VOV4.K’ho- Bơta gĭt mờ ngui drơng broă priă jền bơh làng bol tàm tiah ƀòn lơgar, tiah sar lơgar ngài dê gam ờ hềt uă. Do là bơta geh ngan geh đơs tàm dơ̆ cribơyai “Tơnguh priă jền tơl làm wèt tus bơtàu tơnguh kơ̆ kơl jăp lơh broă sa sươn sre, ƀòn lơgar tàm Việt Nam bơh Sră ƀăo Ngân hàng, Ngân hàng Dà lơgar Việt Nam bơyai lơh.

Tus lồi nhai 10 nam do, priă càn drơng bơtàu tơnguh lơh broă sa sươn sre, ƀòn lơgar lơh geh mờr 2 tơlak 500 rbô tơmàn đong, gơguh 9,2% pơndrờm mờ nam 2020, geh tus 25% priă càn bal jơh gùt rài lơh sa dê. Mơya, bal mờ ală cồng nha lơh geh, broă lơh priă jền tơl làm wèt tus bơtàu tơnguh kơ̆ kơl jăp lơh broă sa sươn sre, ƀòn lơgar kung gam ală bơta ờ hềt niam sơl. Sền bè bơta tơl pràn geh càn bơh làng bol dê gơwèt mờ ală drơng broă bơh ală ngân hàng dê ai, tŭ do kung gam geh sơl bơta lin uă ngan đah tiah ƀòn dờng, ƀòn drà mờ tiah ƀòn lơgar, đah ală ƀòn dờng dờng mờ ală càr tiah sar lơgar ngài. Ồng Nguyễn Kim Anh- Phó Kuang ătbồ Ngân hàng Dà lơgar Việt Nam đơs, ală broă dong kờl kờñ pal wèt tus bơsong mhar bơta geh ngan do.

Cau mblàng Lơ Mu K’Yến