VOV4.K’ho– Poh lài, tàm hìu lơh broă Quốc hội, tềng đap bơta đơng lam bơh Ủy viên Bộ Chính trị, Chủ tịch Quốc hội ồng Vương Đình Huệ, Ủy ban Thường vụ Quốc hội neh mut lơh pơrjum dơ̆ 56. Dùl tàm ală tơngume geh tơrgùm cribơyai, ai jơnau đơs, hơ̆ là jơnau yal bơh Chính phủ dê bè broă lam lơh tềm pềr, sơndră pơhì pơhà nam 2020.

Jơnau yal sền sơwì bè broă lơh lam lơh tềm pềr, sơndră pơhì pơhà nam 2020 ai gŏ, tàm tŭ tơngai kes priă gơmù tài gơ rềng bơh trồ tiah lơh aniai, kòp bơtờp, tam pà ring bal kes priă ală kấp kal ke, Bộ Tài chính neh cribơyai mờ Chính phủ, Thủ tướng Chính phủ đơng lam ală Bộ, Gah broă lơh, ală tiah sơlơ lam lơh ală broă lơh lam lơh tềm pềr, sơndră pơhì pơhà, tềm pềr 10% khà kờp dŭ tă dơ̆ ngui sùm, koh tơrmù priă jền pơrjum, priă lòt lơh broă, tềm pềr tai tă dơ̆ ngui sùm ờ hềt kuơmàng, jal mhar. Kes priă dà lơgar tềm pềr mờr 55 rbô tơmàn đông, ndrờm 5% khà kờp dŭ Quốc hội jàu. Sơlơ lơh jat nền nòn kơrnuat, sơlơ lùp sền, sền sơwì, sền gròi tă dơ̆ ngui kes priă dà lơgar, lơh jat nền nòn broă lơh glài gơwèt tus mờ ală cau lơh tìs, lơh gơbàn hoàc huơr kes priă dà lơgar git gŏ bơh lùp sền, sền sơwì, kờp sền.

Bulah bè hơ̆, bơh broă lơh lùp sền, sền sơwì, kờp sền tă dơ̆ ngui bơh Anih priă jền dà lơgar dê git gŏ gam geh bơta atbồ, ngui kes priă dà lơgar ờ hềt di khà geh ai tơlik, tơl khà, broă dong kờl tàm 2, 3 anih lơh broă, mpồl lơh broă. Đơs tàm pơrjum, mò Lê Thị Nga, Kuang atbồ Ủy ban sền gàr adat boh lam bơh Quốc hội dê đơs là, pal lơh glài mờ đơs lah kràñ ală mpồl, gah broă lơh, ală tiah lơyài ai tơlik broă lam lơh jat tềm pềr, sơndră pơhì pơhà. Kuơmàng, lơh glài kràñ bơta lơh gơbàn hoàc huơr tàm 2, 3 bơta phan kuơ bè phan kuơ tàm ù, ù tiah, brê, dà. Bơdìh hơ̆ tai, gam uă bơta ờ niam tàm broă yal loh làng, song dơpă broă blơi phan bơna ngui bal: “Bol hi đơs là, jơnau lơh ală bơta ờ niam tàm broă blơi, ngui phan bơna bal là tài tàm broă atbồ, đơng pơlam ờ hềt sền gròi jơh ală tềl tơnggŏ ờ niam digơlan gơlik geh. Tàm broă pơrlòng ai tơlik khà priă bơcri, sồr cau ai tơlik priă bơcri, tac pơrlòng khà priă blơi phan bơna bal, ờ uă kuang bàng ờ hềt git dipal, tơl làm bè kơnòl lơh jat ală jơnau sồr bè song dơpă, loh làng mờ kơnòl mblàng lơh loh. Broă lơh lùp sền, sền sơwì broă lơh jat jơnau sồr bè song dơpă, loh làng, ờ hềt geh cồng nha sùm, cồng nha lơh geh ờ hềt uă. Bơta sền gròi mờ git wă tàm mpồl bơtiàn bè gơnoar git jơnau yal gam ờ hềt niam”.

Chủ tịch Quốc hội ồng Vương Đình Huệ đơs đơng lam

Ồng Bùi Văn Cường, Chủ nhiệm Văn phòng Quốc hội đơs là, pal pơn jat tai sơlơ mblàng yal, tơnguh jơnau git wă ai đảng viên in bè broă lam lơh tềm pềr, sơndră pơhì pơhà tàm jơh ală anih lơh broă; pơn jat tai đơng lam, kờp sền broă rơndap lơh lam lơh jat, yal ală bơnah broă ngan ngồn: “Pal sơlơ sền sơwì broă lam lơh tềm pềr, sơndră pơhì pơhà tơl gah broă lơh, tơl tiah, yal ală bơta ờ niam, bơh hơ̆ geh broă bơsong. Pal cih kơrnuat mùl màl bè lơh glài broă lơh tìs tàm gah do, ngan là kơnòl bơh cau atbồ dê kung bè jờng rơ mờ kờp bal broă lơh kuang bàng geh gơ rềng tus lam lơh tềm pềr, sơndră pơhì pơhà den hơ̆ sồng gơtùi lơh tam gơl broă gơlik geh”.

Đơs nền gùng dà lam lơh tềm pềr, sơndră pơhì pơhà là gùng dà dờng tàm tŭ dà lơgar gam rƀah, Chủ tịch Quốc hội ồng Vương Đình Huệ đơs loh, hòac huơr tài bơh broă pơhì pơhà ờ lơyah rlau mờ sa kuề sa kuà, geh tŭ gam dờng rlau. Tàm jơnau yal bơh Chính phủ mờ jơnau yal sền sơwì wơl bơh Ủy ban Thường vụ Quốc hội dê, uă tơngume gam ờ hềt koh làng, gam cèng bơta ờ ngan ngồn, gam geh bơta ki ngàm, pleh. Chủ tịch Quốc hội ồng Vương Đình Huệ sồr, jơnau yal Chính phủ mờ jơnau yal sền sơwì wơl bè broă lam lơh tềm pềr mờ sơndră pơhì pơhà pal lơh jat broă lơh lam lơh tềm pềr, sơndră pơhì pơhà bơh nam 2020 dê, kuơmàng tàm ală gah priă jền, kes priă, càn priă, phan bơna, phan kuơ, tiah ơm kis mờ broă tềm pềr tŭ tơngai, tơnguh cồng nha lơh broă.... Bơsong mpồl lơh sa kă bro ờ pràn, ngân hàng ờ pràn. Tàm gah broă lơh dà lơgar pal sền gròi tus bơta kòl yan tàm broă rơndap ù tiah, bơcri priă dà lơgar, bơcri priă mpồl lơh sa kă bro, lam lơh tềm pềr tàm làng bol: “Rơcang sơndră sa kuề sa kuà den là broă pal lơh, mơya pal gơ jat bal mờ broă lam lơh tềm pềr mờ sơndră pơhì pơhà. Ală pơhì pơhà do ờ hềt kờp geh gơ rềng tus tơngai lơh broă. Ală kuang bàng pal đơs loh ală cồng nha mờ bol he lơh geh tàm gah rơndap tap sèng, tơrmù khà kuang bàng biên chế, ngan là ală tiah lơh niam. Uă tiah tŭ do khà tă dơ̆ ngui sùm geh nggùl, tă priă tus nggùl. Ờ uă Bộ, gah broă lơh lơh niam halà broă gơ rềng tus tơrmù ală sră nggal sền sơ wì ờs mờng, bol he tơmut tàm jơnau yal do, lơh jat Adat lam lơh tềm pềr, sơndră pơhì pơhà, lơh jat Kơrnuat sồ 166 ngai 23 nhai 1 nam 2020”.

 Cau mblàng K’Duẩn