Tâm nchră ta rmôt mpeh nau nchrăp luật ƀư N’gâng kan tâm nkuăl rgâl nkra, ăp ntoh măt tâm ban nau đah nau n’hao nau pă gưl kan, yor aơ lah nau dơi rklaih nau kol rnôk aơ. Luật mô dơi ntrŭnh n’hêl ăp nau ƀư, ma knŭng ntrŭnh ăp nau nchâp. Rnôk pă nau dơi, nkuăl ntrŭnh ƀư, ndơn nau. Yơn lah, rnôk pă nau dơi rjăp lơn ân ăp gưl n’gâng kan mra hăn nsum ma nau rvê ndrel ndăn nau kan. Wa Hoàng Văn Cường, rmôt kan bah Hà Nội, mbơh:

            ‘Nchrăp luh nau kan mhâm ƀư gay der ndăn nau dơi, nau geh, ngoai tâm ăp nau kan ne elah nau dơi geh nsum ma nau mbơh, kloh rvah, rklaih. Rnôk nê, ăp nŭih cán bộ, ƀư nau kan tĭng dơi nau geh, nau blau mhe, nuih n’hâm bah nau rgum bah mrô 14 bah Bộ chính trị mpeh nau bonh đă ăp nŭih janh ƀư mhe nau dơi nau kan ân săk tam”.

            Râng tâm nchră tâm rmôt, Tổng Bí thư Tô Lâm nkah: Sŏk nau tâm ban nuih n’hâm bah ƀon lan gay ma nchră uănh nau tam, nau dơi bah Chính phủ, n’gâng kan ăp gưl. Nau aơ nsing ngăn tâm nau rƀŏng, nau dăng bah nau kơt tĭng nau rgâl mhe, nau dơi ƀư tĭng nau ntrŭnh bah n’gâng kan:

            ‘N’hao nau nâp nau kan ân ƀon lan, ntrŭt dăng nau leo lăp kan bah nau rêh jêng lăp tâm nau n’hao săk tam bah ntrong kan hành chính ndrel ƀư nâp nau ƀư tơm. Lah mô dơi rgum n’hâm bah ƀon lan ri jêr ngăn. Ân geh bonh đă, ntrŭnh lah mhâm ƀư gay dơi ƀư nau nê. Pă nau dơi, yơn nau kan kŏ lah nau khlay ngăn. Ăp nau dơi geh ri nchlơi hành chính, lơi roh nau kan kơl an ƀon lan hôm”.

            Rgop nau tâm nau nchrăp ƀư kan Chính phủ (rgâl nkra), Kruanh Quốc hội Trần Thanh Mẫn lah rjăp nau mĭn pă gưl kan dăng ngăn ân Chính phủ gay Chính phủ nchrăp ƀư nau kan tâm nuih n’hâm ngăn lah nau dơi ân rklaih nau kol, rdâng, gay ma n’hong trong hun hao. Ăp nau kan hŏ geh năl uănh dơi ri ân geh rklaih nkre. Đah nuih n’hâm nê, Kruanh Quốc hội đă, rnôk geh nau rgâl nkra ăp luật ân geh tât ri ân geh kơp, đăp mpăn tâm di đah ăp nau ntrŭnh bah Hiến pháp:

            ‘Đah ma Luật ƀư n’gâng kan tâm nkuăl (rgâl nkra) ri mra pă gưl dăng lơn ân n’gâng kan tâm nkuăl tĭng nau dơi, nkuăl ntrŭnh ƀư, nkual nơm ƀư, nkual nơm ndơn nau. Rnôk aơ Quốc hội hŏ rgâl mhe nau mĭn, nau kan Luật nê lah Quốc hội jao nau dơi dăng lơn ân Uỷ ban Rnâng kan Quốc hội. Yor nau kan bah Uỷ ban Rnâng kan Quốc hội ƀư ngăch lơn gay rklaih ăp nau kan ndal. Đah ma Quốc hội tâm rơh tât mô geh mât nau ntuh kơl, n’ăp ma Chính phủ kŏ mô dơi mât gay ma n’huch âk ngăn nau kan dăn-ân”.

            Ngoai tâm ăp nau dơi ma ân geh pă nau dơi lah ân geh đăp mpăn Thủ tướng Chính phủ “mô ntrŭnh ân ăp nau kan n’hêl tâm nau dơi bah N’gâng kan, Kruanh ntŭk kan tâm ban Bộ đah nau dơi lah ăp nŭih kan bah Chính phủ đah ăp nau kan, ntŭk kan geh pă nau dơi ân ƀư”. Wa Nguyễn Minh Đức, rmôt kan bah nkuăl ƀon têh Hồ Chí Minh đă: Nau ntrŭnh ân n’hêl kloh nau pă nau dơi, pă gưl ân mât nau kan tă bah Thủ tướng Chính phủ ân tât ăp n’gâng kan, ntŭk kan:

            ‘Ân ƀư đah Thủ tướng Chính phủ ndrel Kruanh n’gâng kan mô lah Kruanh ntŭk kan ri ân ƀư moh nkô̆ nau? Ân ƀư ân Kruanh UBND n’gor mô lah nkuăl ƀon têh tâm Trung ương gay ma ân ƀư moh nkô̆ nau dơi? Tâm aơ ân geh nchrăp kloh ăp nau rƀŏng gay jêh aơ geh nau ntrŭnh ntĭm mbơh ân n’hêl. Lah mô geh nau mbơh nkoch bah jĭ ma aơ ri nkuăl lŏ geh nau ntrŭnh đă dăn, lŏ rgop nau tay yor ê geh nau gĭt kloh”.

            Ăp ntoh măt ân lah, lam dak dôl ƀư du nau rgâl mhe ngăn tâm ăp nau kan bah ntŭk kan Ngih dak, đah mông ƀư ngăch ngăn, ndri ma nau ngăn lah an geh ntrŭnh nkre ăp nau ntrŭnh mpeh nau rklaih du đê̆ nau kan geh tât nau dăp rgum tay ntrong kan ngih dak, gay pơk trong nơih ân pháp lý ƀư ăp nau kan drăp rgum trong kan bah ntŭk kan Ngih dak tâm Trung ương ndrel nkuăl”./.