VOV4.K’ho – Tàm dơ\ pơrjum bơh Ủy ban Thường vụ Quốc hội dê tàm lồi nhai 4 pa do, ală kuang bàng neh sền sơ wì bè Jơnau yal bơh Chính phủ dê bè cồng nha lam lơh jat tềm pềr, rơcang sơndră hoàc huơr nam 2019. Tàm tu\ dà lơgar gam gơtìp kal ke, kòp Covid-19 gơlik geh kal ke, jơnau lơh bè lơi nàng lam lơh jat tềm pềr, rơcang sơndră hoàc huơr ngai sơlơ pal geh sền gròi, lam lơh jat jơh nùs rlau. Broă đơng pơlam tac phe hờ lơgar ndai geh Chủ tịch Quốc hội, mò Nguyễn Thị Kim Ngân đơs wơl bè dùl jơnau pơlam cơng tàng bè bơta hoàc huơr bơta dong kờl tàm mpồl bơtìan. Ủy ban Thường vụ Quốc hội neh sồr lơh loh ală bộ, gah broă lơh, ală tiah ờ yal cồng nha lam lơh jat tềm pềr, rơcang sơndră hoàc huơr nàng Quốc hội in “sền tìs di krà` cê” tàm Nghị quyết pơrjum dơ\ 9.

Bộ trưởng Bộ Tài chính, ồng Đinh Tiến Dũng đơs loh: Nam 2019, cồng nha tă pria\ bơcri dà lơgar gam lơyài mờ lơh geh lơyah pơn drờm mờ broă rơndap lơh, lơh gơbàn hoàc huơr broă dong kờl. Bơta lơyài ngui ù geh jàu, ơpah, sang gời kung gam gơlik geh. Bơdìh hơ\ tai, mpồl kuang bàng duh broă tàm 2, 3 gah broă lơh, mpồl lơh broă ờ hềt ngan ngồn geh tơrmù, lơh geh cồng nha. Broă lơh niam wơl sră nggal hành chính tàm ua\ tiah kung ờ hềt geh lơh ngan ngồn….

Đơs tàm dơ\ pơrjum, Chủ nhiệm Ủy bal lơh broă mờ lơgar ndai, ồng Nguyễn Văn Gìau đơs là: bơh kòp Covid-19, pal sền wơl bè mờng quèng tàm rài kis. Ồng Nguyễn Văn Gìau đơs nền: Broă tam gơl bơyai lơh chờ, tìp mat geh dong tềm pềr, rơcang sơndră hoàc huơr.

Tơngkah bè bơta hoàc huơr tàm ală rơndap broă lơh bơcri pria\ dà lơgar, Chủ nhiệm Ủy ban lơh sa bơh Quốc hội dê, ồng Vũ Hồng Thanh mblàng lơh loh dùl ròt ală rơndap broă lơh lơyài mờ tơngai neh pơrgon, bulah ală rơndap broă lơh do neh geh Quốc hội sền gròi ua\ ngan, tơlik Nghị quyết bè rơndap broă lơh ai ù lơh [làng rơndeh par Long Thành, rơndap broă lơh gùng rơndeh ntoat rat tiah đah tô – tiah đah jum dà lơgar…

Ồng Vũ Hồng Thanh kung sồr geh ală jơnau sền sơ wì cèng bơta kờp du\ lài bè 2, 3 gùng dà broă lơh neh lam lơh, tàm hơ\ geh broă ơpah rơndeh lơh broă:

“Cau te\ khà kung sền gròi, ơpah rơndeh tàm khà 1 tơmàn 100 tơlak đông, mơya sền go\ ua\ rơndeh geh bàng sồ tơlir geh pria\ tac tàm drà kă bro pơgap bơh 8 tus 10 tơmàn đông, bulah là rơndeh mờng ngui mơya pơn drờm mờ khà ai tơlik den jơnhua ir, bè hơ\ den geh tềm pềr, rơcang sơndră hoàc huơr halà ờ. Pa do Bộ Tài chính lơh krơi lài ơpah rơndeh lơh broă, mơya pal sền sơ wì jơh ală bơta nàng sền cồng nha bè lơi”.

Tàm dơ\ pơrjum, Chủ tịch Quốc hội, mò Nguyễn Thị Kim Ngân sồr: Broă lơh sa kă bro pal sền sơ wì nền nòn rlau bơh gùng dà tus broă lam lơh jat ngan ngồn. Chủ tịch Quốc hội đơs nền dùl broă mùl go\ bè hoàc huơr pria\ jền, tu\ tơngai, tu\ niam bơh mpồl lơh sa kă bro dê là ală kơrnuat gơ rềng tus gùng dà tac phe hờ lơgar ndai pa do:

“Mìng is bè broă tac phe hờ lơgar ndai pa do, bol he lơh kal ke ir, gam kwi kươ, gơ jă gơ jal, tu\ do lơh gơbàn hoàc huơr mpồl lơh sa kă bro in, lơh gơ rềng tus cau tam kòi… là pal sền wơl. Halà ua\ rơndap broă bơcri pria\ gam lơh gơtìp kòl yan bè sră nggal hành chính, ơm wơl dùl ngai den hoàc git nđờ tơmàn đông mơya ờ geh bơsong. Bơta do hoàc huơr halà ờ. Kơ nòl bơh Mpồl kuang bàng duh broă dà lơgar bơsong sră nggal làng bol mờ mpồl lơh sa kă bro in hơ\ sồng ngan ngồn là tềm pềr tàm broă lơh sa kă bro”.

Yal cồng nha lam lơh jat tềm pềr, rơcang sơndră hoàc huơr nam 2019, gah Thanh tra gùt lơgar neh lơh 6 rbô dơ\ thanh tra hành chính, 200 rbô dơ\ lùp sền, sền sơ wì gah broă lơh ờs mờng; git go\ broă lơh tìs bè lơh sa 173 rô tơmàn đông, 22 rbô lồ ù; dan ai wơl tơmut tàm kes pria\ dà lơgar mờr 84 rbô tơmàn đông.

Bộ trưởng Bộ Tài chính, ồng Đinh Tiến Dũng đơs loh:

“Broă lơh tềm pềr, rơcang sơndră hoàc huơr tàm tơl gah broă lơh kung gam ală bơta kal ke, ờ niam bè gam bơta lơh jat ờ hềt jơh nùs tàm 2, 3 bộ, anih lơh broă, ală tiah, tập đoàn, tổng kong ti dà lơgar, bè lơyài tơlik broă lơh lam lơh jat tềm pềr, rơcang sơndră hoàc huơr nam 2019; lơyài yal bè broă lam lơh jat tềm pềr, rơcang sơndră hoàc huơr; tơn jơh sền sơ wì cồng nha lam lơh jat tềm pềr, rơcang sơndră hoàc huơr gam ờ hềt wil tơl, ờ geh jơnau yal, ờ geh khà kờp ngan ngồn bè cồng nha lam lơh jat tềm pềr kes pria\ dà lơgar. Jơnau tờm ngan là tài bơh cau atbồ Bộ, gah broă lơh, anih lơh broă, ală tiah, Tập đoàn, tổng kong ti ờ hềt sền gròi dipal, ờ hềt jàu kơ nòl broă mùl màl ai anih lơh broă cribơyai, dong broă lơh kòn gùng lam lơh jat jơnau cih bơh Adat lam lơh jat tềm pềr, rơcang sơndră hoàc huơr dê”.

Ală kuang bàng ring bal mờ ală jơnau kờ`, broă lơh geh đơs tàm Jơnau yal bơh Chính phủ dê bè broă lam lơh jat tềm pềr, rơcang sơndră hoàc huơr nam 2019. Mơkung sồr Chính phủ đơng lam ală bộ, gah broă lơh, ală tiah lam lơh jat jơh nùs ală jơnau kờ`, broă lơh neh ai tơlik. Chủ nhiệm Ủy ban lơh sa bơh Quốc hội dê, ồng Vũ Hồng Thanh sồr:

“Tàm tơngai tus, kờ` tềm pềr rlau den pal lơh jat jơh nùs rlau tai. Broă tă dơ\ ngui kes pria\, ngui pria\ tă do den 16 rbô 900 tơmàn đông kung kơ nờm geh bơta đơng pơlam bơh Chính phủ dê, ngan là Bộ Tài chính bol he tềm pềr 17 rbô tơmàn đông. Kơ nờm 17 rbô tơmàn đông do nàng drơng kơ nòl tă dơ\ ngui, rơndap tap sèng broă tă dơ\ ngui niam rlau”.

Ủy ban Thường vụ Quốc hội kung sồr lơh loh ală bộ, gah broă lơh, ală tiah, ală mpồl lơh broă ờ yal cồng nha lam lơh jat tềm pềr, rơcang sơndră hoàc huơr nàng Quốc hội in “sền tìs di krà` cê” tàm nghị quyết pơrjum dơ\ 9.

Cau mblàng K’Duẩn