VOV4.K’ho– Bal mờ gùt lơgar, ngai 23/5, cau tĕ khà tàm ală càr Tây Nguyên neh bơyai lơh tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026. Do ngan ngồn là ngai chờ bơh jơh gùt làng bol dê, ai tơnggŏ gơnoar mờ kơnòl bơh tơl nă cau tĕ khà dê tàm broă rơ wah ală kuang bàng geh tơl nùs nhơm, pràn jak dipal ala mat ai bơta kơp kờñ mờ gơnoar lơh tờm bơh làng bol dê.

Tàm càr Gia Lai, bơh àng drim gờñ ngai 23/5, tơnơ̆ dơ̆ mut lơh yŭ rơyùm, sơbac mhar, cau tĕ khà tàm 1 rbô 437 anih tĕ khà tàm 220 xã gơwèt 17 kơnhoàl, thị xã, ƀòn dờng neh bơyai lơh đùh sră. Tơnơ̆ tŭ lơh jat gơnoar mờ kơnòl tĕ khà he dê, bi Kay, ơm tàm xã Đăk Ta Ley, kơnhoàl Mang Yang, càr Gia Lai đơs: “Ngai tĕ khà kuang bàng Quốc hội mờ kuang bàng Hội đồng Nhân dân ală kấp, añ gŏ gơloh chờ hờp ngan tài mờr geh ià tàm tê sră pồ. Añ kơp kờñ là geh rơ wah ală cau geh tơl nùs nhơm, tơl pràn jak, sền gròi bơtàu tơnguh lơh sa ai làng bol in mờ kuơmàng là sền gròi tus rài kis bơh ơruh pơnu, bơto bơtê, yal tơngit jòi broă lơh mờ dong kờl ơruh pơnu sơn đờm mut lơh broă”.

Là xã geh 78% cau tĕ khà là làng bol kòn cau K’ho, nùs nhơm tĕ khà tàm xã Dà Nhim, kơnhoàl Lạc Dương, càr Lâm Đồng geh lơh yŭ rơyùm, ai tơnggŏ nùs nhơm làng bol lơh tờm. Ồng Cil Yũ Ha Giảng, 63 sơnam, ơm tàm ƀòn Liêng Bông, xã Dà Nhim đơs là, dơ̆ tĕ khà dơ̆ do geh kuơ dờng màng ngan gơ wèt mờ ƀòn lơgar, tài ồng pin dờn là, ală cau geh pồ lơh kuang bàng Quốc hội mờ Hội đồng Nhân dân ală kấp geh ala mat ai nùs nhơm mờ bơta kơp kờñ bơh làng bol dê. Khi geh tă pơgồp jơnau đơs bơt bơtàu ală broă lơh dipal, tàm hơ̆ geh gàr tơl niam rài kis mpồl bơtiàn, tơn jơh jơgloh tơrmù rƀah mờ ai geh broă lơh dong gàr kơ̆ kơljap rài kis làng bol in: “Làng bol chờ hờp ngan lòt tĕ khà pồ kuang bàng Quốc hội mờ Hội đồng Nhân dân ală kấp. Gơ wèt mờ làng bol bol hi, broă rơ wah ală cau geh pràn jak, geh nùs nhơm nàng đơng lam dà lơgar. Bol hi pin dờn ngan là dơ̆ tĕ khà dơ̆ do geh lơh geh cồng nha niam”.

Cau ling sền gàr tiah nhàr dà lơgar lơh gơs broă tĕ khà

Drim ngai 23/5, Ngai chờ tĕ khà gùt làng bol tàm 660 anih đùh sră tàm càr Kon Tum kung geh lơh tàm nùs nhơm chờ hờp ngan. Tơnơ̆ tŭ ala mat rlau 1 rbô 100 nă cau tĕ khà ƀòn Kon Hra Chót, gơ wèt anih tĕ khà sồ 6, sơnah ƀòn Thành Nhất, ƀòn dờng Kon Tum đùh sră pồ sơn rờp, cau tĕ khà A Huy chờ hờp pà git: “Añ là cau kra ƀòn tàm thôn Kon Hra Chót. Ƀòn bol hi dê chờ hờp ngan rơ wah ală cau mut tàm Quốc hội, Hội đồng Nhân dân tơl pràn jak. Dilah cau lơi geh pồ mut tàm Hội đồng Nhân dân, Quốc hội kung kơp kờñ là lơh bè lơi nàng dong kờl làng bol in”.

Lài hơ̆, tàm ngai 22/5, geh bơta ring bal bơh Ủy ban tĕ khà dà lơgar dê, mờr 12 rbô nă cau tĕ khà tàm Tây Nguyên neh bơyai lơh tĕ khà gờñ tàm 63 mpồl tĕ khà, tàm hơ̆ geh ală kuang bàng, cau ling ală pôs ling sền gàr tiah nhàr dà lơgar, làng bol 6 xã tiah nhàr dà lơgar mờ tiah uă kal ke. Geh rơcang lài nền nòn mờ bơyai lơh jơh nùs, tĕ khà gờñ tàm Tây Nguyên neh lơh geh cồng nha mờ mờr 100% cau tĕ khà lòt tĕ jhà. Cau tĕ khà Cao Trung Hiếu, gơ wèt Pôs ling sền gàr tiah nhàr dà lơgar Dak Ruê, mpồl ling sền gàr tiah nhàr dà lơgar càr Dak Lak pà git bơta kơlôi sơnơng he dê tàm dơ̆ sơn rờp lơh jat gơnoar mờ kơnòl tĕ khà: “Añ gŏ pơn iờ să ngan tài do là dơ̆ sơn rờp añ lòt đùh sră pồ kuang bàng Quốc hội mờ Hội đồng Nhân dân ală kấp. Lài mờ tŭ pồ añ neh sền jơnau tơnggit bè să tờm bơh ală cau tơlik mat tĕ khà dê, neh kơlôi sơnơng sac rơ wah nàng pồ. Añ đơs nền là neh rơ wah ală cau jak ngan rlau jơh, dipal ala mat cau tĕ khà bol hi in. Kơp kờñ ală cau tơlik mat tĕ khà tơnơ̆ tŭ geh pồ geh ală tă pơgồp bè bồ tơngoh bơt bơtàu tiah nhàr dà lơgar càr Dak Lak đơs is mờ dà lơgar đơs bal ngai sơlơ pas sơm, pràn kơldang”.

Cau tĕ khà ƀòn Kon Hra Chót, sơnah ƀòn Thành Nhất, ƀòn dờng Kon Tum đùh sră pồ

Mìng is tàm càr Kon Tum, bal mờ broă lơh jat gơnoar làng bol he dê, mpồl ling sền gàr tiah nhàr dà lơgar gam dờp kơnòl sền gàr lơngap lơngai ờdo ờdă, bal mờ 3 xã tiah nhàr dà lơgar là Đak Plô, Đak Nhoong mờ Đăk Long bơyai lơh niam tĕ khà gờñ tàm ală tiah do. Mìng is tàm ƀùi drim ngai 22/5, rlau 10 rbô nă cau tĕ khà bơh 6 xã kal ke mờ 6 pôs ling sền gàr tiah nhàr dà lơgar tàm 2 kơnhoàl Đăk Glei mờ Ngọc Hồi, càr Kon Tum neh lơh gơs tĕ khà gờñ, mờ mờr 12 rbô nă cau tĕ khà lòt pồ, geh mờr 100%. Cau tĕ khà A No, lòt đùh sră pồ tàm anih tĕ khà sồ 2, xã Đăk Long, kơnhoàl Đak Glei, càr Kon Tum pà git: “Làng bol lòt đùh sră pồ chờ hờp ngan. Tơl nă cau ndrờm lòt pồ jơh. Tài do là kơnòl bơh tơl nă làng bol dê, rơ wah ală cau dipal nàng ala mat ai nùs nhơm, bơta kơp kờñ bơh làng bol dê in”.

Tĕ khà Quốc hội khóa 15 mờ Hội đồng Nhân dân ală kấp tơngai lơh broă bơh nam 2021 tus nam 2026 geh lơh tàm tŭ tơngai kòp Covid-19 gơlik geh kal ke, sùm geh jơnau pơhìn bơtờp kòp bơh tiah nhàr dà lơgar, den tàng kơnòl bơh kuang bàng, cau ling sền gàr tiah nhàr dà lơgar dê là kơnòl dơ̆ lĕ bal, ờ mìng bơyai lơh tĕ khà di mờ jơnau cih bơh adat boh lam dê, mờ gam sền gàr lơngap lơngai tiah nhàr dà lơgar mờ rơcang sơndră kòp bơtờp, nàng ngai tĕ khà ngan ngồn là ngai chờ dà lơgar dê. Tàm ngai chờ dờng dà lơgar dê, jơh gùt tiah Tây Nguyên geh rlau 4 tơlak 55 rbô nă cau tĕ khà, ndrờm bè geh tơl 54 jơi bơtiàn kòn cau bơh dà lơgar dê, lòt đùh sră pồ tàm 5 rbô 725 anih tĕ khà.

 Cau mblàng K’Duẩn