VOV4.K’ho– Tàm pơrjum dơ̆ 4 geh lơh poh lài, tŭ ai jơnau đơs bè broă rơndap lơh ngui ù tiah dà lơgar tơngai bơh nam 2021 tus nam 2030, broă wèt sền tus nam 2050 mờ broă rơndap lơh ngui ù 5 nam, bơh nam 2021 tus nam 2025, Ủy ban Thường vụ Quốc hội ờ hềt ai gơnoar Ủy ban Nhân dân càr geh gơnoar tam gơl jơnau kờñ ngui ù tam kòi, ù brê rơcang gàr, ù brê kuơmàng, broă do pal yal Thủ tướng Chính phủ in sền sơ wì mờ lơh nền.

Bộ trưởng Bộ Tài nguyên mờ Môi trường ồng Trần Hồng Hà pà git, jơnau kờñ bơh broă rơndap lơh dê là rơndap ai ù tiah drơng jơnau kờñ bơtàu tơnguh rơndap tap sèng phan bơna ring bal, gàr tàm tơrbŏ bal ù tiah bơtàu tơnguh làm gah, làm bă tiah, ală gùng lơh sa mờ ală tiah tờm bơtàu tơnguh bơh dà lơgar dê; gàr kơ̆ kơljap 3 tơlak 500 rbô lồ ù tam kòi; gàr khà jơm glòm brê kơ̆ kơljap tàm khà bơh 42 tus 43%. Ủy ban Thường vụ Quốc hội đơs là, mùl màl tàm 2, 3 tiah, broă ngui ù tam kòi nàng tam ală bơta chi tam ndai halà ròng, tam phan tàm dà gam lơh geh cồng nha bè lơh sa. Kờñ jơnau sồr tam gơl rơndap tap sèng chi tam ngac ngar tàm bă ù tam kòi, Chủ nhiệm Ủy ban priă jền- kes priă ồng Nguyễn Phú Cường đơs là: “Tŭ do, gàr ù tam kòi, gàr tơl kòi phe. Bơdìh mờ ù tam kòi gơtùi tam gơl bơh chi tam pah nam gơs chi tam jŏ nam. Uă ngan gàr ù tam kòi tàm tiah ring dà dờng Cửu Long. Ù tam kòi pah nam 1 lồ den khi tơnhài geh bơh 50 tus 70 tơlak đông. Mơya dilah tam gơl nàng tam chi tam ndai den digơlan tơnhàu geh bơh 500 tus 700 tơlak đông”.

Bulah bè hơ̆, ală kuang bàng đơs là, broă ngui ù tam kòi ai jơnau kờñ ờ di lơh sa suơn sre in kung ờ ƀuơn tam gơl wơl gơs ù tam kòi. Sồr pal đal git kơrnuat, tơl khà ai gơnoar tam gơl, bă tiah gơtùi tam gơl, bă tiah ờ ai tam gơl. Ờ hềt git loh bè jơnau sồr bơh Chính phủ dê bè ai gơnoar Ủy ban Nhân dân càr geh gơnoar tam gơl jơnau kờñ ngui ù tam kòi, ù brê rơcang gàr, ù brê kuơmàng mờ ờ duh pal yal Thủ tướng Chính phủ in ring bal, Chủ nhiệm Ủy ban adat boh lam bơh Quốc hội dê ồng Hoàng Thanh Tùng đơs là, jơnau cih bè do là ờ ring bal mờ jơnau cih tàm Adat Ù tiah: “Jàu gơnoar ai Ủy ban Nhân dân càr in gơtùi tơlik kơrnuat lơh nền tam gơl jơnau kờñ ngui ù tam kòi rlau 10 lồ. Ù brê rơcang gàr, brê kuơmàng rlau 20 lồ. Jat jơnau cih tàm Adat Ù tiah gam là Thủ tướng ring bal, tŭ do jàu Ủy ban Nhân dân càr in den krơi mờ adat boh lam, lơh gơbàn bơta ờ ring bal bơh Adat Ù tiah dê. Dilah hơ đơm 10 lồ ù tam kòi, hơ đơm 20 lồ ù brê rơcang gàr, brê kuơmàng, càr geh gơnoar tam gơl mơya pal yal Hội đồng Nhân dân in, tơnơ̆ hơ̆ Ủy ban Nhân dân càr hơ̆ sồng gơtùi lơh. Tàm tŭ tŭ do bol he ai gơnoar Ủy ban Nhân dân càr lơh hơ̆ sồng yal Thủ tướng in, bè hơ̆ den kal ke ngan, ờ ring bal tàm jơnau cih Adat ù tiah”.

Ủy ban Thường vụ Quốc hội sồr atbồ nền nòn bă ù tam kòi tam gơl gơs jơnau kờñ lơh sa suơn sre ndai nàng ờ lơh aniai ală bơta krơi is kuơmàng ngan rlau jơh bơh ù tam kòi dê, tŭ kuơmàng den gơtùi rê wơl tam kòi, tơrmù tus khà lơyah ngan rlau jơh broă tam gơl ù tam kòi tàm ală tiah geh bơta pràn tam kòi nàng gơs ală jơnau kờñ ờ di lơh sa suơn sre, gàr rơndap ù tiah bơtàu tơnguh brê, cồng nha gơ jat bal mờ tam brê, bơtàu tơnguh lơh sa brê mờ sền gàr tiah ơm kis.

Bè jơnau sồr ai gơnoar Ủy ban Nhân dân càr tam gơl jơnau kờñ ngui ù tam kòi, ù brê rơcang gàr bồ tô, ù brê kuơmàng mờ ờ duh pal yal Thủ tướng Chính phủ in ring bal jat jơnau cih bơh Bơta 58 Adat Ù tiah dê. Ủy ban Thường vụ Quốc hội đơs là, do là dùl tam gơl broă lơh dờng ngan pal geh tơn jơh, sền sơ wì nền nòn. Tàm tŭ tơngai Chính phủ gam sồr  tơn jơh broă lơh jat nàng tam gơl Adat Ù tiah, ờ hềt ai tơlik broă do tàm jơnau rơcang cih Nghị quyết. Dilah kuơmàng den Chính phủ tơn jơh, sền sơ wì nền nòn yal Quốc hội in lài mờ tŭ lam lơh tam gơl Adat Ù tiah tàm tơngai tus. Bè ală broă lơh atbồ, ngui ù tiah tàm tơngai tus, Chủ tịch Quốc hội ồng Vương Đình Huệ sồr: “Broă lơh tus do pal khin cha ngui công nghệ pa nàng atbồ, gròi sền dữ liệu ù tiah. Tài broă atbồ ù tiah là tơngume tờm gròi sền dờng màng ngan rlau jơh bơh Quốc hội dê tàm broă lam lơh tềm pềr, rơcang sơndră hoàc huơr. Tus do, khà kờp ù tiah pal mùl màl, lòt tơl bă tiah, tơl anih nàng gròi sền. Cồng nha mờ gơ lin uă rlau mờ khà kờp rơndap lài ù tiah den ờ gơtùi. Bơta do ờ gơtùi ai gŏ loh làng”.

 Cau mblàng K’Duẩn