VOV4.K’ho– Ngai rlô poh do, hơ̆ là ngai 23/5, cau tĕ khà gùt lơgar geh lòt tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Tàm tiah Tây Nguyên, poh lài, ală cau tơlik mat tĕ khà neh bơyai lơh tìp mat cau tĕ khà mờ hòi jà tĕ khà jat di jơnau sồr. Kung tàm poh lài sơl, mpồl kuang bàng gròi sền, lòt sền broă lơh tĕ khà bơh Ủy ban Thường vụ Quốc hội, Mpồl duh broă tĕ khà dà lơgar dê bơh Phó Chủ tịch lơgar mò Võ Thị Ánh Xuân lơh kuang atbồ mpồl neh lòt sền ngan ngồn broă rơcang tus ngai tĕ khà tàm tiah Tây Nguyên.

Poh lài, ală cau tơlik mat tĕ khà kuang bàng Quốc hội mờ Kuang bàng Hội đồng Nhân dân ală càr tàm tiah Tây Nguyên neh bơyai lơh tìp mat cau tĕ khà mờ hòi jà tĕ khà. Broă bơyai lơh nàng 10 nă cau tơlik mat tĕ khà kuang bàng Quốc hội khóa 15 mờ 85 nă cau tơlik mat tĕ khà Hội đồng Nhân dân càr, tơngai lơh broă bơh nam 2021 tus nam 2026 lơh jat gơnoar hòi jà tĕ khà he dê geh Ủy ban Mặt trận dà lơgar Việt Nam càr Kon Tum lam lơh nền nòn, di mờ jơnau sồr. Jơh ală cau tĕ khà tŭ geh lùp ndrờm đơs là, ală cau tơlik mat tĕ khà kuang bàng Quốc hội mờ cau tơlik mat tĕ khà kuang bàng Hội đồng Nhân dân càr ndrờm ai tơnggŏ bơta rềp mềr ngan; broă rơndap lơh bal hiă, gơtùi ai tơnggŏ kơnòl broă he dê tŭ geh cau tĕ khà pin dờn pồ lơh kuang bàng Quốc hội mờ kuang bàng Hội đồng Nhân dân càr.

Cribơyai cau tĕ khà kơnòm să mờ dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp

Cau tĕ khà kung đơs niam 2, 3 nă cau tơlik mat tĕ khà bơh nùs nhơm, bồ tơngoh jak, mờng chài lơh broă neh bơt bơtàu broă rơndap lơh di mờ bơta geh ngan mờ geh bơta lam lơh jat ngan ngồn uă. Tơnơ̆ tŭ iat 5 nă cau tơlik mat tĕ khà kuang bàng Quốc hội khóa 15 mờ 7 nă cau tơlik mat tĕ khà kuang bàng Hội đồng Nhân dân càr yal bè broă rơndap lơh he dê, cau tĕ khà Huỳnh Ngọc Phong, hìu tàm thôn 1, xã Tân Lập, kơnhoàl Kon Rẫy đơs: “Añ chờ hờp ngan, ơn uă ngan bơta pin dờn gơ wèt tus mờ ală cau tơlik mat tĕ khà dơ̆ do. Ală cau tơlik mat tĕ khà neh gơtùi đơs ală bơta kơlôi rơcang, bơta kal ke bơh càr Kon Tum dê đơs bal, kơnhoàl Kon Rẫy bol hi dê đơs is. Pơn yơu bè Bộ trưởng Bộ Văn hóa ồng Nguyễn Văn Hùng bơh ngài tus ndo jòi git bơta krơi is, bơta ƀuơn, bơta kal ke bơh càr Kon Tum dê đơs bal mờ kơnhoàl Kon Rẫy dê đơs is. Añ gŏ bè hơ̆ kung là dùl bơta sền gròi. Mờr tus ngai 23/5, cau tĕ khà bol hi geh ià sră pồ tàm tê mờ ală cau tơlik mat tĕ khà dilah geh pồ den geh lơh jat jơnau hơ pơrgon, broă rơndap lơh mờ he neh ai tơlik”.

Ai tàm ƀòn dờng Buôn Ma Thuột, Tỉnh đoàn Dak Lak bơyai lơh cribơyai cau tĕ khà kơnòm să mờ dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026 lời ai ală đoàn viên ơruh pơnu mờ cau bơsram dờng ală hìu bơsram đại học, cao đẳng. Tàm dơ̆ cribơyai, cau tĕ khà geh jòi git bè Adat tĕ khà kuang bàng Quốc hội mờ kuang bàng Hội đồng Nhân dân, Sơnua boh lam mờ ală sră nggal bơh ală kấp dê bè dơ̆ tĕ khà; đal git, tam dră mờ jơnau jòi kai lơh aniai dơ̆ tĕ khà; geh yal tơnggit bè broă đùh sră tĕ khà, broă bơsong dilah gơtìp kòp jê tàm ngai tĕ khà. Đoàn viên Phan Văn Khải ơm tàm sơnah ƀòn Thành Công, ƀòn dờng Buôn Ma Thuột đơs: “Là dùl nă cau tĕ khà pa dơ̆ sơn rờp geh lòt tĕ khà den bơh dơ̆ cribơyai cau tĕ khà kơnòm să, oh git loh rlau bè gơnoar lòt tĕ khà he dê mờ geh hơ ală bơta kòl yan. Bơh hơ̆ den oh geh gàr di tŭ tơngai jat bè jơnau sồr bè tĕ khà. Oh kơp kờñ ală kuang bàng Quốc hội mờ Hội đồng Nhân dân tơngai lơh broă tus geh tơnguh pràn jak mờ geh ală broă rơndap lơh nàng pơgồp bơnah bơtàu tơnguh lơh sa- mpồl bơtiàn tàm tiah he dê”.

Phó Chủ tịch lơgar mò Võ Thị Ánh Xuân đơs đơng lam tàm dơ̆ lơh broă

Mìng gam 1 poh tai là tus ngai tĕ khà, poh lài, Mpồl kuang bàng sền gròi, lòt sền broă lơh tĕ khà bơh Ủy ban Thường vụ Quốc hội, Mpồl duh broă tĕ khà dà lơgar dê bơh Phó Chủ tịch lơgar mò Võ Thị Ánh Xuân lơh kuang atbồ mpồl neh lòt sền ngan ngồn broă rơcang tus ngai tĕ khà tàm 2, 3 anih tàm ƀòn dờng Gia Nghĩa, càr Dak Nông. Jat Ủy ban tĕ khà ƀòn dờng Gia Nghĩa đơs, tàm ală dơ̆ tìp mat hòi jà tĕ khà, uă ngan cau tĕ khà đơs, ală cau tơlik mat tĕ khà geh nùs nhơm niam, lơh krơh lài, git lơh jat niam ală jơnau cih bơh adat boh lam dê, tơl khà nàng tơlik mat tĕ khà kuang bàng Quốc hội mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Tŭ do, ƀòn dờng Gia Nghĩa neh crơng gơs 59 anih đùh sră pồ mờ 8 rbô 560 nă cau tĕ khà geh lòt đùh sră pồ. Ƀòn dờng neh geh broă rơndap lơh mùl màl sền gàr lơngap lơngai ờdo ờdă mpồl bơtiàn, rơcang sơndră kòp bơtờp... lài mờ tŭ, tàm tŭ mờ tơnơ̆ tŭ tĕ khà.

Bơh lòt sền, sền gròi, Phó Chủ tịch lơgar mò Võ Thị Ánh Xuân đơs niam ală broă lơh ngan bơh ƀòn dờng Gia Nghĩa dê tàm broă lam lơh di tŭ, di mờ tơngai geh sồr ală broă rơcang tus dơ̆ tĕ khà. Mờ kung kơp kờñ ală tiah pal lam lơh niam broă rơcang sơndră kòp Covid-19 gàr ờdo ờdă ai cau tĕ khà mờ làng bol in nàng ngai tĕ khà ngan ngồn là ngai chờ bơh jơh gùt làng bol dê: “Geh 2 broă, lài ngan là cau tơlik mat tĕ khà pal geh mblàng yal, hòi jà gàr niam gơnoar he dê. Dơ̆ do geh bơta kal ke rlau là geh lơh tàm tơngai kòp Covid-19 bơtờp uă den tàng bol he pal lơh ngan lơh bè lơi gơnoar bơh ală cau tơlik mat tĕ khà dê pal geh gàr mờ uă broă lơh, ờ di mờ broă lơh tơn den kung pal geh gàr bơh anih yal jơnau tơnggit digơlan pờ tơlik tàm internet... lơh bè lơi nàng ală cau tơlik mat tĕ khà pal lam lơh niam ngan rlau jơh gơnoar hòi jà tĕ khà he dê. Dơ̆ 2 là cau tĕ khà pal geh tơl jơnau tơnggit bè cau tơlik mat tĕ khà mờ jơnau yal bè tĕ khà dơ̆ do. Cau tĕ khà pal git nàng lơh jat niam gơnoar bơh cau tĕ khà dê, bơh hơ̆ git wă is lòt tĕ khà, tĕ khà di, tơl mờ jat jơnau cih bơh adat boh lam dê”.

 Cau mblàng K’Duẩn