VOV4.K’ho- Kơnhoàl ù tiah nhàr lơgar là ù tiah kuơmàng ngan bè sền gàr dà lơgar, lơngăp lơngai bơh tơl dà lơgar dê. Bơ̆t bơtàu, ătbồ, sền gàr tiah nhàr lơgar bơh dà lơgar dê geh bơta kuơ dờng màng ngan bè chính trị, lơh sa- mpồl bơtiàn, lơngăp lơngai, sền gàr dà lơgar mờ lơh broă mờ lơgar ndai. Do là kơnòl bơh Dà lơgar mờ jơh gùt làng bol dê, lài ngan là bơh gơnoar ătbồ mờ làng bol kơnhoàl ù tiah nhàr lơgar mờ ală mpồl phàu crong làng bol dê.

Bơta 7, Adat Sền gàr tiah nhàr lơgar Việt Nam dê cih: “ Làng bol kis tàm kơnhoàl ù tiah nhàr lơgar geh kơnòl tus bal bơ̆t bơtàu rài sền gàr dà lơgar jơh gùt làng bol, nùs nhơm rơcăng lài sền gàr tiah nhàr lơgar jơh gùt làng bol mờ ală srơh sền gàr gơnoar tờm ù tiah dà lơgar, ù tiah dà lơgar, tiah nhàr lơgar bơh dà lơgar dê, sền gàr bơta lơngăp lơngai, rơndăp tăp sèng, ờdo ờdă jơh gùt mpồl bơtiàn tàm kơnhoàl ù tiah nhàr lơgar, mpồng nhàr lơgar”.

Kơrnoat sồ 33 ngai 28/09/2018 bơh Bộ Chính trị dê bè Broă lơh Sền gàr tiah nhàr lơgar dà lơgar cih nền “Ătbồ, sền gàr tiah nhàr lơgar dà lơgar là kơnòl tờm kuơmàng ngan, sùm sùm bơh jơh gùt Đảng, gùt làng bol gùt ling klàng mờ jơh gùt ală anih lơh broă chính trị dê; kơnờm tàm làng bol, ai làng bol lơh tờm “tơl nă làng bol kis tàm tiah nhàr lơgar là dùl nơm jrong nhàr lơgar kis”.

Lơgar he geh gùng nhàr lơgar jòng, lòt gan uă ƀòn lơgar geh ù tiah kal ke, ngài ngan; mpồl cau sùm lơh kơnòl broă ờ gơtùi ai cau lơh broă tàm jơh gùt ală gơl gùng nhàr lơgar ờ. Den tàng bè hơ̆, broă ătbồ sền gàr tiah nhàr lơgar dà lơgar pal kơnòm tàm làng bol, mờ să tờm tơn là làng bol ală jơi bơtiàn kis tàm kơnhoàl ù tiah nhàr lơgar. Do là mpồl cau dong kờl mpồl ling sền gàr tiah nhàr lơgar tàm broă gĭt broă gơlik geh tàm gùng nhàr lơgar, jrong nhàr lơgar dà lơgar dê, broă lơh lòt bơh ală cau dê tàm tiah nhàr lơgar. Làng bol kung sùm tam phan, lơh sa tàm tiah nhàr lơgar, jơh ală broă gơlik geh lơh tìs gơnoar tờm ù tiah dà lơgar dê, broă lơh lòt bơh ală cau dê ndrờm ờ rơgơi pleh klàs bơh măt sền tồr iăt bơh làng bol dê. Den tàng bè hơ̆, kờñ ătbồ, sền gàr kơ̆ kơl jăp gơnoar tờm ù tiah dà lơgar, lơngăp lơngai tiah nhàr lơgar dà lơgar, lài ngan pal bơ̆t bơtàu “nùs nhơm rơcăng gàr lài tàm làng bol”, ơm bal, sa bal mờ làng bol.

Bơta geh ngan pà gŏ, bơta tus bal bơh mpồl cau kra ƀòn, cau kuang ƀòn, cau geh bơngă pin dờn, mpồl cau ùr, mpồl ơruh pơnu dê...tàm ală tiah tàm ală nam do neh dong ai ală srơh “làng bol sền gàr lơngăp lơngai thôn, ƀòn”, “srơh ătbồ is gùng nhàr lơgar, jrong nhàr lơgar dà lơgar dê” pràn kơldang kơ̆ kơl jăp, pơgồp bơnah gàr kơ̆ gơnoar tờm ù tiah dà lơgar, lơngăp lơngai rơndăp tăp sèng tàm kơnhoàl ù tiah nhàr lơgar. Ồng Phùng Quốc Tuấn- Thiếu tướng, Phó Chính ủy Mpồl ling sền gàr tiah nhàr lơgar dà lơgar Việt Nam dê, pà gĭt: Lơh jăt Broă lơh pơgồp bal mờ Ủy ban Jơi bơtiàn kòn cau bè broă “Hòi jà làng bol ală jơi bơtiàn kòn cau bơtàu tơnguh lơh sa- mpồl bơtiàn, tus bal sền gàr gơnoar tờm ù tiah dà lơgar, lơngăp lơngai tiah nhàr lơgar dà lơgar dê”, Gah đơng lam Mpồl ling sền gàr tiah nhàr lơgar dà lơgar Việt Nam dê neh sồr ală mpồl ling tàm jơh gùt mpồl ling kĭ hơ Broă lơh pơgồp bal mờ Ban, Phòng jơi bơtiàn kòn cau ală càr, ƀòn dờng, kơnhoàl tiah nhàr lơgar; mơkung rơcăng lài dong kờl ai Kấp ủy, gơnoar ătbồ tiah hơ̆ in lam lơh jăt geh cồng nha ală tơngume neh kĭ hơ.

Ồng A Jú là cau kra ƀòn kis tàm xã Sa Loong, kơnhoàl Ngọc Hồi, càr Kon Tum bal mờ kuang bàng, cau ling Pôs đồng ling sền gàr tiah nhàr lơgar lòt sền gàr tiah nhàr lơgar (Rùp Khoa Điềm dê cùp”

Ồng Phùng Quốc Tuấn- Thiếu tướng, Phó Chính ủy Mpồl ling sền gàr tiah nhàr lơgar dà lơgar Việt Nam dê đơs: Hòi jà làng bol lơh jăt niam ală jơnau sồr, gùng dà broă lơh bơh Đảng, kơrnoat boh lam bơh Dà lơgar dê, mờ tơnguh uă cồng nha lơh geh, broă lơh niam, broă lơh jak tàm ƀòn lơgar kơnă hơđơm, lơh bè lơi pơn jăt tai mblàng yal hòi jà làng bol lơh niam rlau jơh, cồng nha rlau tai, lơh bè lơi làng bol pin dờn tàm bơta đơng lam bơh Đảng dê mờ pin dờn, kờñ gơboh mpồl ling sền gàr tiah nhàr lơgar.

Ală nam tus, broă tam pìt tam phà gơnoar tờm ù tiah dà lơgar gam gơbàn kal ke, ală lơgar dờng ngui “bơta pràn ờ di là phàu crong dờng” lơh gơlik bơta pràn rồn bơklơn bè chính trị, lơh sa, ling klàng, lơh broă mờ lơgar ndai, gơgràm ù tiah nhàr lơgar bơh ală dà lơgar ndai dê, geh tŭ là jòi kai kờñ “wăc sềr wơl rùp ù tiah” gùng nhàr lơgar. Tàm lơgar, ală mpồl cau gơjrañ kơuềng, pơrlơ̆ dră mờ dà lơgar sùm lơh pràn ală broă lơh tam dră, lơh aniai tàm ală gah broă lơh; broă lơngăp lơngai ờ geh bơh lài, bơta ntrờn ơm kis khăt gơboh, ƀơ̆ ƀơl tiah ơm kis, tam gơl trồ tiah, cau lơh tìs bè ma túy, tăc bro cau, cau lơh tìs gan dà lơgar, gan tiah nhàr lơgar, lik mŭt mờ lơgar ndai tìs mờ kơrnoat boh lam, kă bro kơñau, blơ̆ blăc kă bro mờ uă jơnau jòi kai rơlăc rơliang ngan, kal ke ngan gròi sền...Lơh sa- mpồl bơtiàn, rài kis bơh làng bol mờ mpồl phàu crong dê tàm kơnhoàl ù tiah nhàr lơgar gam tìp uă kal ke. Ală bơta ƀươn mờ bơta lòng geh gơrềng tơn tus bồ tơngoh, nùs nhơm, broă lơh bơh tơl nă cau dùl nă să is dê, mpồl cau dê, ngan là làng bol ală jơi bơtiàn kis tàm tiah nhàr lơgar, tiah sar lơgar ngài.

Den tàng bè hơ̆, ală mpồl lơh broă geh gơnoar pal pơn jăt tai lơh pràn mblàng yal, bơto bơtê tơnguh uă bơta gĭt wă mờ kơnòl ai làng bol in bè gùng dà bơh Đảng, gùng dà broă lơh, kơrnoat boh lam bơh Dà lơgar dê mờ ală bơta hơ pơrgon dunia bè geh gơrềng tus tiah nhàr lơgar dà lơgar; gĭt wă di jơnau jòi kai, broă kờñ tam dră lơh aniai, broă lơh sơgràm gơnoar tờm ù tiah dà lơgar, sơgràm bơta kuơ dà lơgar, jơi bơtiàn tàm kơnhoàl ù tiah nhàr lơgar. Pơn jăt tai tus bal bơ̆t bơtàu, lơh kơ̆ kơl jăp ală anih lơh broă chính trị ƀòn lơgar tàm kơnhoàl ù tiah nhàr lơgar pràn kơldang kơ̆ kơl jăp, lơh jăt geh cồng nha Kơrnoat sồr sồ 01 bơh Thủ tướng Chính phủ dê bè “ Bơyai lơh srơh jơh gùt làng bol tus bal sền gàr gơnoar tờm ù tiah dà lơgar, lơngăp lơngai tiah nhàr lơgar dà lơgar tàm tŭ tơngai pa”. Kơnờm tàm làng bol, ai làng bol lơh tờm, nàng “tơl nă làng bol kis tàm tiah nhàr lơgar là dùl jrong nhàr lơgar kis”, den hơ̆ sền gàr gùng nhàr lơgar, jrong nhàr lơgar bơh dà lơgar dê sùm geh gam wơl bè ờs, gơnoar tờm ù tiah dà lơgar dê sùm geh gàr kơ̆.

Cau cih VOV4- Cau mblàng Lơ Mu K’Yến