VOV4.K’ho- Broă lơh Jơnau kờñ Dà lơgar dê bè Tơrmù rƀah kơ̆ kơl jăp jŏ jòng tơngai bơh nam 2021- 2025, jăt kờp dŭ Dà lơgar geh lời 75 rbô tơmàn đong, tàm hơ̆ priă Dà lơgar dê là 48 rbô tơmàn đong; Kes priă Ƀòn lơgar dê là rlau 12 rbô 600 tơmàn đong ai broă lơh tơrmù rƀah in gơwèt mờ cau là hìu bơnhă rƀah, hìu bơnhă mờr ndrờm bè hìu bơnhă rƀah, hìu pa jơh rƀah tàm làm gùt lơgar, sền gròi uă tus ƀòn lơgar gam uă kal ke. Broă bơcri priă ai broă lơh in là kờñ ngan jal mhar ngan mơya nàng kơ̆ kơl jăp jŏ jòng den kung gam uă broă kờñ pal cribơyai sơl.

Jăt Bộ trưởng Bộ Lao động, Thương binh mờ Xã hội ồng Đào Ngọc Dung dê yal, tŭ do, uă kơnhoàl rƀah, xã, tiah ƀlàng rềp kềng dà lềng mờ bồt bơlào ờ hềt lik klàs bơh bơta kal ke uă ir. Ală ƀòn lơgar do là tiah “gam rƀah uă”, geh ù tiah ƀòn lơgar kal ke ngài ngan, lơh sa- mpồl bơtiàn mờ phan bơna gam kal ke, geh khà hìu bơnhă rƀah uă, bàr pe tiah khà hìu bơnhă rƀah là rlau 40 tus 50%. Cồng nha tơrmù rƀah ờ hềt ngan ngồn kơ̆ kơl jăp jŏ jòng tàm bàr pe tiah; khà gơbàn rƀah wơl, khà hìu bơnhă rƀah pa gơbàn gam uă tài bơh trồ tiah, dà kŏ dà cò, kòp tê jê să, kòp bơtờp lơh aniai.

Den tàng bè hơ̆, jơnau kờñ bal bơh broă lơh dê là tơrmù rƀah uă bơta, glòm jơh, kơ̆ kơl jăp jŏ jòng, tơrmù ƀà gơbàn rƀah wơl mờ pa gơbàn rƀah; dong kờl cau rƀah, hìu bơnhă rƀah sơrlèt gan brồ guh tus khà tơl sa, geh dờp tơl ală drơng broă mpồl bơtiàn kuơmàng, tơnguh uă bơta niam rài kis, tơrmù bơta rơgai ờ pràn, krêñ tàm kơnòm dềt; dong kờl ală ƀòn lơgar rƀah klàs bơh bơta rƀah uă ngan ir, làng bol lơh geh bè bơta niam hìu ơm. Ồng Đào Ngọc Dung, đơs: Lơh ngan tơrmù 1/2 khà hìu bơnhă rƀah, hìu mờr ndrờm bè hìu rƀah jăt broă jàu uă bơta bơh Dà lơgar dê, 30% khà kơnhoàl rƀah, 30% khà xã kal ke uă ir, tiah ƀlàng rềp kềng dà lềng, bồt bơlào lik klàs bơh bơta kal ke uă ir, dong kờl lơh tơrlòng lài bơtàu tơnguh rlau 1 rbô broă lơh tơrmù rƀah, lơh gơlik geh broă lơh broă sa kơ̆ kơl jăp jŏ jòng, khà cau lơh broă tàm tiah rƀah, tiah kal ke neh bơsram broă lơh geh 60%, tàm hơ̆ geh sră cơng tàng jơh bơsram, sră dờp jơh bơsram broă lơh mìng pơgăp 25%. Lơh ngan dong kờl hìu bơnhă rƀah, hìu bơnhă mờr ndrờm bè hìu rƀah geh bơh dùl nă cau tàm sơnam lơh broă geh broă lơh kơ̆ kơl jăp jŏ jòng, 90% hìu rƀah, hìu mờr ndrờm bè hìu rƀah geh priă lơh geh, geh ngui ală drơng broă điện thoại, internet.

Bè jơnau kờñ mờ Bộ trưởng Bộ Lao động, Thương binh mờ Xã hội ồng Đào Ngọc Dung neh đơs, dilah lơh jăt geh cồng nha, den tềng đăp măt kờñ pal geh ală kơlôi sơnơng jơnau sền swì jơnau bơh tài ờ hềt lơh geh cồng nha bơh broă lơh tơrmù rƀah tàm tơngai lài dê. Bơta tàm rơndăp tàm rơndồl bơh ală broă dong kờl, priă bơcri ờ hềt geh cồng nha, tàm hơ̆ pal sền gròi tus tam gơl bơta gĭt wă bơh să tờm cau geh dờp bơta dong kờl dê tơn, mờ tàm do là cau rƀah. Bơta do geh ồng Phạm Đình Thanh- Kuang bàng Quốc hội càr Kon Tum đơs: Tŭ do, cau rƀah, cau mờr ndrờm bè cau rƀah là làng bol jơi bơtiàn dùl êt nă cau geh tus khà uă ngan. Tàm jơnau kờñ geh cih tàm Kơrnoat sồr là tơrmù broă gơbàn rƀah wơl, gơbàn rƀah pa den pal tam gơl bơta gĭt wă bơh làng bol jơi bơtiàn kòn cau dùl êt nă cau dê mờ cau rƀah dê. Mìng geh broă lơh hơ̆ den hơ̆ sồng gơtùi kơ̆ kơl jăp, jŏ jòng. Dong kờl kàr lơi mơya cau ờ bài tam gơl den jơh dong kờl là gơbàn rƀah wơl.

Uă kuang bàng geh jơnau đơs, nàng broă lơh tơrmù rƀah mùl màl kơ̆ kơl jăp jŏ jòng den kung kờñ pal sền gròi uă tus broă bơto broă lơh, lơh gơlik geh broă lơh broă sa ai làng bol in, geh ală bơta sền swì, lùp sền wơl broă lơh jăt broă lơh tơrmù rƀah tàm tơl ƀòn lơgar dê lơh bè lơi nàng gơ in dipal mờ tơl ƀòn lơgar, tơl nă cau, bañ ngui mờ đòm jăt dùl bă bal bal, “sền ndrờm gơ̆p bal”. Mò Nguyễn Thị Lan Anh- Kuang bàng Quốc hội càr Lào Cai sơñio loh bè do: Gơwèt mờ ală cau rƀah, mpồl cau ờ pràn do, neh rƀah den ờ huan geh jơh ală bơta, bơh broă rơcăng lài, bơh broă lơh gơlik geh broă lơh broă sa, geh tŭ tơm bơh bơr, tìp măt ndrờm ờ huan gĭt ngan. Bol he pal sền gròi tus broă lơh ală xã, ală tiah, sền gròi dong kờl ai ală hợp tác xã in, ngan là tàm tiah kơh bơnơm, tiah kal ke uă ir...tàm rơndăp broă lơh bơtàu tơnguh broă lơh broă sa kờñ pal jàu gơnoar ai cau ùr in.

Tàm rơndăp broă lơh Broă lơh Jơnau kờñ Dà lơgar dê bè tơrmù rƀah kơ̆ kơl jăp jŏ jòng kung kờñ pal geh ală bơta bơtơl, tài bơh broă bol he neh gĭt geh kơnhoàl rƀah, xã rƀah, xã tiah nhàr lơgar mơya gam xã kal ke uă ir den ờ hềt gŏ đơs. Bơta do, geh ồng Lê Kim Toàn- Kuang bàng Quốc hội càr Bình Định, sồr: Bè ƀòn lơgar den añ sồr là kơnhoàl rƀah, xã rƀah kal ke uă ir gơ ơm tàm anih lơi kung di lơm, tiah kơh bơnơm kung di sơl, tềng ƀlàng, rềp kềng gah dà lềng kung di sơl mơya gơ là xã kal ke uă ir den geh ai lài...dilah mìng gĭt tiah ƀlàng kềng gah dà lềng...den digơlan là geh rlau gơmŭt cau ndai.

Hơđang do mìng là dùl tàm gĭt nđờ rhiang jơnau đơs tă pơgồp bơh ală kuang bàng Quốc hội dê tàm ală dơ̆ pơrjum tàm mpồl, broă tơrgùm wơl sền swì wơl broă lơh digơlan geh Quốc hội sền swì tam gơl mờ ai tơlik ală gùng dà broă lơh loh làng tàm tơl broă lơh. Geh gĭt, priă jền dan lơh jăt Broă lơh Jơnau kờñ Dà lơgar dê bè tơrmù rƀah kơ̆ kơl jăp jŏ jòng tơngai bơh nam 2021- 2025 geh tam gơl gơmù bơh 90 rbô tơmàn đong gam wơl 75 rbô tơmàn đong, mơya jăt ồng Nguyễn Đức Hải- Phó Chủ tịch Quốc hội đơs, Quốc hội mờ Chính phủ geh pơn jăt tai geh ală bơta tam gơl lơh bè lơi nàng priă jền in tơl, dipal nàng lơh jăt niam ală bơnah broă bơh broă lơh dê.

Cau cih VOV4- Cau mblàng Lơ Mu K’Yến