Nar 5/2, Ban rđău  đă an ƀư jut jăng nhih jay nkưp nde, truh sat n’gor Dak Nông ƀư rơh hop bôk năp n’hanh n’gluh rnoh tât 7 khay jut jăng 540 mblâm jay jut jăng nhih jay nkưp nde, truh sat.

 Lam n’gor Dak  Nông aƀaơ hôm rlău 6.000 rnăk dôl gŭ rêh tâm ăp mblâm jay truh sat. Tâm rnoh nê geh nklăp 1.700 rnăk tŏng nău dơi dơn ndơ ntop kơl ƀư jay bah  ăp bôk nău kan gưl neh dak, trong kơl bah ngih dak. Tĭng ƀư bôk nău kan  jut jăng nhih jay nkưp nde, truh sat bah Thủ tướng Chính phủ, n’gor Dak Nông geh 540 rnăk dơi ntop kơl, đah lĕ rngôch prăk dŏng ƀư rlău 40 rmen prăk. Tỉnh ủy, UBND n’gor Dak Nông hŏ ndăn an ƀư ra uănh tay, nchih săk n’hanh ŭanh an ăp rnăk ƀon lan dơn geh ndơ ntop kơl, nkre jao an ăp n’gâng kan, ăp nkuâl ƀư wat jêh ăp siƀŭt gay ntơm rdâk ƀư jay an ăp rnăk ƀon lan. dŭt mbrơi tât kêng dŭt khay 2/2025, n’gor Dak Nông mbra rdâk ƀư mhe 113 mblâm jay, âk nklăp 21% rnoh âk dơi uănh an ƀư. N’gor Dak Nông nsrôih, tât bah năp khay 9/2025 wat jêh 540 mblâm jay, jêng lah ăp n’gor n’gor mbra  jut jăng 2 mblâm jay nkưp nde, truh sat.