VOV4.K’ho – Lơh bè lơi nàng brê ờ gơtìp kơl mus tai tàm tu\ 345 rbô lồ ù rơndap lài lơh lâm nghiệp neh geh tơmut tàm broă lơh sa suơn sre tài bơh 150 rbô hìu bơnhă làng bol, mờ bơta ntrờ` làng bol khat gơboh ờ hềt jơh sơl, lơh gơbàn bơta aniai dờng ngan tus brê mờ ù brê. Do là ală broă geh đơs ua\ ngan tàm pơrjum “Bơtàu tơnguh lơh sa, tơnguh pria\ lơh geh, rài kis làng bol lơh broa ứa suơn sre tàm ù lâm nghiệp tiah Tây Nguyên dê” bơh Ban Kinh tế dà lơgar pơgồp bal mờ Bộ Nông nghiệp mờ Phát triển Nông thôn bơyai lơh lồi poh lài tàm [òn dờng Dà Làc, càr Lâm Đồng.

Jat jơnau yal bơh 5 càr Tây Nguyên dê, kờp tus lồi nam 2019, kờp jơh bă ù lơh sa suơn sre tàm ù lâm nghiệp là mờr 345 rbô lồ, geh 11,3% bă ù rơndap lài lơh lâm nghiệp. Ală bă ù lơh sa suơn sre geh jơh bal tàm 3 bơta ù gơ wèt broă rơndap lài ù tiah là brê kuơmàng, brê rơcang gàr bồ tô mờ ù lơh sa. Khà bă ù do ua\ ngan là tam kơphe, tiêu, chi sa plai mờ chi tam lơyah ngai bè bùm blàng, tơngời mờ ală bơta phan tam ndai.

Ồng Phạm S, Phó Chủ tịch UBND càr Lâm Đồng pà git, broă rồn bơ klơn, ai ù, ai wơl ală bă ù brê neh gơtìp sơgràm phà nàng tam phan là ờ gơtùi. Bơh hơ\, Lâm Đồng sồr geh broă lơh tam, lơh gơlik wơl khà jơm glòm brê bơh broă lơh sa suơn sre brê bơnơm pơgồp bal, mờ pal jat bơta “dờp kah yau, ring niam mờ bơta geh ngan tu\ do mờ lơh ngan tàm tơnơ\ do: “Bơta kah yau 52 rbô lồ bè hơ\ den làng bol ơm neh jo\, lơh broă sa neh jo\, dờp nàng tơmut jơh bă ù do kờ` tam chi lâm nghiệp tàm ù do nàng jàu ơpah halà lơh sră gơ noar ngui ù lâm nghiệp. Bè bơta geh ngan tu\ do den tơngai bơh nam 2015 tus nam 2020, Lâm Đồng mìng geh 334 lồ gơtìp sơgràm phà, jơh ală bă ù gơtìp sơgràm phà krà` cê ai wơl nàng tam brê. Bè tơ nơ\ do, bơh nam 2020, lơh ngan là dilah gơlik geh bơta sơgràm phà, den pal ai wơl ù nàng tam wơl brê. Tài bơh roh brê mờ ờ tam wơl brê den kung roh tơn ù”.

Tây Nguyên tu\ do geh 345 rbô lồ ù lâm nghiệp gơtìp sơgràm nàng lơh sa suơn sre

Bal mờ càr Lâm Đồng, ală càr Tây Nguyên kung dùl ròt sồr ai broă lơh sa suơn sre brê bơnơm pơgồp bal lơh broă lơh nàng ờ mìng tơnguh khà jơm glòm brê, mờ gam cèng wơl cồng nha lơh sa ai ală hìu bơnhă làng bol gam lơh broă sa suơn sre tàm ù lâm nghiệp.

Ồng Truơng Thanh Tùng, Phó Chủ tịch UBND càr Dak Nông pà git, càr geh rlau 67 rbô lồ gơ ơm tàm bơta do neh ua\ nam do mờ ờ gơtùi bơsong. Dak Nông dan Bộ Nông nghiệp mờ Phát triển Nông thôn sền sơ wì, dờp ală bơta chi sa plai là chi tam geh ua\ jơnau kờ`, ngui nàng tam tàm ală bă ù lâm nghiệp gơtìp sơgràm phà. Bal mờ hơ\, Bộ pal tơlik jơnau pơlam kỹ thuật tam tàm broă lơh sa suơn sre brê bơnơm pơgồp bal mờ kơ lôi sơ nơng, sền sơ wì bơta kuơ rơcang gàr bơh ală bơta chi sa plai dê nàng kờp tàm khà jơm glòm brê: “Dan Bộ Nông nghiệp mờ Phát triển Nông thôn dờp ală bơta chi sa plai geh m[ur dờng bè bơ, sầu riêng, pơnăt, măng cụt, chôm chôm halà jràng, pơ ò là tờm chi tam geh ua\ jơnau kờ`. Tài ală bơta chi tam do geh bơta kuơ dờng ngan, rlau mờ tờm kau su tai, tờm kau su gam geh tơngai jrùh nha. Dilah gơtùi lơh broă do, geh broă rơndap tap sèng, jơnau pơlam bơtàu tơnguh lơh sa suơn sre brê bơnơm pơgồp bal halà tơlik ală broă lơh nàng lam lơh broă lơh sa suơn sre brê bơnơm pơgồp bal den ja` a` là geh cồng nha ngan. Tài broă lơh do ờ mìng sền gàr tiah ơm kis mờ gam lơh geh cồng nha lơh sa tai”.

Đơs pơn dut pơrjum, Ủy viên Đảng dà lơgar, Phó Kuang atbồ Ban Thường trực Ban Kinh tế dà lơgar, ồng Cao Đức Phát sồr Bộ Nông nghiệp mờ Phát triển Nông thôn bal mờ ală càr Tây Nguyên pal sền do là broă dờng, ờ mìng gơ rềng tus 345 rbô lồ ù lâm nghiệp mờ gam gơ rềng tus lơh sa, rài kis, niam chài bơh pơgap 150 rbô hìu bơnhă làng bol dê tai. Mùl màl, ală khà kờp bè ù brê mờ hìu bơnhă làng bol digơlan gam jơnhua rlau mờ jơnau yal bơh Bộ Nông nghiệp mờ ală càr dê.

Bơdìh hơ\ tai, jơnau yal kung mìng pa tơr gùm tàm brê, ù brê, ờ hềt tơr gùm tàm kòn bơnus. Dilah tài ngòt kơ nòl broă, yal ờ di mờ bơta geh ngan, ală càr gam lơh gơlik is kal ke he in tàm broă atbồ mờ sền gàr brê. Ồng Cao Đức Phát sồr, pal gơtùi ai tơlik ală khà kờp dipal, di mờ bơta geh ngan nàng cribơyai di mờ Bộ Chính trị, Ban Bí thư nàng ai tơlik ală broă lơh geh cồng nha ai tiah Tây Nguyên in: “Pal sền song tàm bơta geh ngan nàng cribơyai mờ Đảng, dà lơgar nàng geh ală broă lơh, kuơmàng là broă lơh dipal nàng bơsong broă do. Ờ go\ di lời bơta ờ loh làng jo\ jòng. Jơnau kờ` den loh làng là lơh bè lơi nàng kơryan bơta kơl mus brê, mơya kung pal jòi broă nàng pơlam làng bol ngui geh cồng nha rlau khà dờng ngan bă ù lâm nghiệp mơya lơh sa suơn sre”.

Ồng Cao Đức Phát đơs nền ờ tam gơl gơs dipal bă brê gơtìp kơl mus, gơtìp sơgràm phà

Ồng Cao Đức Phát kung đơs ngan, dơ\ pơrjum do ờ di là nàng tam gơl gơs dipal bă brê gơtìp kơl mus, gơtìp sơgràm phà. Do là pơrjum nàng cribơyai, jòi broă lơh nàng yal Bộ Chính trị, Ban Bí thư in. Bơdìh hơ\ tai, ồng Cao Đức Phát kung sồr ală càr Tây Nguyên pal krà` cê sền gàr brê geh is tu\ do, ờ go\ di tơrmù ală khà kờp bè bă brê, khà jơm glòm brê.

Gơ wèt mờ ală jơnau dan bơh ală tiah dê, Ban Kinh tế dà lơgar geh sền sơ wì mờ geh jơnau sồr nàng gơtùi tam gơl gơ in dipal mờ bơta geh ngan. Tàm hơ\, cơ chế, broă lơh nàng bơtàu tơnguh lơh sa suơn sre brê bơnơm pơgồp bal tàm ù lâm nghiệp gơtìp sơgràm phà là broă lơh di mơya pal kơ lôi sơ nơng mùl màl nàng dipal mờ tơl bă tiah, tơl mpồl cau. Lơh bè lơi nàng gơ in geh cồng nha bè gah kỹ thuật, niam bè tiah ơm kis, geh cồng nha lơh sa mờ ring niam bè gah mpồl bơtìan tai.

Công Bắc cih – Cau mblàng K’Duẩn