bơtàu tơnguh.”

Thượng tá Nguyễn Sử, Kuang atbồ Kuang àng kơnhoàl Tuy Đức pà git, lam lơh rơndap broă bơh Ƀộ Kuang àng dê, jơh 6 xã tàm kơnhoàl neh geh ai 41 nă kuang àng cíñ quy rê lơh broă. Cồng nha pơn rơ ngan là khà broă lơh tìs hình sự neh gơmù. Bal mờ hơ̆ mpồl kuang àng neh hòi jà làng bol jàu 130 ngkơr phàu bal mờ mờr 700 gar phàu ală bơta. Thượng tá Nguyễn Sử, tam pà mờng chài gàr niam lơngap lơngai tàm tiah nhàr dà lơgar: “Jơnau bơsram mờng chài hơ̆ là lơh bè lơi gơtùi hòi jà jơh làng bol nàng bơt bơtàu dùl mpồl sền gàr lơngap lơngai tàm làng bol kơ̆ kơljap tàm tiah nhàr dà lơgar. Tàm do den bol hi neh mblàng yal làng bol in git ală kai bơh ală cau tìs dê kung bè hòi jà làng bol bơt bơtàu ală mpồl sền gàr lơngap lơngai nàng bal mờ mpồl kuang àng sền gàr lơngap lơngai. Kuơmàng là tàm tiah nhàr dà lơgar den tơngai lài kuang àng cíñ quy geh ai rê lơh broă tàm ală xã do neh lơh niam broă cribơyai mờ kấp ủy, gơnoar atbồ tàm ƀòn lơgar hòi jà jơh gùt anih lơh broă cíñ trị gàr niam lơngap lơngai tàm ƀòn lơgar tơn; tàm hơ̆ ală oh mi hơ̆ neh ai tus lơh broămờng chài, lơh niam broă lơh pơgồp bal mờ ală pôs ling sền gàr tiah nhàr dà lơgar lam lơh broă gròi sền nàng sền gàr lơngap lơngai tàm tiah nhàr dà lơgar.”

Broă ai kuang àng cíñ quy rê lơh broă tàm ală xã tiah tàm kơnhoàl tiah nhàr dà lơgar Tuy Đức, càr Dăk Nông dê neh ai gŏ cồng nha tàm broă sền gàr lơngap lơngai cíñ trị, ờdo ờdă mpồl bơtiàn. Mpồl kuang àng cíñ quy lơh broă mờng chài bơh kấp hơ đơm neh dờp geh bơta pin dờn, kờñ gơboh bơh làng bol dê, pơgồp bơnah bơt bơtàu kơ̆ kơljap mpồl sền gàr dà lơgar jơh gùt làng bol tàm tiah nhàr dà lơgar.

Cau mblàng K’Duẩn