VOV4.K’ho- Tàm dơ̆ lòt còp mờ lơh broă tàm càr Dak Nông, drim ngai 08/4, Thứ trưởng Bộ Lao động- Thương binh mờ Xã hội, ồng Lê Văn Thanh neh lòt sền bơta cau lơh broă, broă lơh tàm Kong ti Trà Dak Nông- TKV tàm xã Nhân Cơ, kơnhoàl Dak Rlâp. Kong ti Trà Dak Nông- TKV lơh broă bơh nam 2017, tŭ do geh 1 rbô 45 nă cau lơh broă.

             Thứ trưởng Bộ Lao động, Thương binh mờ Xã hội ồng Lê Văn Thanh pà phan Công nhân tàm hìu mai in

Ală nam do, kong ti neh lơh jat di jơnau sồr bè broă kĭ sră pơrgon lơh broă, tong priă blơi ală bơta bảo hiểm ai cau lơh broă in jat jơnau sồr. Rài kis bơh kuang bàng, công nhân viên dê ngai sơlơ geh tơnguh niam, bơh priă nhai, broă dong kờl bè hìu ơm bal mờ ală broă lơh dong kờl, niam chài, tàp pràn să jan. Kong ti gam tus bal tă pơgồp, dong kờl ală kes priă tàm ƀòn lơgar, ală broă lơh dong kờl cau, gàr tơl niam rài kis mpồl bơtiàn mờ khà priă rlau 69 tơmàn đông.

Ồng Lê Văn Thanh đơs niam bơta sền gròi bơh kuang đơng lam bồ Kong ti Trà Dak Nông- TKV dê gơ wèt tus mờ rài kis cau lơh broă mờ ală broă lơh gàr tơl niam rài kis mpồl bơtiàn, dong kờl hìu bơnhă geh sră dong kờl bơh dà lơgar, làng bol jơi bơtiàn kòn cau dùl êt nă cau geh rài kis kal ke.

Cau mblàng K’Duẩn