VOV4.K’ho- Tàm ngai òr (09/11), Quốc hội neh cri bơyai bè broă lơh jăt Kes priă Dà lơgar nam 2021, kờp dŭ kes priă Dà lơgar, gùng dà broă tam pà kes priă dà lơgar nam 2022 mờ lơh rơndăp broă priă jền-kes priă Dà lơgar 3 nam bơh nam 2022 tus 2024.

Gùng dà broă lơh nàng chồl pràn broă tơnguh bơtàu lơh sa mpồl bơtiàn, tàm hơ̆ uă ngan là broă tam pà kes priă dà lơgar nam 2022 bè lơi nàng ngui geh cồng nha bơta pràn dà lơgar dê, do là tơngu me geh uă kuang bàng pơn jăt tai geh jơnau đơs. Geh ờ uă jơnau đơs là, broă lơh jăt ală broă lơh jăt jơnau kờñ dà lơgar gam lơyài ngan. Kuang bàng ring bal broă tam gơl priă 16 rơbô tơmàn bơh nam 2021 tus nam 2022 nàng tơrgùm khà kes priă Dà lơgar ai broă lơh jăt ală broă lơh jăt jơnau kờñ dà lơgar tàm nam 2022 geh là 24 rơbô tơmàn đong. Bơta do gàr niam priă lơh jăt jơnau kờñ ală broă lơh neh geh ai, di pal mờ jơnau kơ̆p kờñ bơh làng bol, cau tĕ khà, tàm hơ̆ uă ngan là tàm tiah kơh bơnơm, tiah kal ke. Ală kuang bàng kơlôi là, broă wah, tam pà gơnoar pràn rơlao là broă lơh geh cồng nha nàng broă tam pà priă geh mhar, di tŭ, bơh tŭ hơ̆ kờñ lơh jăt broă ai priă. Do kung là jơnau kờñ geh ai tàm broă chồl pràn broă bơcri priă dà lơgar di mơ tơngai, nàng ai bơcri priă dà lơgar lam sồr, lam lơh bơcri priă mpồl bơtiàn.

Cau mblàng Ndong Brawl