VOV4.K’ho- Tàm poh lài, Thủ tướng chính phủ neh đơng lam dơ̆ lơh broă đah Thường trực Chính phủ mờ mpồl kuang đơng lam bồ Ban Dân vận dà lơgar, Ủy ban Mặt trận dà lơgar Việt Nam mờ ală mpồl lơh broă chính trị mpồl bơtiàn bè broă lơh rơcang sơndră kòp Covid-19, sền gròi rài kis làng bol mờ gàr tơl niam rài kis mpồl bơtìan.  Thủ tướng Chính phủ ồng Phạm Minh Chính đơs nền Chính phủ geh pơgồp bal mờ  Ban Dân vận dà lơgar, Ủy ban Mặt trận dà lơgar Việt Nam mờ ală mpồl lơh broă chính trị mpồl bơtìan tàmbroă lơh rơcang sơndră kòp Covid-19; mờ kung đơs nền gơnoar broă dờng màng bơh broă lơh lam sồr làng bol dê tàm broă hòi jà, mblàng yal, lam sồr làng bol tơnguh jơnau git wă tài pràn kơldang să jan bơh să tờm làng bol dê, tài pràn kơldang să jan mpồl bơtìan, tài bơta bơtàu tơnguh bơh dà lơgar dê.

Tàm dơ̆ lơh broă, Ban Dân vận dà lơgar sồr Mặt trận dà lơgar, ală mpồl lơh broă chính trị- mpồl bơtìan pơn jat tai hòi jà làng bol lơh jat nền nòn broă ơm yah ngài mpồl bơtìan jat Jơnau sồr sồ 16 tàm ală tiah; dan Chính phủ lam lơh niam rlau tai broă lơh gàr tơl niam rài kis mpồl bơtìan, dong kờl ală cau gam gơtìp kal ke tài ơm yah ngài mpồl bơtìan, ngan là cau lơh broă gam gơtìp roh broă lơh; Chính phủ đơng lam Bộ Lao động - Thuơng binh mờ Xã hội kơlôi sơnơng, bơ tơl tai cau geh dờp broă dong kờl bơh Chính phủ dê; Chính phủ pal gròi sền rlau tai mpồl y bác sĩ lam lài sơndră kòp, sơbac mhar cit sơ nơm vaccine ai ală cau geh ai cit lài, cau pal geh cit in.

Đơs tàm dơ̆ lơh broă, Thủ tướng Phạm Minh Chính đơs loh, tàm tơngai kòp bơ tờp gơlik geh kal ke bè tŭ do mờ jơi tam gơl să pa, bol he pal geh broă lơh pa, pơn jat tai lơh sir nàng lơh niam rlau tai, tài làng bol mờ drơng lơh. Chính phủ lơh ngan bơt bơtàu dùl Chính phủ tam gơl pa, song dơpă, jat kơrnuat, lơh broă, geh cồng nha tài làng bol mờ drơng lơh. Pơn jat tai tơnguh cồng nha lơh geh, tơnguh niam rlau tai gơ rềng Đảng đơng lam bồ, dà lơgar atbồ, làng bol lơh tờm bơh Mặt trận dà lơgar, mpồ lơh broă chính trị mpồl bơtìan, tus bal tă pơgồp jơnau đơs, cribơyai bal. Thủ tướng đơs nền, làng bol ờ mìng là anih tờm mờ gam là cau tờm bơh broă lơh sơndră kòp bơ tờp dê.

Thủ tướng đơs loh, broă lơh lam sồr làng bol tàm anih lơh broă hành chính dà lơgar pa lơh jat bơta đơng lam bơh Đảng dà lơgar dê, pơgồp bơnah lơh gơlik bơta tam gơl pràn kơldang, dong kờl làng bol geh rài kis kal ke. Thủ tướng đơs nền, mờng chài bơh dơ̆ sơndră kòp lài do ai gŏ, broă hòi jà bơta pràn làng bol, nùs nhơm tam klac dờng jơh gùt jơi bơtìan geh gơtha kuơmàng ngan. Pal hòi jà làng bol tus bal nàng sền gàr să tờm khi dê. Thủ tướng đơs: “Bác Hồ neh đơs, lam sồr làng bol jak den broă lơi kung geh cồng nha, Bác Hồ kung tơngkah tơn là, mpồl cau bơh làng bol dê là uă ngan, broă lam sồr làng bol là kuơmàng ngan, ờ gơtùi ming ngui sră ƀău, sră pơ àr, mít tinh, jơnau đơs, sră cih jơnau tơnggit, jơnau sồr là tơl, Bác Hồ đơs lài ngan rlau jơh là pal jòi tơl broă mblàng lơh loh ai tơl nă làng bol in git loh bơta kuơ khi in, là kơ nòl bơh khi dê, khi pal jơh nùs lơh gơ in gơtùi, he ờ gơtùi mìng đơs ờ, bol he pal lam sồr, hòi jà, pơlam làng bol, bol he pal hòi jà làng bol tơnguh jơnau git wă, tài pràn kơldăng să jan să tờm khi dê, pràn kơldang să jan mpồl bơtìan dê, tài bơta bơtàu tơnguh bơh dà lơgar dê”.

Đơs lài kòp bơ tờp tàm tơngai tus kung gam gơlik geh kal ke, ngan là tàm ƀòn dờng Hồ Chí Minh mờ ală càr, ƀòn dờng tiah đah jum dà lơgar. Den tàng pal lơh jat nền nòn ală jơnau sồr bơh Đảng, dà lơgar dê bè rơcang sơndră kòp Covid-19. Mặt trận dà lơgar mờ ală mpồl lơh broă chính trị mpồl bơtìan pal sơlơ chul chồl, gròi sền; dong kờl mờ ală broă lơh krơi is. Pal sền gàr lơngap lơngai, ring lơngai ờdo ờdă mpồl bơtìan, dong làng bol iang nùs, lơh jat niam ală jơnau sồr bè rơcang sơndră kòp. Thủ tướng đơs nền bè kơ nòl broă tơnguh gơ noar broă bơh lam sồr làng bol dê tàm ală broă gơlik geh kal ke, kuơmàng là tàm tơngai kòp dờng Covid-19 dê: “Añ sồr Ban Dân vận ală oh mi pơn jat tai tơnguh gơnoar broă tŭ geh broă gơlik geh kal ke. Ban Dân vận đơng lam, pơgồp bal mờ Mặt trận dà lơgar Việt Nam, ală mpồl lơh broă chính trị mpồl bơtìan, anih lơh broă, mpồl lơh broă geh gơ rềng lam sồr đoàn viên, cau tàm mpồl, làng bol lơh jat bơta đơng lam bơh kấp ủy, gơ noar atbồ, tơnguh gơ noar lơh tờm chính trị, tus bal mpồl lam lài. Pơlam lơh jat, lam sồr kuang bàng, Đảng viên làng bol lơh jat gùng dà broă lơh bơh Đảng, adat boh lam bơh dà lơgar dê mờ ală broă lơh ngan ngồn, tơnguh gơ noar lơh tờm bơh làng bol dê, tơnguh nùs nhơm lơh ngan mờ bơta pràn tam klac dờng jơi bơtìan, lơh gơlik bơta ring bal mpồl bơtìan sơlơ gàr kơ̆ bơta pin dờn bơh  làng bol dê gơ wèt tus mờ Đảng, dà lơgar”.

Gơ wèt mờ Mpồl cau ling yau, nùs nhơm kung gam là mpồl ling tam lơh, lơh broă mờ lơh sa. Đoàn ơruh pơnu Cộng sản Hồ Chí Minh tơnguh ală srơh lam lài, pal lam lơh wơl jơh nùs mờ ơm rềp kấp hơ đơm, git loh broă gơlik geh tàm làng bol. Mpồl tam klac cau ùr Việt Nam, Mpồl cau lơh broă sa Việt Nam... pa hòi jà jơh ală cau tàm mpồl tus bal broă lơh rơcang sơndră kòp. Công đoàn kung lam hòi jà đoàn viên tus bal tă pơgồp, dong kờl broă lơh rơcang sơndră kòp. Mặt trận dà lơgar mờ ală mpồl lơh broă chính trị mpồl bơtìan kung pal ơm rềp kấp hơ đơm sơl.

Thủ tướng kung tơngkah, tàm broă dờp cau kòp pal đơs nền nùs nhơm mut tàm hìu sơ nơm lài, sră nggal lơh tơ nơ̆. Bơdìh mờ sơm kòp ai ală cau kòp F0 tàm hìu sơ nơm in mờ tam cah is F0 tàm hìu den Bộ Y tế gơùi kơlôi sơ nơng sơm kòp ai ală cau kòp ờ di tàm hìu sơ nơm halà tàm hìu mờ sơm khat tàm tiah lơi geh anih ha pah niam mờ nùs nhơm tam cah is cau mờ cau. Lam lơh broă lơh sơ nơm đông y, tây y pơgồp bal. Bộ Lao động-Thuơng binh mờ Xã hội kơlôi sơ nơng, ngui ală gùng dà bơh Đảng, adat boh lam bơh dà lơgar dê gơ wèt tus mờ ală cau tus bal mpồl lam lài sơndră kòp, ngan là pà khà jờng bè nùs nhơm mờ phan bơna, broă lơh jờng rơ.

Cau mblàng K’Duẩn