VOV4.K’ho- Ngai 26/9, ồng Phạm Minh Chính-Thủ tướng Chính phủ đơng lam pơrjum pờ tơlik tơn tàm internet mờ mpồl lơh sa kă bro mờ ală tiah bè ală gùng dà broă lơh dong kờl mpồl lơh sa kă bro in tàm tơngai kòp Covid-19.

Thủ tướng Chính phủ ồng Phạm Minh Chính đơng lam pơrjum bè tă bơsong bơta kal ke ai mpồl lơh sa kă bro gơrềng bơh kòp Covid-19 in

Đơs tàm dơ̆ pơrjum, ồng Phạm Minh Chính đơs niam ngan ală jơnau đơs, jơh nùs ngan bơh mpồl lơh sa kă bro tàm lơgar mờ lơgar ndai dê nàng bal mờ gơ̆p sơndră wơl mờ kòp dờng Covid-19, tă bơsong bơta kal ke kòl yan, gàr niam broă lơh sa kă bro. Tàm tơngai tus, Thủ tướng sồr: ală Bộ, gah sơnah lơh broă ală tiah lam lơh kràñ cê jơh nùs ală gùng dà broă lơh bơh Đảng, Dà lơgar dê neh ai ngui. Bộ Kế hoạch mờ Đầu tư sơr băc mhar bơt bơtàu ală broă lơh bơtàu tơnguh wơl rài lơh sa, lơh ngan ngồn tus tơl gah, tơl broă lơh, ală tiah dê. Mờ să tờm mpồl lơh sa kă bro kung kờñ pal bơt bơtàu broă rơndap lơh bơtàu tơnguh wơl lơh sa kă bro ai he in nàng rcang lài, rcang lài tam gơl tus broă lơh pa. Thủ tướng đơs ngan, Chính phủ, gơnoar atbồ ală tiah sùm lòt bal, lơh bal, tam pà bal, sùm sùm lơh gơlik anih ƀuơn ngan rlau jơh mờ dong kờl uă ngan rlau jơh dilah gơtùi ai mpồl lơh sa kă bro, làng bol in tàm broă lơh sa kă bro, ngan là tàm tơngai kal ke bè tŭ do.

Cau mblàng K’Hạnh