VOV4.K’ho- Mờ bơta đơng lam bơh Chủ tịch Quốc hội ồng Vương Đình Huệ dê, Ủy ban Thường vụ Quốc hội pa pơrjum jal mhar nàng tă pơgồp jơnau đơs bè jơnau rơcang cih Nghị quyết bơh Chính phủ dê bè lam lơh ală broă lơh jal mhar rơcang sơndră kòp Covid-19 jat Nghị quyết sồ 30 bơh Quốc hội dê geh ai tơlik tàm pơrjum dơ̆ dùl, Quốc hội khóa 15. 

Mang ngai 05/8 pa do, Thủ tướng Chính phủ neh kĭ Sră nggal sồ 1067 dan jơnau đơs tă pơgồp bơh Ủy ban Thường vụ Quốc hội dê bè ală broă lơh jal mhar rơcang sơndră kòp Covid-19 mờ ngai 06/8, Chính phủ pơn jat tai geh Sră yal dan jơnau đơs Ủy ban Thường vụ      Quốc hội ai gơnoar Chính phủ lơh nền ală broă lơh kal mhar krơi mờ ală jơnau cih bơh adat boh lam dê.

Bơh broă sền sơ wì jơnau rơcang cih Nghị quyết bơh Chính phủ dê, ală kuang bàng Ủy ban Thường vụ Quốc hội neh ring bal mờ 4 tơngume pa krơi mờ jơnau cih bơh adat boh lam gam ngui tŭ do halà gơ wèt gơnoar bơh Ủy ban Thường vụ Quốc hội dê, jat jơnau cih bơh Nghị quyết sồ 30 Quốc hội dê.

Mùl màl, ai gơnoar ală Bộ Y tế, Quốc phòng, Kuang àng, Ủy ban Nhân dân ală càr lơh nền crơng gơs anih dờp, sơm cau bơtờp kòp Covid-19 mờ kung là sră ai gơnoar lơh broă mờ sồr bơ tơl tŭ tơngai ai ngui bơh tơngume do dê, tus jơh nam 2022 mờ mìng ngui tàm bơta jal mhar rơcang sơndră kòp Covid-19 jat jơnau rơcang lài sơndră kòp mờ bơta geh ngan bơh tơl tiah dê.

Ủy ban Thường vụ Quốc hội ring bal mờ jơnau cih Nghị quyết dê geh cih, broă tơm priă kham sơm kòp ai cau kòp Covid-19 in, geh bal mờ priă sơm ală kòp ndai tàm tơngai sơm kòp Covid-19 bơh kes priă dà lơgar dê gàr. Bulah bè hơ̆, Ủy ban Thường vụ Quốc hội sồr gơ wèt mờ cau kòp Covid-19 geh ală bơta kòp ndai tàm să jan bè kòp đồm sơdàng, kòp gùng plai nùs, kòp leh... den broă tơm priă kham, sơm kòp gơ wèt tus mờ ală kòp do pal lơh jat jơnau cih bơh Adat Bảo hiểm y tế mờ ală jơnau cih ndai.

Ủy ban Thường vụ Quốc hội lơh nền ală broă jal mhar tàm rơcang sơndră kòp Covid-19

Ủy ban Thường vụ Quốc hội ring bal jàu Thường trực Hội đồng Nhân dân lơh nền ală broă gơ wèt gơnoar bơh Hội đồng Nhân dân dê mờ yal Hội đồng Nhân dân in tàm pơrjum rềp ngan rlau jơh nàng gàr bơta dipal mờ tŭ tơngai uă tiah gam pal lơh jat ală broă lơh rơcang sơndră kòp nền nòn bè ờ ai tơrgùm gal cau, lơh jat broă ơm yah ngài mpồl bơtiàn. Bè tơngume do, Ủy ban Thường vụ Quốc hội sồr pal sơlơ tơnguh bơta đơng lam bồ, sền sơ wì nền nòn bơh kấp ủy tàm ală tiah dê tàm tŭ lam lơh, pleh broă sơmờm jơnau cih do nàng lơh nền ală tơngume ờ ngan ngồn jal mhar, ờ gơ rềng tơn tus broă lơh rơcang sơndră kòp Covid-19 tàm tiah hơ̆ dê.

Đơs tàm dơ̆ pơrjum, Chủ tịch Quốc hội ồng Vương Đình Huệ đơs là, broă ai tơlik Nghị quyết do là kuơmàng ngan, jal mhar tàm tŭ tơngai kòp bơtờp gơlik geh ngai sơlơ kal ke, ờ gơtùi git lài, bơtờp tàm uă càr, ƀòn dờng, ngan là ală càr tiah đah jum dà lơgar: “Tàm jơnau rơcang cih Nghị quyết bañ ngui ală jơnau đơs ờ loh làng bè tơngume bè gờñ rlau, uă rlau, pleh lơh gơbàn bơta git wă ờ ndrờm bal, pleh lơh gơbàn kwi kuơ ai ƀòn lơgar in tàm broă lam lơh jat, geh tŭ gam lơh gơlik bơta khat bè lơh. Mùl màl ai gŏ, broă lơh den di ngan, mơya geh tŭ ƀòn lơgar lam lơh ờ ngac ngar, tiah do lơh krơi, tiah ndai lơh krơi. Dut ndơl gơbàn kòl yan bè broă pơndiang, tac bro phan bơna mờ broă lòt rê bơh làng bol dê, ngan là gùng ai lòt, gùng ờ ai lòt. Tơngai tus, sồr Chính phủ pal pơn jat tai đơng lam kơlôi sơnơng ai tơlik ală sră nggal tam pà loh ală gơnoar tơngume gơ wèt gơnoar jat jơnau cih bơh Chính phủ, bơh Thủ tướng Chính phủ dê. Sền sơ wì tam pà kấp pràn rlau tai ai kấp hơđơm in, ngan là tàm broă lam lơh jat. Ală broă gơ rềng tus tơngume broă lơh ngan là pal ring bal. Tàm bơta jal mhar den kuang đơng lam bồ sồr dùl bă tơrgùm gơnoar là kuơmàng ngan. Kuơmàng tàm broă lam lơh halà ală broă mờ Chính phủ, Thủ tướng Chính phủ neh ai tơlik, pleh bơta đơng lam den krơi, ai lơh jat den krơi”.

Chủ tịch Quốc hội đơs pơn dut pơrjum

Tơnơ̆ hơ̆, Chủ tịch Quốc hội ồng Vương Đình Huệ neh kĭ tơlik Nghị quyết sồ 268 bè broă ai gơnoar Chính phủ ai tơlik Nghị quyết geh 2, 3 tơngume krơi mờ jơnau cih bơh adat boh lam dê nàng lơh jat jơnau sồr rơcang sơndră kòp Covid-19. Jat hơ̆, Quốc hội ring bal mờ jơnau sồr bơh Chính phủ dê bè broă ai tơlik Nghị quyết bơh Chính phủ dê nàng lam lơh ală broă lơh jal mhar rơcang sơndră kòp Covid-19 jat Nghị quyết sồ 30 tơlik nam 2021 ngai 28 nhai 7 nam 2021 bơh Quốc hội khóa 15 dê, tàm hơ̆ geh ală tơngume tơnơ̆ do: Lơh nền broă crơng gơs anih dờp, sơm cau bơtờp kòp Covid-19 mờ kung là sră ai gơnoar lơh broă; Jàu Bộ Y tế geh cih ală sră nggal hành chính tàm thông tư jat sră nggal bal hiă nàng drơng jơnau sồr jal mhar bơh broă lơh rơcang sơndră kòp bơtờp dê; jàu Thường trực Hội đồng Nhân dân lơh nền ală broă gơ wèt gơnoar bơh Hội đồng Nhân dân dê mờ yal Hội đồng Nhân dân in tàm pơrjum rềp ngan rlau jơh.

Gơ wèt mờ jơnau cih bè broă tơm priă kham sơm kòp ai cau kòp Covid-19 in tàm ală anih dờp, sơm kòp Covid-19 (geh bal priă sơm ală kòp ndai tàm tơngai sơm kòp Covid-19) bơh kes priă dà lơgar gàr jat priă tă ngan ngồn, Chính phủ pơn jat tai pơ lam lơh jat jat gùng dà kes priă dà lơgar geh kơnòl, tă tơm jơh priă kham sơm kòp gơ rềng tơn tus broă sơm kòp Covid-19; gơ wèt mờ cau bơtờp kòp Covid-19 geh ală kòp ndai den broă tơm priă kham sơm kòp gơ wèt mờ ală kòp do pal lam lơh jat jơnau cih bơh Adat rơcang sơndră kòp bơtờp, Adat Bảo hiểm y tế mờ ală jơnau cih ndai bơh adat boh lam geh gơ rềng. Nghị quyết geh ai ngui bơh ngai 06/8/2021.

Cau mblàng K’Duẩn