Ntoh nau tâm nar rƀŭn, Kruanh Quốc hội Trần Thanh Mẫn lah rjăp, aơ lah rơh rƀŭn khlay, yor Rnâng kan Đảng uỷ Quốc hội ndrel Rnâng kan Chính phủ ƀư tơm gay uănh nau kan geh tât nchrăp rơh rƀŭn ndal tal 9, Quốc hội gưl 15 (geh ntơm lơ 12-18/2/2025).

Kruanh Quốc hội lah rjăp, rơh rƀŭn geh tâm rnôk Trung ương ndrel n’gor dôl rƀŭn lôch nau ntrŭnh mrô 18 dăp rgum ntrong kan tă bah Trung ương tât nkuăl; tâm rnôk rhơn Đảng, rhơn năm mhe Ất Tỵ 2025, nkah 90 năm nar ndâk Đảng Cộng sản Việt Nam. Tĭng nê, âk ntŭk kan bah Chính phủ, Quốc hội hŏ nsôih măng, nar, n’ăp ma nar prao, pơh đah nuih n’hâm kan prêh, tâm rgop rjăp gay ƀư nau kan geh jao.

 Kruanh Quốc hội mbơh, Uỷ ban Rnâng kan Quốc hội kŏ rƀŭn rgop nau mpeh Luật ƀư Chính phủ (rgâl nkra) ndrel nchrăp ntrŭnh ăp nau tâm rơh rƀŭn ndal tal 9. Ăp nkô̆ nau aơ Rnâng kan Quốc hội tâm ban prêh. Kruanh Quốc hội Trần Thanh mẫn lah rjăp:

‘Nuih n’hâm nơm ân geh rgâl nau mĭn, nau kan, rgum prêh ân hun hao neh dak, nkre ƀư tĭng nau tă blau, nau kan, nau ƀư bah ăp rơh rƀŭn êp aơ, ngăn lah ăp rơh rƀŭn tal 7,8 bah Quốc hội gưl 15. Rơh rlau aơ 2 ding hŏ tâm rgop ueh ngăn, rnôk aơ nơm ân tâm rgop ueh tay, hŏ geh nau dơi, nau kan prêh hôm, ri rnôk aơ nơm ân tâm rgop ueh lơn tay, hĭ ƀư geh nau dơi, nau kan prêh, ri rnôk aơ ân geh ƀư prêh, nau kan prêh lơn tay yor nau hun hao bah neh dak.

Đah nau rđau kan bah Rnâng kan Trung ương, Bộ Chính trị, Ban Bí thư ndrel Tổng Bí thư Tô Lâm hŏ âk nau nkah ân lah, nau tâm rgop đah Chính phủ ndrel Quốc hội ân geh njêng nau tâm ban gay doh ăp nau jêr, nkol, tâm hun hao văng sa rêh jêng, đăp mpăn neh dak, rnă njrăng ndrel ndâk ntrong kan Chính trị”.

Kruanh Quốc hội mbơh, ăp nkô̆ nau rơh rƀŭn ndal tal 9, tât rnôk aơ 2 ding hŏ geh dơi ăp nkô̆ nau, geh: Uănh nchră luh 4 luật, 5 nau ntrŭnh kơl an nau dăp rgum, ƀư jêh nau kan, ntrong kan bah nau ƀư bah ntuĭk kan, ntrong kan chính trị, uănh nau ntrŭnh 4 nkô̆ nau êng geh nau dơi, tâm nê geh nkô̆ nau mpeh nŭih kan, nkre geh du nau mbơh Quốc hội tĭng nau ntrŭnh.

Ntoh nau tâm nar rƀŭn, Thủ tướng Chính phủ Phạm Minh Chính rnê prêh ndrel lah ueh nau tâm rgop bah Quốc hội, Uỷ ban Rnâng kan Quốc hội, ăp đồng chí rđau kan Quốc hội, Kruanh ăp Uỷ ban bah Quốc hội đah Chính phủ; nar lơn ma rnơm, tâm rgop ngăn, săk tam nsum gay ƀư nau kan têh, ngăn lah ƀư ân rjăp ndrel tam ăp nau ntrŭnh bah Đảng ndrel Ngih dak tâm nau kan bah Quốc hội kŏ kơt lah Chính phủ.

Thủ tướng Phạm Minh Chính lah rjăp, nkô̆ nau nchrăp luh bah Rnâng kan Trung ương, Bộ Chính trị, Ban Bí thư, rđau bah Tổng Bí thư Tô Lâm bar ding tâm rgop n’hêl, ƀư âk nau kan tâm rơh gleh, geh săk tam yơn nâp mpeh nau kan, nau ƀư.

"Nơm rƀŭn ta rơh rƀŭn ndal tal 9, ntoh nuih n’hâm geh kan pah, geh nau kan ri ân rklaih. Ma hŏ ƀư, rklaih ân tât lôch, geh săk tam. Uănh tay ăp rơh rƀŭn ndal tâm di ma nau ngăn, rklaih dơi nau kan ngăn ndrle rklaih dơi nau ŭch bah ƀon lan. Nkô̆ nau rơh aơ bah Đảng mbơh, nơm ân rtŭt gleh lơn, kon nŭih ân jăp lơn. Rnôk ma nơm ntrŭnh nau aơ, ƀư nau ntrŭnh bah Trung ương bah Bộ Chính trị, ăp nau tă geh dơi bah Đảng ri mra kol tât ăp nau ntrŭnh bah pháp luật ma hŏ geh ntrŭnh tĭng nau ơm. Nuih n’hâm bah Trung ương, Bộ chính trị ri ntŭk kol ri nkra, kol tâm moh gưl ri gưl nê ân nkra”.

Lah rjăp rơh rƀŭn ndal tal 9 geh nkô̆ nau khlay, jêr ngăn yơn yor nau hun hao bah neh dak, Kruanh Quốc hội Trần Thanh Mẫn đă ăp ding geh tât ân lŏ rgum prêh, nsôih ngăn, tâm rgop rjăp, ndal ƀư jêh nkô̆ nau bah Quốc hội kŏ kơt lah đăp mpăn nau kan ngăn, rgop nau dơi bah rơh rƀŭn./.