VOV4.K’ho- Drim ngai 01/4, Vụ Ring bal cau klau cau ùr, Bộ Lao động, Thương binh mờ Xã hội mờ Anih lơh broă Liên hợp quốc mờ Ring bal cau klau cau ùr (UN Women) yal pang sră cih tiah anih lơh broă, mpồl lơh broă dong kờl cau ùr mờ kơnòm dềt gơtìp lơh pờng mờ sơgràm aniai tàm gùt lơgar. Geh lơh mờ lơh sir tàm 6 nhai, măt tơrùm jơh ală tiah bơh ală anih lơh broă, mpồl dong kờl cau ùr mờ kơnòm dềt gơtìp lơh pờng mờ sơgràm aniai tàm 63 càr mờ ƀòn dờng tàm hơ̆ geh bal kấp dà lơgar.

Ală drơng broă dong kờl bơh ală anih lơh broă, mpồl lơh broă dê tàm pang sră cih mat tiah lơh broă geh tơrgùm kờp jăt tàm broă lơh bal gùt plai ù bè Bơnah drơng broă pal geh lời ai cau gơtìp aniai bơh bơta lơh pờng cau klau cau ùr bơh Liên hợp quốc mờ Bộ Lao động, Thương binh mờ Xã hội dê lơh.

Jăt Lùp kờp dà lơgar bè lơh pờng gơwèt mờ cau ùr tàm Việt Nam nam 2019, di 3 nă cau ùr den geh mờr 2 nă cau ùr neh geh tŭ kong bơh dùl broă lơh pờng bè să jañ, bĭc bài, nùs nhơm, lơh sa, halà gròi sền broă lơh tài bơh bơklau, cau tir lơh gơlik tàm rài kis. Bulah bè hơ̆, jơh ală cau ùr (90,4%) gơtìp lơh pờng ờ jòi geh bơta dong kờl bơh anih lơh broă ai pà drơng broă dà lơgar dê.

Cau mblàng Lơ Mu K’Yến