Tâm bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang dôl nchrăp chuat lăp tâm du rơh mhe, ri nău mât kơn n’hanh ntrôl dăng lơn đŏng pah kan ndop bu ur tâm lĕ rngôch ăp nkô̆ bah bôk nău kan mô hôm lah njrăng, ma hŏ jêng du nău đă ƀư jăch ndăn khlay. Nău dja mô dơn gay đăp mpăn nău dơi geh tâm ban an bu ur n’hanh kon se bu ur nkual rnoi mpôl đê̆, ma hôm lah ndơ khlay gay njêng nău hun hao jŏ jong an lĕ ma ƀon lan.

Năl geh tâm bah ri aơ nơh, Trong nchrăp 8 mpeh bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang dơi uănh  lah du “njuat hăn khlay” rnôk geh tơm prăk ngân sách n’hanh nău kan rong êng an nău ntrŭt ntrôl tâm ban bu ur. Yơn lah, tĭng Tiến sĩ Phạm Thái Hưng – nuĭh rnâng kan mbơh nti trong kơl, nău nsrôih dja hôm mô hŏ “tŏng" đŏng. Păng rblah luh, Trong nchrăp 8 aƀaơ dơn geh nklăp 1,4% lĕ rngôch tơm ndơ lĕ ma bôk nău kan, lĕ ma trong nchrăp n’hanh ntŭk ƀư jê̆ êng ƀa ƀă. Rnoh tâm pă kơt nê lah hôm dŭt đêt gay mbăk anh du nău kan têh. Tiến sĩ Hưng lah rjăp: "mpeh bôk năp mô hŏ njrăng uănh mô lah mô mpơl kloh mpeh nău ndop bu ur."

Nău ngăn geh dja n’gluh du nău ntul rlong têh, yor lah dơn kâp nơm tâm du trong nchrăp jê̆ êng đah tơm ndơ mpăng đêt, ri rơh ntrŭt ntrôl tâm ban bu ur bu klô ta nkual rnoi mpôl đê̆ n’hanh mpeh yôk yang jêr jŏt jêr ma dơi geh kơt nău mpŏng. Bah năp nău ngăn geh nê, Tiến sĩ Phạm Thái Hưng an lah ân geh nău rgâl tơm mpeh trong tât tâm let năp tay. Păng lah rjăp, lah he mô rgâl trong ƀư, ri jêr ma dơi tât rnoh hŏ n’gluh tâm pah kan tâm ban bu ur. Păng dăn đă lah: Ndop bu ur tâm lĕ rngôch ăp trong nchrăp kan, ăp trong nchrăp jê̆ n’hanh ăp nkô̆ n’glăp gâl bah bôk nău kan. Tĭng păng, aơ mô dơn lah nău dơn kan bah êng Trung ương Hội Liên hiệp bu ur Việt Nam mô lah bah trong nchrăp 8, ma ân lah nău dơn kan rloh rlău, ân "lăp jru tĭng tơm prăk, tĭng nău kan" bah lam bôk nău kan.

Gay nău ndop bu ur mô dơn n’glĕ ta trong nchrăp mô lah ngơi dơm ma mbung, Tiến sĩ Phạm Thái Hưng dăn đă ân geh trong ntĭm nti na nê̆ bah ăp n’gâng kan ƀư tơm tĭng  ƀư trong nchrăp kan, trong nchrăp jê̆, đah nău tâm pă kan nsum bah Văn phòng tâm pă bôk nău kan. Păng lah rjăp, ân rgâl mhe trong an ƀư ngăn ngăn n’hanh grêt dăch ngăn ngăn.

“Ntrŏng năl tay ntŭk n’hanh nuĭh an ƀư lor. Đah ăp nău kan kơt n’hao nău dơi kan n’hanh nkoch trêng nău lư, ân rgâl trong rƀŏng bah trong tât tĭng ntŭk jêr jŏt mha êng jêng trong tât tĭng nuĭh ân dơi ntop kơl na nê̆; N’hao nău dơi tam nkoch trêng nău lư. Ân n’hao dăng n’hanh ntrŭt ntrôl dŏng âk keh mbrô, yơn nău khlay lơn lah ân đăp mpăn tơm ndơ ngăn ngăn an ăp rmôt nkoch trêng nău lư tâm nsum mpôl”.

Ngăn geh aƀaơ, ta âk ntŭk, he geh njêng ăp rmôt nkoch trêng, rvăt năp loa pơk ngơi….yơn nău dơi tam nkoch trêng nău lư hôm dŭt đêt. Nkô̆ tơm lah tă bah mô tŏng geh tơm prăk dŏng gay mât dŏng. Tiến sĩ Phạm Thái Hưng nchŏng kloh an lah Bộ Tài chính mô hŏ n’glăp rnoh kơl prăk dŏng dja tâm Thông tư 55, ƀư ăp n’gâng kan tâm dâng mô geh tơm prăk gay an ƀư, lơn lah ta nkual jru, nkual ngai. Mô n’glĕ ta nê, păng hôm nchŏng luh tay ăp nău khoah tâm pah kan kơi năp nti:

“Pah kan kơi năp nti mpeh tâm ban bu ur aƀaơ dôl tŭp tâm nău nkre rmeh, nkre mô tŏng; rmeh ăp nkô̆ lâp tay, ntơ dơm; mô tŏng geh ăp nău tă ơm gĭt kan ngăn ngăn, ăp trong ƀư blău mhe. Ân rgâl jêng n’hao nău dơi kan tĭng rnôk hao jêng rgâl bah hôm ma ăp nar kơi năp nti jê̆ chrai tay, gay năp ngăn an rmôt cán bộ ăp gưl nău blău ndop bu ur geh nău tam tâm nău  kan ăp nar”.

Mpeh rgum tơm ăp nkô̆ nău an ƀư lor tâm let năp tay, bah meng nău an ƀư tay geh nău tam bah ăp nău mât chăm n’hâm suan deh nse, Tiến sĩ  Phạm Thái Hưng dăn đă pơk hvi tay ăp nkô̆ kơt tât đah trong dak kloh uĕh n’hanh srăch se, lơn lah rong an bu ur n’hanh kon se. Tĭng păng, aơ lah nău ŭch geh khlay, ring tam na nê̆ tât n’hâm suan n’hanh săk geh nău rêh bah rmôt nuĭh dơh geh tât khuch dja, yơn I ngăn aƀaơ nha hôm lah du trong ntul rlong têh ta âk ntŭk mpeh yôk yang, nkual jru nkual ngai đŏng.

Gay ăp nău dăn đă lăp tâm ngăn ngăn, Tiến sĩ  Phạm Thái Hưng kuăl jă Trung ương Hội Liên hiệp bu ur Việt Nam ân lor nchrăp kan nsum lhăt đah Văn phòng Tâm pă nău kan bôk nău kan gưl neh dak n’hanh ăp n’gâng kan geh tât, gay đăp mpăn bu ur dơi ndop du trong jru hvi n’hanh ngăn ngăn tâm ăp trong nchrăp kan n’hanh n’glăp gâl mhe. Lah mô ndop dơi, ri ân mât kơn du rmôt kan êng, mô lah mbra dơi ndơ̆ tâm gâl n’glăp hun hao tơm nuĭh kan kơt du trong nkra tâm di n’hanh geh nău dơi.