Nar ntri (25/2), Công an n’gor Gia Lai ƀư ntơm rdâk ƀư, kơl an jay n’hanh ndơ̆ jao prăk ƀư tă bah Bộ Công an ntop kơl bôk  nău  kan nsum ti ntlơi jay truh sat, nkưp nde ta n’gor. Trung tướng Phạm Thế Tùng, Thứ trưởng Bộ Công an, râng n’hanh ntơh măt Bộ Công an ndơ̆ kơl an n’gor 231 rmen prăk – rnoh prăk tă bah cán bộ, tahen bah Bộ rgop, gay nsum ti ndrel n’gor tĭng ƀư bôk nău kan dja.

Lah rđău đă ta rơh lễ, Trung tướng Phạm Thế Tùng lah rjăp Bộ Công an ton ndrel hăn đah n’gor Gia Lai tâm nău ntlơi jay truh sat, nkưp nde,  đăp mpăn nuĭh ƀon lan geh ntŭk gŭ n’hŭt răm. Păng lah rjăp, đah nuih  n’hâm dơn kan dŭt âk, mpôl công an hăn leo lor tay bôk năp tâm nău rgum tơm ndơ, ntrôl ngăch rdâk njêng n’hanh nkra jay gŭ, nkre mât đăp mpăn rnă njrăng tâm rnôk tĭng ƀư bôk nău kan. Tĭng trong nchrăp, n’gor Gia Lai nchrăp ntlơi jăng 8.485 mblâm jay tâm bôk nău kan "Nsum ti ntlơi jay truh sat, nkưp nde” tâm năm 2025.