VOV4.K’ho -  Ala\ cau bác sỹ bơh Khoa cấp cứu hồi sức –Hiu sơnơm dờng càr Daknông sùm geh lơh broa\ mang bè  ngai, mhar dong sơm kòp bơh sơnrờp  cau kòp in bơh kòp jrua\.

            Mờ Khoa hồi sức cấp cứu, ala\ cau kòp geh mut tus sùm geh tàm sa\ ala\ bơta kòp hala cau gơbàn rềs àr kơnjơ\ ngan, kờ` pal geh kòp mhar mo, sơbac mo kờ` cau kòp ba` gơbàn ngòt rngơt tus màng kis. Tàm khoa do bơh Hìu sơnơm dờng càr Daknông geh 17 jơ nờng piam kòp, 12 nơm ma\y leh nhân tạo, 26 bác sĩ  bal mờ cau điều dưỡng sùm lơh broa\ tàm hìu sơnơm. Bác sỹ Mai Đức Tuấn lơh broa\ tàm khoa cấp cứu, ai git:

            Khoa hồi sức cấp cứu la dùl tàm ala\ gah lơh broa\ kong jơh bơta  aniai. Mìng cau lơh broa\ bal  hơ\ sồng wa\ geh bơta bòl glar  gah dê, tài geh nàng  lơh broa\ mờ hìu nha\ ờ wa\ mờ git bal, tam pà bal jơnau den kung kal ke ngan, geh ala\ bơta tam jơ  jra` dềt mờ geh tu\ geh lơh  kal ke tàm broa\ sền gàr niam hìu nha\.

            Tơnơ\ ala\ dơ\ cấp  cứu bơh sơnrờp den broa\ sền gàr cau kòp kung kuơ màng ngan. Ala\ y bác sỹ tàm do pal geh ala\ tơmoh di, di bơta kòp bơh cau kòp nàng geh  sơm kòp di pal mo, tơnơ\ hơ\ geh cèng tus ala\ khoa kòp ndai di pal.  Bulah ờ di kòp lơi kung geh dong kờl  klàs mờ chơt, mơya ngan la ala\ bác sỹ, cau  dong broa\ tàm khoa  do sùm pal lơh broa\ jơh nùs. Điều dưỡng Nguyễn Thị Lũy đơs:

            Cau kòp tus den he pal lơh ngan tơl tu\, tơmoh kòp di pal  mờ dong kờl mo di pal, hơ\ la adat neh git ngan bơh ala\ oh mi bác sỹ,  điều dưỡng. He sền  cau kòp bè cau pròt mhàm he dê, ờ ngòt bòl glar kal ke lơi.

            Cau kòp Đặng Quang Nghị gơbàn tai biến bơceh gùng mhàm tàm tơngoh bơh kòp gơguh  mhàm (Dà  yoan la huyết áp cao).  Tơnơ\ dùl nhai geh sơm kòp tàm khoa hồi  sức cấp cứu- Hìu sơnơm dờng càr Daknông, bơta jê sa\ ồng dê neh gơ pơ rài ua\ ngan. Ala\ y, bác sỹ gam jơh nùs ngan pơlam cau kòp tàm broa\ sền gàr cau kòp di pal. Lo\ Đặng Thị Quyên kòn ùr ồng Đặng Quang Nghị gam ròng bèp tàm hìu sơnơm, boh bơr:

            Bèp a`  tu\ mut tàm gah sơm kòp do dùl ngai, den mè a` dan hìu sơnơm ai bèp a` geh lòt Sài Gòn nđờ jơt  ngai  tàm hơ\ den tài hìu sơnơm gal ir den tàng ai rê sền gàr tàm do. Bic tàm do rlau 2 nhai den a` go\ bèp a`  neh pơ rài ua\ rlau  tu\ hờ Sài Gòn, ala\ bác sỹ tàm do sền gàr cau kòp nền nòn ngan,  lơh broa\ dong kờl  cau kòp jơh nùs nhơm.

            Bal mờ broa\ niam tu\ geh tam tìp mờ kham sơm kòp cau kòp in den ala\ y bác sỹ bơh khoa hồi sức cấp  cứu neh pơ gồp dong kis ala\ cau kòp ngòt rngơt  lời wơl khi in geh kis rài kis pa. Ala\ y bác sỹ tàm do mùl màl di pal ngan mờ jơnau bơto bơh Bác Hồ dê: Cau lơh sơnơm bè cau mè niam.

           Bè gơnoar, kơnòl mờ gùng dà tơnguh bơtàu bơh khoa hồi sức cấp cứu, bác sĩ Trần Duy Dũng, Phó kuang atbồ hìu sơnơm càr Dak Nông pà g^t loh làng rơlao.

         - Ơi, ơ bác sĩ, khoa hồi sức cấp cứu là 1 tàm ală gah sơm kòp tòm hìu sơnơm dê. Bác sỹ gơtùi pà g^t gơnoar mờ kơnòl bơh gah sơm kòp do dê?

Bác sĩ Trần Duy Dũng: Khoa hồi sức cấp cứu là khoa krơi is mờ kuơ màng ngan hìu sơnơm dê. Gơnoar tòm bơh gah sơm kòp do dê là dờp, kham, sơm kòp jơh ală cau kòp in, gơrềng tơn tus mờ màng kis cau kòp dê. Mờ bơta krơi is là hìu sơnơm pa lơh bè hìu sơnơm càr Dak Nông, ală gah sơm kòp tu\ do ờ hềt di pal mờ broă hồi sức cấp cứu. Den tàng, ală kòp jroă khoa hồi sức cấp cứu dờp là 1 tàm ală khoa sơm kòp kuơ màng hìu sơnơm dê.

          - Mờ bơta kuơ màng bơh gah sơm kòp do dê den gah lơh sơnơm càr Dak Nông neh ai tơl bơta niam bè lơi kờ` y, bác sĩ lơh broă sơlơ ngai sơlơ jăk chài rơlao?

           Bác sĩ Trần Duy Dũng: Mpồl đơng lam hìu sơnơm kung neh ai kờ` tơnguh bơta pràn tàm broă lơh bơh khoa do dê, den pal geh tơl cau lơh broă bal mờ phan bơna, măy mo\k, hơ\ là bơta pal geh kờ` kham, sơm kòp, kuơ màng ngan là broă hồi sức cấp cứu. Hìu sơnơm càr kung lơh broă bal mờ 5 hìu sơnơm tàm [òn dờng Hồ Chí Minh, hơ\ là hìu sơnơm Chợ Rẫy, hìu sơnơm Hồ Chí Minh, hìu sơnơm Từ Dũ, hìu sơnơm Nhi đồng 1, hìu sơnơm Nhi đồng 2, hìu sơnơm chấn thương chỉnh hình kờ` bơto kuang bàng, cau lơh broă in. Kuơ màng ngan tàm nam 2017 do, hìu sơnơm càr Dak Nông geh bơtơl là hìu sơnơm vệ tinh hìu sơnơm Chợ Rẫy dê, do là bơta niam ngan. Khoa hồi sức cấp cứu tu\ do geh 6 nă bác sỹ, mơya geh 2 nă bác sỹ gam lòt bơsram tàm [òn dờng Hồ Chí Minh, 1 nă bác sỹ gam lò bơsram chuyên khoa 1, 1 nă bác sỹ geh bơsram chuyên khoa bè broă hồi sức cấp cứu.

          - Ơ bác sĩ, tàm khoa hồi sức cấp cứu sùm gơbàn gal ir cau kòp tus piam kòp. Gah sơm kòp do neh lơh ală broă lơi kờ` bơsong broă do?

           Bác sĩ Trần Duy Dũng: Mùl màl hìu sơnơm càr Dak Nông mìng gơbàn gal ir cau tus piam kòp jăt kàl mờ jăt mờ bơta kòp gơtòp. Bè tàm dơ\ kòp xốt xuất huyết nam 2016. Khoa hồi sức cấp cứu kung bè hìu sơnơm bol a` pal geh ală broă lơh. Lài ngan là bol a` lơh rơndăp broă sơndră mờ gal ir cau di lah gơbàn. Tàm rơndăp broă do geh tam pà mùl màl tus mờ kuang bàng, bác sỹ, cau lơh broă tàm khoa hồi sức cấp cứu mờ ală khoa ndai tus dong kờl di lah gal ir cau tàm broă sơm kòp cau kòp in. Dơ\ 2 là bol a` neh ai tai jơnờng piam kòp ơn tơn tàm ờ uă jơdu\ khoa hồi sức cấp cứu, rơcang ngui di lah gal ir cau tus piam kòp kờ` sơm kòp cau kòp in. Tàm rơndăp broă do, Mpồl kuang atbồ hìu sơnơm neh đơng lam sùm, prăp tơl ală phan lơh broă mờ pah nam sền wơl ală bơta phan lơh broă di lah ờ tơl den blơi tai bè sơnơm, hoá chất kờ` geh tơl di pal mờ broă geh gal ir cau tus piam kòp kung bè tu\ kòp gơtòp gơbàn, di pal mờ broă sơm kòp cau kòp in.

           - Ơi dan ưn ngài bác sỹ!