Kruanh Văn phòng Quốc hội Lê Quang Tùng mbơh nau nchrăp nau ntrŭnh mpeh nau dơi, nau kan n’hêl ndrel nau ƀư bah Hội đồng Dân tộc, ăp Uỷ ban bah Quốc hội. Ntoh nau tâm nau aơ, Kruanh Quốc hội Trần Thanh Mẫn, kơp dơn, rnê prêh nau săch ƀư geh nau ueh, ndak tâm nau ndâk, ƀư jêh săm ƀŭt Ntrŭnh nau gay mbơh Uỷ ban Rnâng kan Quốc hội uănh, rgop nau. Nau ƀư jêh, n’hao nkra nau ntrŭnh mra ơm rgop nau n’hao nau tam tâm nau kan bah Quốc hội.

            Tĭng Kruanh Quốc hội nau ntrŭnh ân tâm dăch ma nau kan bah Hội đồng Dân tộc, ăp uỷ ban bah Quốc hội geh ntrŭnh tâm Luật rgâl nkra, ntop tay du đê̆ điều bah Luật ƀư kan Quốc hội, đăp mpăn ndơn, tâm ban ndrel tâm di đah ăp ntŭk kan.

            Kruanh Quốc hội tâm ban nau ma ăp nkô̆ nau, ân lah nau ƀư mra geh kơp, nchră, đă rgâl, nkre ŭch nau ntrŭnh aơ geh ntrŭnh gay ƀư. Ntoh nau tâm ban ma nau ntrŭnh ndâk, ƀư nau kan bah Hội đồng Dân tộc, ăp Uỷ ban bah Quốc hội, Kruanh Quốc hội ân lah:

            ‘Mpeh nau kan, nau dơi bah Hội đồng Dân tộc, ăp uỷ ban bah Quốc hội, bah năp măt, hôm geh ndơn ndrel lŏ ndơn nau kan, nau dơi bah ăp ntŭk lor ma ƀư nau dăp rgum gay ma pă nau dơi, nau kan. Nau rgum ntrơn rgâl bôk năp bah du đê̆ nau kan, nkô̆ nau kan đah du đê̆ ntŭk ân geh tâm ban, ueh; mô dơi dơm, mô tâm ntrŭp mpeh nau ƀư nau kan lah nau tâm di. Uỷ ban Rnâng kan Quốc hội tâm ban nau kan, ăp ntŭk bah Quốc hội ân geh rgum mêt uănh nau kan tâm nau dơi bah ntơm 02-03 Bộ, ntŭk kan tâm Trung ương gay ma đăp mpăn tâm ban, der nau nsŭn tâm du đê̆ nau kan. Nkre mêt uănh lơn ma geh n’hao prêh, tâm di, geh dơi ăp nau kan ndal, geh cử tri uănh khlay”.

            Tâm nau mât nau kan gay tŏng nau geh ndŏ luh, nau ntrŭnh ân geh năl kloh lơn tay nau tâm boh đah Rñag kan Hội đồng Dân tộc, Rnâng kan Uỷ ban, Kruanh Hội đồng Dân tộc, nŭih ƀư tơm bah Uỷ ban ndrel Văn phòng Quốc hội tâm nau mât nau kan.

            Kruanh Quốc hội đă, jêh aơ, ân geh rgum nkre ân nau ƀư jêh ăp nau ntrŭnh geh tât nau kan, nau pah, rmôt kan kơl an, đăp mpăn nau ueh rnôk kan, mô nkol khuch tât nau ƀư kan, nau dơi bah ăp ntŭk. Ndri ma, ăp ntŭk kan geh tât ndal ntrŭnh ƀư nau đă, ntrŭnh ƀư nau ntrŭnh, mât công chức, nau kan tơm bah Hội đồng Dân tộc bah ăp Uỷ ban, đăp mpăn nau dơi ƀư bah Hội đồng Dân tộc, ăp uỷ ban, rgâl nkra, ntop tay nau ntrŭnh mrô 22 bah Uỷ ban Rnâng kan Quốc hội mpeh nau kan, nau ƀư, nau dơi, ndâk nau kan bah Văn phòng Quốc hội.

            Kruanh Quốc hội Trần Thanh Mẫn đă, Hội dồng Dân tộc, ăp Vụ ân uănh, nkah tât nau kan cán bộ bah rmôt kan nơm, mô geh ƀư tâm rlŭk; săch cán bộ tâm ăp ntŭk kan gay ma ƀư kơl an nau kan Hội đồng Dân tộc, ăp Uỷ ban ân geh săch nŭih pah kan, nŭih geh nau blau, nau dơi, nŭih rgum geh gĭt, geh nau dăng ndrel ngăn lah ân geh nuih n’hâm ŭch rgâl mhe./.